उदालगुरिखौ अख्रां लामाजों फोनांजाबनो साखाफारा
टंला,जानुवारि, 04: गोदान बोसोर सफैनाय लोगो लोगो उदालगुरि आरो बड’लेन्ड हालामनि सुबुंफोरा गोसोआव रंजाखांनाय लाबोनो थाखाय जाहोन दं, मानोना उदालगुरिआव अख्रां लामाखौ फोनांजाबनो थाखाय बिरखं बाग्रा एबा हेलिखप्तार बाख्लायग्राया फैगासिनो दं। बुधबाराव हादोरसा पाब्लिक हेल्ट इन्जिनियारिं बिफान्नि मंत्री रिहन दैमारि बिथांआ उदालगुरि टाउननि 2 कि.मिटार साहा थानाय हारपुर होन्नाय जायगायाव गंथाम बिरखं बाख्लायनोहानायबादि बिरखं बाख्लायग्रा एबा हेलिखप्टार बाख्लायग्राखौ लुफुंनो थाखाय अन्थाय खाम्पा गायसङो।
खौरां मोन्नाय बादिब्ला बे प्रजेक एबा लाफुंनाय खामानिखौ 2016-17 आरो 2017-18 माइथायनि “आनटाइड रांनि बाख्रि” निफ्राय 1 कौटी रां बाहायनानै लुफुंगोन।
लुफुंजानो लागा बिरखं बाग्राखौ नोजोर होनानै उदालगुरि डिपुटी खमिसनार, दिलिप कुमार दास बिथानि दैदेन्नाया उदालगुरि बि.एद फरायसालिमायावबो सावरायमेल खुंफुङो। बे सावराय मेल आव रिहन दैमारि बिथांआ बुंथियोदि, “जौगाखांनायनि फारसे उदालगुरिआ फारफ्रोमबो बिथिंआव गोख्रै जौगागासिनो दं, आरो लुफुंजानो लागा ‘हेलिपट’आ उदालगुरि जिल्लानि जौगाखांनायाव मोनसे दाजाबदेरजाबावगोन”।
दैमारि बिथांआ बुंबावोदि “नेशनेल इंन्परमेसन आरो ट्रेन्परमिं इंन्डीया (नीती आयोग) नि रिकर्ड बादिब्ला हादोरनि गासै 155 जिल्लाफोरनि मादाव आसाम होरदानिफ्राय उदालगुरि जिल्लाया 1थि फारिलाइ आव दं आरो हादोनिफ्राय नायोब्ला 15थि फारिलाइआव दं”। बिथांआ बुंबावोदि, उदालगुरि-रौथा थांनाय लामा आरो उदालगुरि-खालायगांव थांनाय लामाफोरखौ बानायनाया गोख्रैयै सोलिगासिनो दं। आसाम आरो अरुनाचल हादोरसाखौ फोनांजाबनो थाखाय भैरबखुन्डानि धोनस्रि दैमायाव दालां फैगासिनो दं, जाय दालांखौ गासै 34 कौटी रां बाहायनानै लुफुंगोन होन्ना बुंबावो।
बीटीसी खुंथायनि लोगो प्रिन्चिपाल नेहाथारि रबिनसन मुछाहारि बिथांआ बुङोदि, “हादोरनि गाहाय मंत्री नारेन्ड्र मोडी बिथांआ फैगौ जानुवारि दाननि 15 अक्ट आव उदालगुरि जिल्लानि नालकामरा गामिआव इंन्जिनियारिं फरायसालिमा लुफुंनो थाखाय डिजिटेलनि गेजेरजों अन्थाय खाम्पाखौ गायसंगोन”। उदालगुरि जिल्लानि थाखाय माखासे फैगौ प्रजेकफोरा जाबाय, हरिसिंगानि खाथि कछपारायाव “मडेल दिग्रि कॉलेज”, आरो माजबाद आव “बिगियान मिरु” गायसंगोन होन्ना बिथांआ बुंबावो।
