क’कराझार,फेब्रुवारि 9: क’कराझार जिल्लानि रुपनात ब्रम्ह रोड एबा लामायाव 2018-19 नि आखायजों बानायजानाय आयजें लायलानि बाजारआ बि आर ए डाब्लिउ एफ इ डि ( (Bodoland regional apex weavers & artisans co-op fed ltd) नि बान्जायनायाव सुक्रबारनिफ्राय जागायबाय।
खौरां मोन्नाय बादिब्ला बे हाबाफारिखौ भारत सरकारनि गोदान दिल्लीआव थानाय Ministry of Textiles नि Development Commissioner (handicrafts) नि हेफाजाब होनायाव मावफुंदों होन्ना मिथिनो मोन्नाय जायो।
गासै गं 50 निबो बांसिन गलाफोरखौ फसंनाय जादों आरो हादोरनि गुबुन गुबुन हादोरसाफोरनिफ्राय गासै सा 100 सो आखायजों खामानि मावग्रा एबा Artisan फोरा बाहागो लादों।
गासै 9 साननि क्राप्त बाजार 2018-19 खौ बीटीसी खुंथायनि दानाय लुनाय (handloom and textile) बिफान्नि EM देबेन बर’ बिथांआ गोबां आर्टिसानफोर थानाय बेखेवनानै होदों होन्ना मिथिनो मोन्नाय जायो।
देबेन बर’ बिथांआ बेखेवनाय हाबाफारिआव बुङोदि, बीटीसी खुंथाया फारफ्रोमबो बिथिंआव जौगाखांनाय लाबोनो थाखाय खामानि मावगासिनो दं। दिनै आं गोजोन्नाय मोनदोंदि, जोंनि बर’ आयजोफोरा आखायजों दानाय लुनाय खामानिफोरखौ मावनानै हारिमुनि गान्नाय जोमनायफोरखौ फोथांनानै लाखिबोगासिनो दं, दिनै आं जोबोद गोजोन्नाय मोनदों। बर’ बिथांआ साफ्रोमबो आखायजों बानायनो रोंगौथि गोनां आर्टिसानफोरखौ गाव गावनि आखयजों बानायनाय आयजें आयलाफोरखौ क्राप्ट बाजाराव लाबोनो आरो फान्नो बिथोन होयो।
BRAWFED नि बोसोनगिरि एन एन राना पातगिरि बिथांआ क्राप्ट बाजारखौ नोजोर होनानै बुङोदि, 9 सान्नि हाबाफारि लानानै क’कराझार जिल्लानि क’कराझार टाउन आव क्राप्ट बाजारखौ जागायबाय, जाय बाजारा 8 फेब्रुवारिनिफ्राय जागायनानै 17 फेब्रुवारिसिम सोलिबायथागोन आरो बे बाजाराव हादोरनि सिङाव थानाय गुबुन गुबुन हादोरसाफोरनिफ्रायबो गासै सा 100 सो आखाइजों बानायनायाव रोंगौथि गोनां एबा आर्टिसानफोरा बाहागो लागोन आरो बिथांमोनहा औवाजों बानायनाय, खुन्दुंजों बानायनाय, फाथो दिरुंजों बानायनाय आरो बायदि बायदि मुवाफोरखौ दिन्थिफुंगोन।
बिथांआ बुंबावोदि, आखायजों बानायनाय दानाय लुनायफोरखौ क’कराझार टाउनाव दिन्थिफुंनो थाखाय BRAWFED आफादनो गोदान दिल्लीआव थानाय भारत सरकारनि मिनिसट्रि अव टेक्सटाइलनि जौगाखां खमिसनारआ सोलिफु बोसोर एबा 2018-19 माइथायनि थाखाय 18 लाख रां हरबाय।
बिथांआ बुंबावोदि, आखायजों बानायनाय आयजें लायला आरो दानाय लुनायफोरखौ दिन्थिफुंनो थाखाय ओनसोलनि आरो गुबुन गुबुन हादोरसाफोरनि गोबां सुबुंफोरनि गोसो गुदुं जानायखौ नुनो मोनखाबाय जाय मुवाफोरखौ दिनथिफुङोब्ला, दिन्थिफुंनायजों लोगोसे गाव गावनि रांखान्थियारि बिथिंखौ फोजौखांनो हायो।
पातगिरि बिथांआ बुङोदि, बीटीसी खुंथायनि दानाय लुनाय आरो एमफै फिसिनाय बिफान्नि EM, देबेन बर’ बिथांआ क्राप्ट बाजारखौ क’कराझारनि फ्लाइ अभारनि साखाथिआव मोजाङैननो बेखेवनानै होबाय।
बे हाबाफारिआव बीटीसी खुंथायनि प्रिन्चिपाल सेक्रेटारि आरो IAS बिरेन चन्ड्र पुका, क’कराझार BRAWFED नि गाहाय बिनद नार्जारि, क’कराझार BRAWFED नि एन एन राना पतगिरि, बीटीसी दानाय लुनाय बिफान्नि बोसोनगिरि स्रि डिबाकर गौस्वामि, भुटान हादोरनि सिङाव थानाय गेलेपुनि रिजिनेल सेक्रेतारि तेनजिं केलजां बिथांमोनहाबो बाहागो लादोंमोन।