गुवाहाटी,जानुवारि 9: दिनैनिफ्राय (बुधबार) गुवाहाटी नोगोरमायाव थानाय मुंदांखा कटन मुलुग सोलोंसालिनि फरायसाफोरा नोगोरारि सोदांनाय बिल 2016 नि बेरेखा धर्ना होनाय हाबाफारि बादियै बन्द’ फोसावनानै होयो।

फरायसा आफादआ जेंना गोनां नोगोरारि सोदांनाय बिल 2016 खौ बेरेखा खालामनानै सोमावसारनो थांखि लायो आरो बिथांमोनहा सोफ्रोमबो सोलोंसालिमानि फरायसा फरायसुलिफोरखौ क्सासआव नुजाथिनायखौ बन्द’ खालामनो खावलायो।

बिथांमोनहा गुवाहाटी नोगोरमानि आमबारिआनबो उखैहाब सोमावसारदों होन्ना मिथिनो मोनबावनाय जायो।

फारसेथिं तेसपुर मुलुग सोलोंसालि आरो डिब्रुगड़ मुलुग सोलोंसालिनि फरायसाफोराबो नोगोरारि सोदांनाय बिल 2016 खौ बेरेखा खालामनानै धर्ना होगासिनो दं।

थांनाय 8 जानुवारि आव पारलियामेन्टनि गोजां बोथोरनि लख सभा जथुमायाव खुगानि दान्थे बिदान्थेनि गेजेरजों भट होलायनानै थिसनबाय आरो दिनै (बुधबार) राज्य’ सभायाव थिसनजासिगोन।

नोगोरारि आयेन 1955 खौ सोदांनो थाखाय थांनाय 2016 माइथायाव लख सभानि जथुमायाव थिसनदोंमोन। बे आयेननि गेजेरजों पाकिस्तान, आपगानिस्तान आरो बांग्लादेस हादोरफोरनिफ्राय फैनाय हिन्दु, सिक, बुद्दिस, जैयन, पारसिस, आरो क्रिस्तानफोर जाय बिथांमोनहा आयेन बेरेखायै हाबफैनानै दं, बिथांमोनो भारत हादोराव नोगोरारि थामोन्थानि थाखाय गनायथि होनाय।

सा-सान्जा ओनसोलाव थानाय मोनफ्रोमबो हादोरसाफोराव धर्ना होनाय हाबाफारि बादियै मंगलबार आव 11 घन्टा गासै बन्द’ थाजोबो।