डेमाव,नवेम्बर 24: शिबसागड़ जिल्लानि बेंखनाव थानाय डेमाव टाउनाव ब्रिहस्पथिबारखालि बमा बेरफ्रुहोनानै सुबुंनि जिउ फोजोदनाय जाथायजों लोब्बा थानाय सा 5 दायनिगिरिफोरखौ पुलिसआ खाबाय।
गोहो बिफाननि मनट्री टपन गगय बिथांआ सुक्रबारखालि थैजानाय नखरनि सोद्रोमाफोरखौ लोगो हमहैयो आरो खहा जानांनाय साफ्रोमबोनि नखराव 5 लाख रांनि अनसुंथाय फोसावो।
गिबि मनट्री सर्बानन्द सनवाल बिथांनि बिथोन बादियै हादोरसा गोहो बिफाननि मनट्री टपन बिथांआ डेमाव ओनसोलाव थांनानै सानैबो थैजानाय नखराव 5 लाख अनसुंथाय एबा Ex-Gratia फोसावनानै होयो। खैरांगिरिफोरनि सिगांआव बिथांआ बुङोदि, जाथायजों लोब्बा थानाय दायनिगिरिखौ रेहाय होआ।
मारवारि समाजनि सोद्रोमाफोरा गोहो बिफान्नि मनट्री टपन गगय बिथांजों सावरायनायाव बिथांमोनहा बुङोदि, जों दानि हादोरसा सरकारनिफ्राय गोबां मोजां मोजां मिजिं थिनानै दंमोन, नाथाय दा जोंनि फोथायनायखौ सिफायबाय। “हादोरसा सरकारा जोंनि फालांगिरिफोरखौ रैखाथि होनो हायाखै” होन्ना बिथांमोनहा बुंबावो।
थैनांनाय कमल आगरवालानि बिमा सिथा आगरवालाया मनट्रीनि सिगांआव गाबनानै बुङोदि, “आंनि फिसाज्लाया मानो बुथारजाखो? आं उल्पानि सोद्रोमाफोरखौ नागिरलांगोन”।