हरखाब रादाब

तेजपुर जिल्लायाव एजिपि आरो कंग्रेसनि गेजेराव हिंसायारि जाथाय

तेजपुर

तेजपुर,डिसेम्बर 13: तेजपुर जिल्लानि डलाबारि गांव पन्चायतनि सिङाव थानाय फोरमाय गुलि गांव पन्चायतआव असम गन’ परिसदनि बिजाथि चाया डेबि चेट्रि बिथांआ 5 नं अवार्डआव देरहाखांनायनि उनाव गंसे दखानखौ ब्रिहस्पथिबारनि फुंआव गोग्लोबनाय जाथाय सोमजियो।

खौरां मोन्नाय बादिब्ला एजिपि दोलोनि बिजाथि चाया डेबि चेट्रि आरो बिजेपि दोलोनि बिजाथि जासमिन बेगम बिथांनि गेजेराव बुधबार मोनाब्लिनिफ्रायनो नांज्लायगासिनो दंमोन।

उनाव जाथायखौ पुलिसआ आखायाव लानो गोनां जायो आरो दसेनि थाखाय गोजोन थाहोयो होन्ना मिथिनो मोनो।

चाया डेबि चेट्रि बिथांनि मावथि सोद्रोमाफोरा बुङोदि, एजिपिनि सोद्रोमाफोरा बिथांनि न’आव थांनानै बुधबारनि मोनाब्लिआवबो गाग्लोबदोंमोन।

चाया डेबि चेट्रि बिथांआ खौरांगिरिफोरनि सिगांआव बुङोदि, कंग्रेस दोलोनि हेफाजाब होगिरिफोरा बिथांखौ बायदि बायदि राव बुंनानै बिथांनि मुंखौ सुबुंफोरनि नोजोराव गाज्रि खालामनो नाजादों। नाथाय बिथांआ सुबुंफोरनि हेफाजाबावनो देरहादों होन्ना बुंथियो।

बिथांआ बुंबावोदि, कंग्रेसनि हेफाजाब होगिरिफोरा बिथांखौ न’आव थांनानै मेगन सानानै गाग्लोबदों, बिसायखथिनि फिथाय मोनखांनायनि उनाव बिसोरो जोंनि हेफाजाब होगिरिफोरखौ गाग्लोबदों होन्ना बिथांआ बुंलाङो।

एजिपि दोलोनि हेफाजाब होगिरिफोरा बुङोदि, ओनसोलाव कंग्रेस दोलोनि “गुन्दागिरि” खुंथाया सोलिगासिनो दंमोन।