गाहाय रादाब हरखाब रादाब

धुबुरि आरो बरपेटा जिल्लाफोरा आजमलनि थाखाय हिन्दु फोथायग्राफोरा खमायलांगासिनो दं: हिमान्ट बिस्व सर्मा

धुबुरि

बरपेटा,मार्च 12: हादोरसानि खना खनला लख सभा बिसायखथिनि दुंब्रुद बारहावाया नांनायलाय आसाम हादोरसा रां बिफान्नि मंत्री हिमान्ट बिस्व सर्मा बिथांआ मंगलबाराव बुङोदि, “हादोरसानि मोन 14 लख सभा बियाबफोरनि गेजेराव भारतीय जनता पार्टी राजखान्थि दोलोआ गासै मोन 12-12 बियाबफोराव देरहासार जानो हागोन मानोना धुबुरि आरो बरपेटा जिल्लाफोराव हिन्दु फोथायग्राफोरा खमायलांगासिनो दं”।

धुबुरि आरो बरपेटा बे मोन्नै जिल्लाफोराव जोंहा लोरबां, बेफोर मोन्नै जिल्लाफोराव हिन्दु फोथायग्राफोरनि सुबुं सानखोआ जोबोद गोख्रैयै सोलायलांगासिनो दं” होन्ना बिथांआ खौरांगिरिफोरनि सिगांआव बुङो।

 “हादोरनि हारिमुखौ रैखाथि होनो थाखाय जों गोख्रोङै बिजेपि दोलोजों गसंथागोन, बरपेटा आरो धुबुरि जिल्लाफोराव देरहासारनो थाखाय जों जोंनि थाखोआव हानायमानि नाजागोन” होन्ना बिथांआ बुंबावो।

बरपेटा आरो धुबुरि जिल्लाखौ मुस्लिम स्तान खालामनायनि थाखाय ऑल इंन्डीया इउनाइटेड डेमक्रेटिक फ्रन्ट राजखान्थि दोलोनि गाहाय बाद्रुद्दिन आजमल बिथांखौ हिमान्ट बिस्व सर्मा बिथांआ गोख्रोङै सोंखारियो।

मखनो गोनांदि, आसाम हादोरसानि फैगौ लख सभा बिसायखथिखौ एफ्रिल दाननि 11, 18  आरो 23 अक्ट’आव मोनथाम बाहागोआव बोखावनानै खुंफुंगोन आरो हादोरनि गुबुन गुबुन हादोरसाफोरजों लोगोसे फैगौ मई दान्नि 23 अक्ट’ खालारआव भट होनायनि जौखोन्दोखौ सानगोन।

* गिबि थाखो: 11 एप्रिल
* नैथि थाखो: 18 एप्रिल
* थामथि थाखो 23 एफ्रिल
* हादोरसायाव गासै 2,17,60,604 भट सोगिरिफोर दं।

एप्रिल दाननि 11 खालारखालि भट होनायनि गिबि थाखोनि सानाव आसाम हादोरसानि दिब्रुगड़, लक्किमपुर, जरहात, तेजपुर आरो कलियाबर गासै मोनबा बियाबफोराव खुंफुंजागोन। 18 एप्रिल खालरखालि भट होनायनि नैथि थाखोआव गुबुन गुबुन मोनबा बियाबफोर फारियै- करिमगन्ज, सिलचर, गावखुंथाय जिल्ला (दिपु), मंगलदै आरो नगांव बियाबफोराव खुंफुंगोन आरो 23 एप्रिल खालखालि भट होनायनि थामथि थाखोआव धुबुरि, क’कराझार, बरपेटा आरो गुवाहाटी बियाबफोरा खुंफुंजागोन।

Also Read: गाहाय रादाब