नखर बिफान्नि मंत्री राजनात सिंहआ सा-सान्जा ओनसोलनि गिबि मंत्रीफोरखौ थाबैनो लोगो हमगोन
गुवाहाटी,जानुवारि 11: नोगोरारि सोदांनाय बिल 2016 खौ लानानै आसाम आरो सान्जा ओनसोलफोराव सोलिफुबाय थानाय दुंहाव थासारिफोरखौ नायनानै मिरु सरकारनि नखर बिफान्नि मंत्री राजनात सिंह बिथांआ आसाम, मेघालया आरो ट्रिपुरा हादरसाफोरनि गिबि मंत्रीफोरखौ थाबैनो लोगो हमनानै बिथांमोनजों सावरायगोन होन्ना फोसावो। नखर मंत्री बिथांआ बे सावरायनायनि गेजेरजों नोगोरारि सोदांनाय बिल 2016 (CAB) आरो हादोरसानि सुबुंफोरनि लुबैनायफोरखौ बुजिनो नाजागोन होन्ना मिथिनो मोनो। सा-सान्जा ओनसोलनि दुंहाव थासारिखौ नोजोर होनानै बे बाथ्राखौ बिथांआ राज्य’ सभानि जथुमायाव बुधबारखालि बुङो।
मखनो गोनांदि, लख सभानि जथुमायाव थिसनखांनायनि सासे उनाव बुधबारखालि राज्य’ सभानि जथुमायाव नोगोरारि बिल 2016 खौ थिसनो। नाथाय जेब्ला लख सभानि जथुमायाव थिसनदोंमोन अब्ला आसाम हादाबसानि थागिरि सुबुंफोरा ओंखारबोनानै बिलनि बेरेखा धर्ना होयो आरो दुंहाव थासारि सोमजिनो हमो।
सा-सान्जा ओनसोलफोराव दुंहाव थासिरि सोमजिनायखौ हमथानो हायै जानायलाय लख सभानि जथुमायाव बिलखौ फोसावदोंब्लाबो राज्य’ सबानि जथुमायाव हमथानानै लाखिनो गोनां जायो आरो दासिमबो जेबो थांखि लानो हायै जायो।
सिंह बिथांआ राज्य’ सभानि जथुमायाव थानाय MP फोरनि सिगांव बुंदोंमोनदि, आसाम, ट्रिपुरा आरो मेघालया हादोरसाफोराव दुंहाव थासारि सोमजिदों आरो गोजोन गोयै जादों, नाथाय बिथांआ दाजाबदेरोदि, बिलखौ बेरेखा खालामगिरिफोरा धर्ना होदोंब्लाबो फारफ्रोमबो बिथिंआव कन्ट्रल आव दं।
बिथांआ बुंबावोदि, “आं हाउसआव मिथिहोनो सानोदि, जों सा-सान्जा ओनसोलफोराव थानाय सुबुंफोरनि सिनायथि आरो हारिमुखौ रैखाथि होगोन....। जों सा-सान्जा ओनसोलफोराव गोजोनखौ लुबैयो आरो जों हादोरसा सरकारनि गिबि मंत्रीफोरजों सावरायगासिनो दं। जों सिनायथि आरो हारिमुखौ रैखाथि होनायजों लोगोसे मोनफ्रोमबो जेंनाफोरखौ सुस्रांनो थाखाय गोख्रों राहा लागोन”।
मंत्री बिथांआ बुंबावोदि, नोगोरारि सोदांनाय बिल 2016 आ सोदांजायोब्ला भारत हादोरनि साखाथिआव थानाय बांग्लादेस, पाकिस्तान आरो आपगानिस्तान हादोरफोरनिफ्राय गुबुन गुबुन समाव फैनाय मुस्लिम नङै सुबुंफोरा थामोन्था आरो रैखाथि जागोन। बिथांआ बेखौबो मिथिहोयोबिल नोगोरारि बिल 2016 आ आसाम हादोरसानि थाखायल’ नङा, नाथाय गासै भारत हादोरनि थाखायनो।
