गाहाय रादाब

बीटीसी खुंथाया 17थि बड’लेन्ड सानखौ फालिनो साखाफारा जागासिनो दं

खुंथाया

क’कराझार,फेब्रुवारि 8: बीटीसी सेक्रेटारियेतनि साखाथिआव थानाय सोमखोर फोथाराव फैगौ 10 फेब्रुवारि अक्टआव बीटीसी खुंथाया 17थि बड’लेन्ड सानखौ फालिनो थाखाय साखाफारा जानाया गोख्रोङै सोलिफुगासिनो दं। बे एखे जायगायावनो बड’लेन्ड पिपल्स प्रन्ट राजखान्थि दोलोआ फैगौ 8 आरो 9 फेबरुवारि अक्टआव थाम बोसोरारि 4थि जथुमाखौ खुंफुंगोन होन्ना मिथिनो मोन्नाय जायो।

बीटीसी खुंथायनि गाहाय हाग्रामा महिलारि बिथांआ खौरांगिरिनि सिगांआव बुङोदि, 10 फेब्रुवारिआव बीटीसी खुंथाया 17थि बड’लेन्ड सानखौ गाजागोमजायै खुंफुंनो थाखाय आखायाव लादों, जाय हाबाफारिआव बीटीसी ओनसोलनि सुबुंफोरजों लोगोसे बीटीसीनि बाहेरायाव थानाय बर’फोरखौ लाफानानै गासै 2 लाख सुबुंफोरा बाहागो लागोन। हादोरसानि गिबि मंत्री सर्बानन्द सनवाल बिथांआ गाहाय आलासि महरै नुजाथिगोन आरो रां बिफान्नि मंत्री हिमान्त बिस्व सर्मा बिथांआबो माननिनां आलासि महरै नुजाथिगोन होन्ना बिथां महिलारिआ बुंबावो।

बिथांआ मिथिहोबावोदि, बीटीसी खुंथाया फैगौ 8 आरो 9 फेब्रुवारि आव 4थि थाम बोसोरारि जथुमाखौ खुंफुंगोन, जाय जथुमायाव बीटीसी खुंथायनि सिङाव थानाय जिल्लाफोरजों लोगोसे बीटीसी खुंथायनि बाहेरायाव थानाय गासै 15 रोजासो आलासि एबा डिलिगेतफोरा नुजाथिगोन।

हादोरसानि बाजेतनि सोमोन्दै सोंथि सोंनायाव बिथांआ फिन्नाय होयोदि, सोलिफु बोसोरनि बाजेतआ मोजांआनो, गुबुनथिं मा जादों मिथिनो मोना नाथाय देग्लायनि बाजेतआ मोजां जादों आरो सुबुंफोरनि लुबैनायबादि बाजेत जादों होन्ना बिथांआ बाजेतखौ बाखोनायो। बीटीसी खुंथाया गासै 1000 कौटी रां दाबि खालामनायनिफ्राय गासै 350 कौटी रां मोननो हागोन।

बीपिएफ दोलोआ फैगौ लख सभा बिसायखथिआव क’कराझार बियाबआव मुं थिसनगोन, मंगलदै बियाबखौ बिजेपि नङाब्ला एजिपि दोलोनो हगारनानै होनो हागौ। बीटीसी हालामआव एजिपि-बिजेपि आरो बिपिएफ दोलोनि गोरोबथाया मोजाङैनो सोलिगासिनो दं होन्ना बिथांआ बुङो। बिजेपि आरो एजिपि मोन्नैबो दोलोनि हेफाजाब होगिरिफोरा बिपिएफ दोलोखौ हेफाजाब होगोन होन्ना बिथांआ बुंनानै क’कराझारनि एम पि हिरा सरनियाया जेबो नङा नाथाय गुबैयै उर्काव गोरानि दोलो एबा एबसुजों नांगोन एबा जुजिलायगोन होन्ना बिथांआ रोखायै बुङो।