हादोरसायाव बांग्लादेसि जेंनाखौ लानानै मिरु सरकारनि मावथांखिखौ ए.जि.पि. दोलोआ गनाया

गुवाहाटी,सेप्तेम्बर 1: हादोरसा राजखान्थि हान्जा एजिपिआ हादर गोजौ बिजिरसालिनि मावथांखि बादियै आसाम हादोरसायाव 10 जौखोन्दो एन.आर.चीनि जोबथा फारिलाइआव थानायफोरखौ गोदानै नायबिजिरफिन्नो मावथांखि लानायखौ हेपाजाब होनानै मिरु सरकारनि मावथांखि बादियै हादोरसायाव आयेन बेरेखायै थाफैनाय बांग्लादेसिफोरनो गोलाव समनि थाखाय भिसा (VISA) होनो नागिरनायखौ माब्लाबाबो गनायनानै लाया होन्ना मिथिहोयो।

सुक्रबाराव गुवाहाटी नोगोरमानि आमबारिआव जानाय एजिपिनि जथुमायाव आफादनि आफादगिरि आरो मनट्री अटुल बरा बिथांआ मिथिहोयो। बे मेलाव दानि मावफुबाय थानाय आफादगिरि आरो मनट्री केसब महन्ट, मनट्री पानि भुसान चौदरि, बारग गिबि मनट्री प्रफुल्ल कुमार महन्ट आरो गोबां हान्जानि दैदेनगिरि बिथांमोनहा बाहागो लादोंमोन।

बिथांमोनहा आसामनि जेनाफोरखौ नोजोर होनानै, आयेन बेरेखायै थाफैनाय गुबुनारिफोरखौ दोन्नो थाखाय मिरु सरकारा गोलाव समनि भिसा होनो नागिरनाय आरो नोगोरारि सादांनाय बिल 2016 खौ गोख्रों बेरेखा खालामो। फैगौ गोजां बोथोरनि पारलियामेन्टआव जानो गोनां मेलाव माखासे ओनसोलफोरनि गुबुन गुबुन दोलोफोरखौ लाफानानै बेरेखा खालामना नारसिन्नो मावथांखि लायो।