बंगाइगांव,फेब्रुवारि 15: आसामनि गुबुन गुबुन जिल्लाफोरजों लोगोसे बंगाइगांव जिल्लायावबो दुलाराय कछ राजबंसि फरायसा आफादआ सेडियुल ट्रायब एबा ट्रायबेल बिमुंनि दाबि खालामनानै ब्रिहस्पथिबाराव हादोरनि गाहाय मंत्री नारेन्ड्र मोडी आरो हादोरसानि गिबि मंत्री सर्बानन्द सनवाल बिथांमोनि मुसुखा बानायनानै सावदों।
धर्ना होगिरि बिथांमोनहा थांनाय राज्य’ सभानि जोबथा जथुमायाव सेडियुल ट्रायब ऑर्डार (एमेन्डमेन्ट) बिल 2019 खौ थिसनैलाय नेशनेल डेमक्रेटिक एलाइन्सनि लोगो भारतीय’ जनता पार्टी राजखान्थि दोलोआ आसाम हादोरसानि मोन 6 हारिसाफोरखौ बिमा बाथुलनि नोजोरजों नायदों होन्ना सोंखारियो।
मखनो गोनांदि, मिरु सरकारनि मावफारिया बादियै आसाम हादोरसायाव थानाय मोन 6 गोजौ थाखोनि आरो गोबां सुबुं सानखो थानाय हारिसाफोरखौ ट्रायबेल बिमुंनि गनायथि होनो थाखाय नखर मंत्री राजनात सिंह बिथांआ थांनाय 9 जानुवारिआव राज्य सभानि जथुमायाव सेडियल ट्रायब ऑर्डार (एमेन्डमेन्ट) बिल 2019 खौ लाबोदोंमोन। नाथाय थांनाय 13 फेब्रुवारि 2019 आव जेब्ला राज्य’ सभानि जोबथा जथुमा जायो, अब्ला जेंना गोनां बिलखौ राज्य’ सभानि टेबोलाव होनानै सावरायासै।
बंगाइगांव जिल्ला दुलाराय कछ राजबंसि फरायसा आफादनि दैदेनगिरि बिथांआ बुङोदि, “थांनाय 2014 माइथायाव लख सभा बिसायखथिनि सिगां खोथा होनाय बादियै सरकारा जेबो मावफुङाखै, बिथांमोनहा मोनफ्रोमबो खामानिआव फेलें जादों आरो आसामनि मोन 6 हारिसाफोरनि फारसे जोबो नोजोर होआखै”।
आसाम हादोरसायाव थानाय मोन 6 हारिसाफोरा जाबाय फारियै, मरान, मटक, टाय अहम, चुतीया, कछ राजबंसि आरो टी ट्रायब एबा आडिवासि।
फारसेथिं मिरु बर’ फरायसा आफादनि आफादगिरि प्रमद बर’ बिथांआ बुंदोंमोनदि, जुदि आसामनि मोंन 6 गोजौ थाखोनि आरो गोबां सुबुं सानखो थानाय हारिसाफोरनो ट्रायबेल बिमुंनि गनायथि होगोन अब्ला हादोरसायाव थाखानाय ट्रायबेल माहारिफोरा खहा जागोन।
थांनाय 8 जानुवारिआवबो आडिवासि फरायसा आफादआ मार्गेरितानि 38 नं राजा लामायावबो आडिवासि सुबुंफोरनो सेडियुल ट्रायब बिमुंनि दाबि खालामनानै धर्ना होनाय हाबाफारि लानानै धर्ना होदोंमोन। बिथांमोनहा बुंदोंदि, आसाम हादोरसायाव थानाय आडिवासि सुबुंफोरनि ST दाबिनाया गोबाव सम जालांनाय मोनसे दाबि।
