गुवाहाटी,फेब्रुवारि 19: बड’लेन्ड हालामाव थानाय सिरां जिल्लानि 64 कि:ग्रा लेरथायनि गोख्रों बक्सिं गेलेगिरि पैलाव बसुमतारि बिथांआ बुलगारिया हादोरनि सुपिया नोगोरमायाव जानाय हादोरनांआरि 70थि Strandja Memorial Boxing गेलेनाय बादायज्लायनायाव समबारखालि बाहागो लाहैना गेलेनानै ब्रन्जनि मेडेल मोन्नो हायो।
पैलाव बसुमथारि बिथांआ इथालि हादोरनि बक्सिं गेलेगिरि भेलेन्तिना एलबार्टीजों 5-0 आव जेन्नो गोनां जायो, जायनि थाखाय बिथांआ सनानि मेडेलखौ मोन्नो हायासै।
मखनो गोनांदि, फैलाव बसुमथारि बिथांआ सिरां जिल्लानि सिङाव थानाय फिसा गामिआव जोनोम मोनदोंमोन। बिथांआ बक्सिं गेलेनायाव गोसो गुदुं सासे आयजो, जाय बिथांआ क’कराझाराव थानाय स्पर्ट औटरिटी अव इंन्डीया (SAI) आव थानानै सोलोंबोदों आरो गेलेबोदों। बिथांआ थांनाय 2011 माइथायनिफ्राय हादोरनांआरि गेलेनायाव बाहागो लानो खाबु मोनबोदों आरो टुर्कि हादोराव जानाय World Boxing Championship आव बाहागो लानानै ब्रनेजनि मेडेलखौबो मोन्नो हादोंमोन।
बिथांआ सिगां सेरबिया हादोराव जानाय 5थि AIBA Nations Cup बक्सिं गेलेनाय बादायज्लायनायाव सनानि मेडेलखौबो मोनखांबाय।
थांनाय 2015 माइथायावबो सिन (China) हादोरनि उलांचाबु आव जानाय Asian Confederation Women Boxing Championships आवबो बिथांआ ब्रन्जनि मेडेलखौ मोन्नो हादोंमोन। बसुमथारि बिथांआरो सिन हादोरजों गेलेनानै देरहानो हानाय 6थि बक्सिं गेलेगिरि आयजो।
फारसेथिं आसाम हादोरनिनो गुबुन सासे आयजो 69 कि:ग्रा लेरथायनि बक्सिं गेलेगिरि लावलिना बरगहाइन बिथांआबो बुलगारिया हादोरनि सपिया नोगोमायाव जानाय 70थि Strandja Memorial Boxing गेलेनाय बादायज्लायनायाव समबारखालि गेलेनानै ब्रन्जनि मेडेल मोन्नो हायो।
लावलिना बरगहाइन बिथांआ टाइपेयी हादोरनि नाइन-चिन चेन बिथांजों गेलेनानै 1-4 आव जेन्नो गोनां जायो आरो ब्रन्जनि मेडेलखौ मोन्नो हायो। थांनाय रबिबारखालि कुवार्टार फाइनाल गेलेनायाव लावलिना बरगहाइन बिथांआ ब्राजिल हादोरनि बक्सिं गेलेगिरि स्वारेस बियेट्रिस बिथांखौ 5-0 आव फेजेन्नो हादोंमोन।
लावलिना बरगहाइन बिथांआ गोदान दिल्लाआव खुंफुंजानाय 2018 AIBA World Women Boxing Championships आव गेलेनानै ब्रन्जनि मेडेलखौ मोन्नो हादोंमोन आरो आसाम हादोरसाखौ मुं लाखिदोंमोन। 21 बोसोर बैसोनि लावलिना बरगहाइन बिथांआ गलाघात जिल्लानि सासे गोख्रों गेलेगिरि।
