क’कराझार,फेब्रुवारि 8: बर’ हारिनि राव, हारिमु आरो माहारिनि सिनायथिखौ फोथांनानै लाखिनो जुजिनानै गाइसंजानाय बड’फा नेशनेल एकाडेमी (इउ.एन.ए) नि फोर्बोआ थांनाय 3 फेब्रुवारिखालि मोनसे रंगिना संगिना हारिमु हान्जा दिन्थिना गिदिंनायनि गेजेरजों जोबनानै थांबाय। हारिमु हान्जा दिन्थिनायनि गुबै थांखिआनो जादों-हारिमु लाखिनायाव गांजों गावनि गोरोबथि लाखिनाय आरो मोनफ्रोमबो माहारिनि हारिमुखौ मान होनाय।
बड’फा नेशनेल एकाडेमीनि सान स्निनि थाखाय उनए फोर्बो फालिनायखौ थांनाय 28 जानुवारिनिफ्राय फालिनाय जादोंमोन। गिबि फालिनाय सानखालि इउ.एन बोर्डनि फासिगिरि एबा बार्ग राज्य’ सभानि एम.पि उर्काव गोरा ब्रम्हआ बड’फानि मुसुकायाव गिबि बिबार बावजेन्नायजों लोगोसे फरायसालिनि फिरफिलाखौ फरायसाफोरनि मान होनायजों लोगोसे उराय होयो। बे गिबि सानाव फरायसाफोरा गावसोरनि रोंगौथिनि गेजेरजों थांनाय 28 जानुवारि सुबुं सानाव बाहागो लानाय पेरेड गेलेनाय आरो हारिमु मोसानायखौ फोरोंगिरि आरो बिमा बिफाफोरनि सिगांआव दिन्थियो।
2003 माइथायाव जोनोम मोन्नाय बड’फा नेशनेल एकाडेमी फरायसालिआ दिनैसिम आसामनि मोन 13 जिल्लाफोराव गासै गं 80 निबो बांसिन फरायसालिफोर गाइसंजाबाय आरो बैफोर फरायसालिफोरा क’कराझार आव थानाय इउ.एन.एकाडेमी बोर्डनि खान्थिफोरजोंनो सोलिगासिनो दं। इउ.एन. एकाडेमी फरायसालिखौ गाइसंनायनि गिबि थांखिनो जादों बर’फोरा सोलोंथाय बिथिंआव गोग्लैसोनानै थालांनो नागिरनायखौ बोखांनाय आरो बर’ रावखौ माहारियाव मोनसे गोरोमसा राव हिसाबै फोथांनानै लाखिनाय होन्नानै इउ.एन.एकाडेमीनि बिथोनगिरि मुस्रि क्रिस्न गोपाल बसुमथारिआ फोरमायो। बे फरायसालिआ गाइसंजेन्नायनिफ्रायनो राज्यो राजानि गोबां हेफाजाब मोनबोदों आरो दा बे इउ.एन.एकाडेमीया बिथरायनिफ्राय लानानै पि.जि.सिम सोलोंथाय होबाय। इनए फोर्बो फालिनाया दा गिबि, गेजेर, गोजौ एबा हाइयार चेकेन्डरी आरो फरायसालिमा आरो पि.जि सोलोंसालिफोराव इउ.एन.ए एबा उने फोर्बो महरै बे बोसोरनिफ्राय फालिनो आखायाव लादों। बे फोर्बोआव उन्दै गथ’साफोरनिफ्राय लानानै कॉलेजसिम बायदि रोखोमनि बादायनाय, मोसानाय, खन्नाय, दामनाय-देनाय, खन्थाय आवरायनाय, गेलेनाय थागोन होन्नानै बसुमथारि बिथांआ फोरमायबावो।
