उदखारि दोलोनि जोबथा गोरोन्थि, दायनिगिरिआ खहा जानायखौ सुफुंनांगौ: नारेन्ड्र मोडी

उदखारि दोलोनि जोबथा गोरोन्थि, दायनिगिरिआ खहा जानायखौ सुफुंनांगौ: नारेन्ड्र मोडी

गोदान दिल्ली,फेब्रुवारि 16: हादोरनि गाहाय मंत्री नारेन्ड्र मोडी बिथांआ जम्मु आरो काश्मीरनि पुलवामा जिल्लायाव बमा बेरनाय जाथायखौ नोजोर होनानै सुक्रबाराव बुङोदि, उदखारि हान्जाया सीआरपीएफनि सा 49 सोद्रोमाफोरखौ बमा होनानै जिउ फोजोबनाया गेदेरथार गोरोन्थि मावबाय, दायनिगिरिया बेनि खहा जानायखौ गासैबो रुजुन्नानै लानांगौ आरो होनांमगौ।

बे बाथ्राखौ जेब्ला पाकिस्तान हादोराव जोनोम मोन्नाय जाइस-इ-महामद (JEM) उदखारि दोलोआ पुलवामा जिल्लायाव ब्रिहस्पथिबारखालि गोहोगोरा आइ ई डि बमा बेरहोनाय जाथायजों लोब्बा दं होन्ना सिमान जादोंमोन अब्ला हादोरनि गाहाय मंत्री नारेन्ड्र मोडी बिथांआ बुङो।

“जों रौनिया हान्जाफोरखौ उदां खालामनानै होबाय, हादोर रैखाथि खालामनायाव जोंहा बिथांमोनि सायाव फोथायनाय दं”होन्ना मोडी बिथांआ जेब्ला गोदान दिल्लीआव थानाय रेल स्तेसनाव हादोरावनो बानायजानाय इंन्जिन गोयै रेल गारि जाय गारिखौ “ट्रेन 18” होन्नानै बुंदोंमोन नाथाय“भन्डे भारत एक्सफ्रेस”होन्ना फोसावफिनदों बे गारिखौ बेखेवनानै होनाय हाबाफारिआव बिथांआ बुङो।

मोडी बिथांआ बुंबावोदि, “उदखारि हान्जा आरो जाय बिथांमोनहा उदखारिफोरखौ थानो जायगा होगासिनो दं, बिथांमोनहानो दायनिगिरि, आरो जोबोद गेदेर गोरोन्थि मावबाय, बेनि थाखाय बिथांमोनहानो खहा जालांनायखौ सुफुंनांगौ”

नारेन्ड्र मोडि बिथांआ खोथा होयोदि, जाय बिथांमोनहा जाथायजों लोब्बा दं, गावसोरनि गोरोन्थिनि थाखाय बिथांमोनहा आयेन बादियै गोख्रों साजा मोन्नायनिफ्राय बारगनो हानाय नङा।

पाकिस्तान हादोरनि मुंखौ मख’आ लासे मोडी बिथांआ बुङोदि, “जोंनि हादोरनि साखाथिआव थानाय हादोर, जाय हादोरा बुहुमनि हादोरफोरजों बैखत खालामजानाय, बे हादोरा भारत हादोरखौ बेबादिनो गावसोरनि गोरोन्थि सान्जायजों फोजोबस्रांनो सानदोंब्ला बेयो मोनसे बेसेबा गेदेर गोरोन्थि।

हादोर रैखाथिखौ लानानै केबिनेटनि जथुमायाव पातिस्तान हादोरखौ Most Favoured Nation (MFN) नि पारिलाइनिफ्राय बोख्लायनो मावथांखि लाखानांनै बे बाथ्राखौ मोडी बिथांआ बुङो। थांनाय 1996 माइथायाव भारत हादोरा खाथिनि पाकिस्तान हादोरखौ MFN नि फारिलाइआव दोनदोंमोन।

पुलवामा बमा बेरहोनाय जाथायखौ लानानै गुबुन गुबुन राजखान्थि दोलोफोरखौ राजखान्थि गेलेनायनिफ्राय जानगाराव थानो खावलायो। “बे समआ जोबद गोनां आरो दुखुनांथाव, जों साफ्रोमबो राजखान्थि गेलेनायनिफ्राय जानगाराव थानांगौ, हादोरनि बेरेखाफोरनि हेंथायै जों खौसे गसंथानांगौ” होन्ना बिथां मोडीआ बुङो।

गाहाय मंत्री बिथांआ भारत हादोरनि जानानै गुबुन गुबुन हादोरफोरनि दुखु फोरमायहरनाय आरो हेफाजाब होनायफोरखौ साबायखर होयो। बे जाथायनि गोख्रों फिन्नायखौ होगोन होन्ना बिथांआ बुंबावो।

“जेब्ला मोनफ्रोमबो हादोरफोरा उदखारिफोरनि बेरेखा नांगोन, अब्ला उदखार खालामनायफोरखौ फोजोबनो हागोन, रौनिया हान्जानि सोद्रोमाफोरा गावसोरनि आगोमा जिउखौ हादोरनि थाखाय बावलांबाय, आं साफ्रोमखोबो मिथिहोयोदि, दायनिगिरिखौ आयेनाव लाबोनो थाखाय गोख्रों राहा लानाय जागोन” बिथांआ बुंबावो।

Related Stories

No stories found.
logo
Sentinal Assam
bodo.sentinelassam.com