जुदि नोगोरारि बिलखौ सोदांगोन अब्ला सा-सान्जा ओनसोलफोराव जेंना नुनो मोनगोन: सा-सान्जा फरायसा आफाद

जुदि नोगोरारि बिलखौ सोदांगोन अब्ला सा-सान्जा ओनसोलफोराव जेंना नुनो मोनगोन: सा-सान्जा फरायसा आफाद

गुवाहाटी,फेब्रुरुवारि 9: हादोरनि गाहाय मंत्री नारेन्ड्र मोडी बिथांआ सा-सान्जा ओनसोलफोराव थानाय आसाम, अरुनाछल प्रदेस आरो त्रिपुरा हादोरसाफोराव दावबायफैनायखौ नोजोर होनानै सा-सान्जा फरायसा आफादआ जेंना गोनां नोगोरारि (सोदांनाय) बिलखौ नोजोर होनानै बुङोदि, जुदि नोगोरारि बिल 2016 खौ मिरु सरकारआ राज्य’ सभायाव सोदांगोन अब्ला गासै सान्जा ओनसोलफोराव दुंहाव थासारिफोरखौ नुनो मोनगोन।

सा-सान्जा फरायसा आफादआ बुङोदि, जुदि मिरु सरकारा जेंना गोनां नोगोरारि बिलखौ सोदांनानै आयेन दाफुंगोन आब्ला सा-सान्जा ओनसोलनि सुबुंफोरफोरखौ गोथौ हाखराव खोख्लैनानै दोनगोन आरो थागिबि सुबुंफोरा 2थि थाखोनि सुबुं हिसाबै मान मोनगोन। बेनि थाखाय मिरु सरकारा दायनिगिर जालांगोन।

सुक्रबारनि मोनाब्लिआव सा-सान्जा फरायसा आफादनि गाहाय सामुयेल बि जयरुवा, गाहाय नेहाथारि सिनाम प्रकास सिंह आरो बोसोनगिरि ड: सामुज्जल बाटाचार्य बिथांमोनहा रादाब बिबुंसारनि गेजेरजों फोसावोदि, सा-सान्जा ओनसोलफोराव थानाय गुबुन गुबुन थागिबि सुबुंफोरनि आफादफोरजों लोगोसे माखासे हादोरसाफोरनि खुंथायफोरा जेंना गोनां बिलखौ हेंथा खालामदोंब्लाबो मिरु सरकारा बोलो होनानै आरो ब्रा ब्रायै लख सभानि जथुमायाव सोदांदों।

सा-सान्जा ओनसोलफोराव थानाय थागिबि सुबुंफोरखौ भारत सरकारादि राजखान्थिआरि बिथिंआव नाथ्रोदनानै दोनो बेयो मोनसे बिदिन्थि आरो बे खामानिखौ मावफुंनायनि खामानिआनो जाबाय सा-सान्जा ओनसोलफोरनि थागिबि सुबुंफोरनि जोखौन्दोखौ खमायहोनानै गावनि हायावनो माइनरिटि खालामहोनो मिरु सरकरानि गोसो जानानै मावनाय मोनसे खामानि होन्ना रादाब बिबुंसारनि गेजेरजों बुङो।

सा-सान्जा फरायसा आफादनि गाहाय नेहाथारि सिनाम प्रकास सिंह बिथांआ बुङोदि, सा-सान्जा फरायसा आफाद (NESO) आ रोखायै हादोरनि गाहाय मंत्री नारेन्ड्र मोडी आरो मिरु सरकारखौ मिथिहोनो लुबैयोदि- नोगोरारि बिल 2016 खौ सा-सान्जा ओनसोलाव थानाय थागिबि सुबुंफोरा माब्लाबाबो गनायनानै लाया आरो राज्य’ सभायाव सोदांनायनि सिगांनो बोख्लायनानै लानांगौ होन्ना बुंबावो।

फारसेथिं दुलाराय आसाम फरायसा आफाद आरो मोन 30 गुबुन गुबुन आफादफोरा हादोरसानि दाब दाब जायगाफोराव सुक्रबारखालि नोगोरा बिल 2016 खौ हेंथा खालामनानै धर्ना होनानै बिलनि माखासे बिलाइफोरखौ सावदों। बिथांमोनहा दिनै फुंनिफ्रायनो गोबां जायगा आरो गामिफोराव गोसोम सि आरोगोसोम बेलुन लानानै हादोरनि गाहाय मंत्री नारेन्ड्र मोडी बिथांनि मुसुखा सावनायखौ नुनो मोन्नाय जादों।

“थांनाय 2014 माइथायाव बिसायखथिनि सिगां गाहाय मंत्री बिथांआ बांग्लादेसिफोरखौ हादोरनिफ्राय बोखारगोन होन्नानै बुंनाया दा उल्थासो बांग्लादोसिफोरखौ बरायनो थाखाय आयेन दाफुंनो नागिरदों, बेयो जोबोद दुखुनांथाव” होन्नानै दुलाराय आसाम फरायसा आफादनि आफादगिरि दिपांक कुमार नात बिथांआ बुङो। नोगोरारि सोदांनाय बिलआ आसाम हादोरसानि थागिबि सुबुंफोरखौल’ 2थि थाखोनि सुबुं खालामनो थाखाय नङा, नाथाय भारत संबिजिरनि बेरेखा आरो आसाम गोरोबथानि बेरेखा होन्ना बिथांआ बुङो। जुदि नारेन्ड्र मोडी बिथांआ आसामनि थागिबि सुबुंफोरनि सायाव सान्नाय दं आरो रैखाथि होनो सानदोंब्ला जेराखिजाया नोगोरारि सोदांनाय बिल 2016 खौ बोखारनांगौ होन्ना नात बिथांआ दाबि खालामबावो।

धोरोमखौ लानानै बांग्लादेसिफोरखौ नाख्रेबनो नाङा होन्नानै दुलाराय आसाम फरायसा आफादआ हादोरनि गाहाय मंत्री नारेन्ड्र मोडी बिथांखौ खावलायबावो।

Related Stories

No stories found.
logo
Sentinal Assam
bodo.sentinelassam.com