गुवाहाटी,अक्टबर 1: आसामाव थानाय गुबुन गुबुन ट्राइबेल आफादफोरनि कर्डिनेशन खमितिआ माखासे ट्राइबेल बेल्टफोरखौ बुजाबनानै Assam State Capital Region Development Authority 2017 (ASCRDA 2017) नि मावथांखि बादियै आसाम सरकारा जौगाखां खामानि मावनो नागिरनायनि बेरेखा गोख्रोङै अजद होदों।
बावैसो नोगोरमायाव जालांनाय ट्राइबेल कर्डिनेशन खमितिनि मोलआव सावरायनानै थांखि लायोदि, भारत संबिजिरनि आसामाव थानाय 6थि दफाफोराव गोग्लैनाय जायगाफोर फारियै मिसिं, टिवा, आरो राभा Autonomous Council फोरजों लोगोसे गुबुन गुबुन ट्राइबेल बेल्ट आरो ब्लकखौ ASCRDA 2017 आव दाजाबदेरनो मोना होन्ना बिथांमोनहा अजद होनो थिरांथा लायो। लोगोसे बिथांमोनहा बे मेलनि गेजेरजों थांखि लायोदि, साफ्रोमबो ट्राइबेल बेल्ट आरो ब्लकआव सिमा बारनानै थानाय आरो नोगोरारि नङै सुबुंफोरखौ बोखार नांगौ होन्ना थांखि लाबावो।
बिथांमोनहा बुंबावोदि, Forest Right Recognation Act 2006 नि आयेन बादियै साफ्रोमबो हाग्रा ओनसोलाव थानाय ट्रायबेल सुबुंफोरा हा मोन्थायखौ मोन्नांगौ होन्ना दाबि दैखांबावो।
रावखौ लानानै बिथांमोनहा मेलनि गेजेरजों आसाम सरकारनि खाथिआव दाबि खालामोदि, राभा, मिसिं आरो कार्बि रावखौ गुदि फरायसालिनि Lower Primary आरो Upper Primary फरायसालिफोराव सोदांनांगौ लोगोसे टिवा, देउरि आरो डिमासा रावखौ मोनसे बिमानि राव एबा MIL आयदा हिसाबै सोदांनांगौ होन्ना दाबि खालामबावो।
Assam State Capital Region Development Authority 2017 (ASCRDA 2017) खौ लानानै Indigenous Tribal Sahitya Sabha (ITSS) नि गाहाय नेहाथारि कमला कान्ट मुछाहारि बिथांआ बुङोदि, “जेब्ला आसाम सरकारा ट्राइबेल ओनसोल जौगाखांनायनि बाथ्रा रायज्लायो अब्ला बेनि गुबै थांखिखौ गुबुन नोजोरजों नायनायखौसो नुनो मोनो, गुबै थांखिखौ गुबुन धोनि फालांगिरि एबा Capitalist सुबुंफोरनो हगारना होनायखौसो नुनो मोन्नाय जायो बेफोरबादि थांखिनि थाखायनो रायज्लायनांगौ जानानै फैदों” बेनिनो बिदिन्थि बादियै गुबुन गुबुन हादोरसाफोर फारियै मध्यप्रदेश, उड़िछा, उट्टाराखान्ट, चटिसगड़, हादोराफोराव जौगाखांनायनि मुङाव गोबां बिघा ट्राइबेलनि हा-हु फोरखौ गुबुन Capitalist फोरनोसो हगारना होनायखौ नुनो मोन्नाय जादों होन्ना बिथांआ बुंबावो।
आसाम हादोरसायावबो समजों लोगोसे जौगाखांनायनि मुङाव ट्राइबेलफोरनि हा-हु फोरा गुबुननि आखायाव थांगासिनो आरो ट्राइबेलनि बिमुंआ गोमालांगासिनो दं जायनि जाहोनाव बैफोर आखुथायनि थाखायनो Assam State Capital Region Development Authority 2017 खौ बेरेखा खालामनो गोनां जादों होन्ना बिथांआ बुङो।
बे आयेनखौ सोदाङोब्ला हादोरसायाव थानाय राभा, टिवा, कार्बि, हाजं, बड’, आरो गुबुन गुबुन थागिबि सुबुंफोरनि राव, हारिमु, समाजफोरा गोमालांनायजों लोगोसे राभा आरो टिवा Autonomous Council फोरा गोमालांनायनि लामायाव थागोन होन्ना बिथां मुछाहारिआ दाजाबदेरो।
बिथांआ बुंबावोदि, 1962 माइथायाव इस्ट पाकिस्टान जायखौ दासान्दि बांग्लादोस होन्नानै मिथिनाय जायो बे हादोरनिफ्राय फैनाय गासै गं 1368 न’खरफोरनि रिफुजिफोरनो दानि बड’लैन्ड हालामाव थानाय चिरां जिल्लानि बिजनीआव गासै 11,254 बिघा ट्राइबेलनि हाखौ हगानानै होनो गोनां जादोंमोन। फिन खेबसे 1969 माइथायाव जेब्ला आसामनि राजथावनिखौ डिस्पुराव लानानै फैदोंमोन अब्ला खोला खामरुआव 1 लाख 4 रोजा ट्राइबेल बेल्ट आरो ब्लकखौ नागारनो गोनां जादोंमोन।
बेफोरनि थाखायनो ट्राइबेल आफादफोरा दानि ASCRDA 2017 खौ ट्राइबेल बेल्ट आरो ब्लकआव सोदांनायखौ बेरेखा खालामनो गोनां जादों होन्ना मुछाहारि बिथांआ बुङो।
