गोदान दिल्ली,फेब्रुवारि 13: जेंना गोनां नोगोरारि सोदांनाय बिल 2016 आ बुधबाराव राज्य’ शभानि जथुमायाव थिसनजायैलाय, असम गन फरिसद राजखान्थि दोलोनि दैदेनगिरि अथुल बरा बिथांआ आसामनि मोनफ्रोमबो हारि मारिनि फरायसा आफाद, समाजआरि आफाद आरो गुबुन दोलोफोरा खौसेयै सोमावसारनायाव हेफाजाब होनायनि थाखाय साबायखर जासियो।
मानोना 13 फेब्रुवारि 2019 आव नोगोरारि सोदांनाय बिल 2019 आ थिसनजायासै, जाय बिलखौ फैगौ लख सभानि जथुमायाव फिन खेबसे सावरायजाबावगौमोन। मिरु सरकार आव थानाय बिजेपि सरकारआ नोगोरारि सोदांनाय बिल 2016 खौ थाबैनो थिसन्नानै आयेन दाफुंनो थाखाय नाजागासिनो दंमोन।
“जों जोबोद गोजोन्नाय मोनदों, जेबो रांवजोंनो जों फोरमायनो हाया, एजिपि दोलोआ बिजेपि खुंथायजों गोरोबथायाव दंमोनब्लाबो नोगोरारि सोदांनाय बिल 2016 खौ हेंथा खालामबोबाय थादोंमोन। बिलआ जारिमिनारि आसाम एकर्ड एबा गोरोबथाखौ सिफायगोन, जें बेखौ माब्लाबाबो जाहोनो हाया, जों साफ्रोमबो सोमावसारनायाव बाहागो लानाय बिथांमोनखौ साबायखर जासियो जाय बिथांमोनहा जोंजों गसंफादोंमोन” होन्ना एजिपि दोलोनि आफादगिरि अटुल बरा बिथांआ बुङो।
“जिउ बावलांनाय मुंख्लंफोरजोंनो एजिपि दोलोआ जोनोम मोनदोंमोन, जों असमिया माहारिनि हारिमु आरो सिनायथिखौ फोथांनानै लाखिनो थाखाय एजिपि राजखान्थि दोलोखौ दाफुंदों, आसाम गोरोबथा एबा आसाम एकर्डआ एजिपि राजखान्थि दोलोनि मोन धोरोम बिजाब बादि जेरै बाइबेल, गिथा आरो कुरान” होन्नानै बिथां बराया बुंबावो।
मखनो गोनांदि नोगोरारि सोदांनाय बिल 2016 आ थांनाय 8 जानुवारि 2019 आव सोदांजादोंमोन नाथाय राज्य’ सभानि 18थि जोबथा जथुमायाव सावरायैलाय नोगोरारि सोदांनाय बिल 2019 आ आयेन दाफुंजायासै।
नोगोरारि सोदांनाय बिल 2016 खौ सोदांनानै 1955 माइथायनि नोगोरारि आयेनखौ मिरु सरकारखौ दैदेन्नाय नेशनेल डेमक्रेटिक एलाइन्स राजखान्थि दोलोआ पाकिस्तान, आपगानिस्ता आरो बांग्लादेस हादोरफोरनिफ्राय आयेन बेरेखायै थाफैनाय हिन्दु, सिक, बुद्दिस, जैयन, पार्सिस आरो क्रिस्टानफोरखौ नोगोरारि थामोन्था होनानै संबिजिरारि मोन्थायखौ होनो थांगासिनो दंमोन।
एजिपि दोलोनि दैदेनगिरि केसब महन्ट बिथांआबो गोजोनग्लायनाय मोनो आरो नोगोरारि सोदांनाय बिल 2016 खौ हेंथा खालामनायाव हेफाजाब होबोनाय साफ्रोमबो सुबुंफोरखौ साबायखर जासियो। बिथांआ मेघालया हादोरसानि गिबि मंत्री कनराद सांगमाजों लोगोसे मिजराम हादोरसानि गिबि मंत्री जरामतांगा बिथांखौबो गोख्रों हेफाजाब होबोनायनि थाखाय गोजोनग्लायनाय जासिहरो।
