गुवाहाटी,मार्च 13: एजिपि राजखान्थि दोलोनि साथाम मंत्री बिथांमोनहा नोगोरारि सोदांनाय बिल 2016 खौ हेंथा खालामनानै दान मोन्नैसो सिगां मावख’निफ्राय आखाय दैखांनाय दैखांदोंमोन आरो बिजेपि दोलोखौ हेफाजाब होनायनिफ्राय जानगाराव थादोंमोन, नाथाय हादोरसायाव बिसायखथि सफैनाय लोगो लोगो आखाय दैखांनाय लाइजामखौ बोखांनानै लाफिनबाय।
https://twitter.com/himantabiswa/status/1105734133576278016
फारसेथिं क्रिसक मुक्ति संग्राम समितिनि दैदेनगिरि अकिल गगय बिथांआ एजिपि राजखान्थि दोलोखौ बिजेपि राजखान्थि दोलोजों गोरोबलायफिन्नायनि थाखाय थगायसुला होन्ना सोंखारियो।
13 मार्च 2019 आव गगय बिथांआ एजिपि दोलोखौ सोंखारिनानै बुङोदि, एजिपि राजखान्थि दोलोआ जेंना गोनां नोगोरारि सोदांनाय बिल 2016 नि सायाव मोन्दांथिखौ रोखा खालामनानै राज्यो राजाफोरनि सिगांआव रोखा खालामनानै होनांगो।
नोगोरारि सोदांनाय बिल 2016 खौ लानानै एजिपि आरो बिजेपि दोलोनि गेजेराव गावस्राज्लायनानै दान मोन्नैनि उनाव आसाम हादोरसायाव बिसायखथि सफैनाय लोगो लोगो मोन्नैबो राजखान्थि दोलोआ लोगो जाफिनबाय।
“एजिपि आरो बिजेपिनि गेजेराव आखाय हमज्लायनाया आसामनि सुबुंफोरखौ नाथ्रोदनानै दोन्नायनि मोनसे बिदिन्थि, एजिपि दोलोआ नोगोरारि सोदांनाय बिल 2016 नि सायाव रोखा बाथ्रा बुंनांगो, एजिपि दोलोआ बिजेपि दोलोजों थाफायाब्ला देरहानो हानाय नङा होन्नानै थांनाय मोनायाव बिजेपि दोलोनि दैदेनगिरिफोरखौ लोगो हमनाय रावआ मिनिथाव, आं खोथा होयोदि, फैगौ लख सभा बिसायखथिआव क्रिसक मुक्ती संग्राम समितिआ गोख्रोङै हेफाजाब होगोन” होन्ना गगय बिथांआ खौरांगिरिफोरनि सिगांआव बुङो।
मखनो गोनांदि आसाम सरकारनि मावफारिया बादियै नोगोरारि सोदांनाय बिल 2016 खौ नारखोना होनो नागिरनायखौ हेथा खालामनानै धर्ना होनाय हाबाफारि बादियै थांनाय 7 जानुवारि अक्ट’आव एजिपि दोलोआ आसाम सरकारखौ हेफाजाब होनायनिफ्राय जानगाराव थादोंमोन। थांनाय 9 जानुवारि 2019 अक्ट’खालि हादोरसा आबाद बिफाननि मंत्री अटुल बरा, हादोरसा दै सम्पद बिफाननि मंत्री केसब महन्ट आरो आदार (Food And Civil Supply) बिफाननि मंत्री फानिभुसान छौदरि बिथांमोनहा सरकारनि मावख’निफ्राय आखाय दैखांनाय लाइजामखौ गथायदोंमोन।
