बिजेपि सरकारआ ओनसोलाव गोहोनि उखैनाय मोन्नानै आखुथाय गोयै सुबुंफोरनो ST होनो नाजादों: आदित्य’ काक्लारि

बिजेपि सरकारआ ओनसोलाव गोहोनि उखैनाय मोन्नानै आखुथाय गोयै सुबुंफोरनो ST होनो नाजादों: आदित्य’ काक्लारि

गुवाहाटी,जानुवारि 11: थांनाय गोजां बोथोरनि पारलियामेन्टनि जथुमायाव मिरु सरकारआ मावथांखि बादियै आसामनि मोन 6 गोजौ थाखोनि हारिसाफोरनो ST बिमुंनि गनायथि होनो थाखाय Constitution (Scheduled Tribes) Order (Amendment) Bill, 2019 खौ फोसावनायाव आसामनि थाखाय सेडियुल ट्रायब (ST) आरो सेडियुल ट्रायब (ST) बिमुंनि दाबि खालामग्रा एबा मोन्नैबो हान्जाया गोजोन्नाय मोनाखै।

ब्रिहस्पथिबाराव Coordination Committee of the Tribal Organizations of Assam (CCTOA) आफादनि गाहाय कर्डिनेटर आदित्य’ काक्लारि बिथांआ गुवाहाटी नोगोरमानिफ्राय खौरांगिरिफोरनि सिगांआव बुङोदि, मिरु सरकारनि बिजेपि दैदेन्नाय सरकारा ट्रायबेल सुबुंफोरनि बेरेखा, बिथांमोनहा आसामनि ट्रायबेल सुबुंफोरखौ गादबनानै दोन्नो थाखाय पारलियामेन्टनि जथुमायाव सेडियुल ट्रायबनि बिल 2019 खौ फोसावनानै होदों, ST बिलआ केबिनेटआव गनायथि मोनाखै, आरो मोन 6 हारिसाफोरा ST बिमुंनि थाखाय आखुथायबो गैया, भारत सरकारा रेजिस्तार जेनेरल अव इंन्डीया (RGI) आरो नेशनेल कॉमिसन पर सेडियुल ट्रायब (NCST) खौ बुजायनानै बिलखौ फोसावनो नाजादों, सैथो बाथ्राया जाबायदि, आसामनि मोन 6 हारिसाफोरनो ST बिमुंनि गनायथि होनो थाखाय RGI आ नायबिजिरनानै ST नि आखुथायफोर गोयैनि थाखाय खन 8 निबो बारा रेजेक खालामखांबाय, मिरु सरकारा थाबैनो बिलखौ बोखारफिन्नांगौ, बिजेपि दोलोआ दसे समनि खाबुनिथाखाय गोहोनि उखैनाय मोन्नानै राजखान्थिआरि खाबु लानो नागिरदों होन्ना बिथां काक्लारिआ बुंबावो।

मिरु सरकारनि ST बिलखौ हेंथा खालामनानै काक्लारि बिथांआ बङोदि, 11 जानुवारि सुक्रबाराव फुंनि 5 रिंगानिफ्राय बेलासेनि 5 रिंगासिम जों बिलखौ हेंथा खालामनानै 12 घन्टा आसाम बन्द’ फोसावदों, फैगौ 14 जानुवारि अक्टआव जों बिलखौ सावगोन आरो जोबनायाव गोदान दिल्लीआव बिजिरगिरि आरो हादोरनि एन्ट्रपलजिसफोरजों मेल जथुमा खुंगोन, फैगौ फेब्रुवारि दान्नि गिबि सप्तानिफ्राय बिजेपि होखार आरो आसाम रैखाथि खालाम जथुमा खुंलांगोन (Drive-BJP-away and Save-Assam)। साफ्रोमबो बिजेपि दोलोजों थानाय दैदेनगिरिफोरखौ पार्टीनिफ्राय आखाय दैखांनो थाखाय जों खावलायो। जेब्ला आसामनि गिबि मंतेरीआनो सासे सेडियुल ट्रायब हारिनि सुबुं अब्लासो बिलखौ थिसन्नानै आसाम हादोरसाखौ खैफोदआव खोख्लैनो नाजादों” होन्ना बिथांआ बुंबावो।

CCTOA नि लिंथुमगिरि आरो बर’ फरायसा आफादनि गाहाय आफादगिरि प्रमद बर’ बिथांआ बुङोदि, “जों रावनिबो हारि जौगाखांनायनि बेरेखा नङा, मिरु सरकारा मोन 6 हारिनो ST होनानै आसाम हादोरसायाव थाखानाय ST सुबुंफोरखौ खैफोदआव खोख्लैनो नागिरदों। मिरु सरकारनि खुंथायाव थानाय दोलोआ दसेल’ समनि राजखान्थिआरि खाबुनि थाखाय बे खामानिखौ मावनो सिगांदों, जों बेखौ माब्लाबाबो गनायनानै लाया आरो बेखौ दानो होआ” होन्ना बिथांआ बुंदेरो।

फारसेथिं दुलाराय आसाम कछ-राजबंसि सन्मिलनि आफादआ ST बिलखौ सोदांनो नाजादोंब्लाबो गोजोन्नाय मोनै फोरमायदों। आफादगिरि बिरेन सायकिसा बिथांआ गुवाहाटीआव खौरांगिरिफोरनि सिगांआव बुङोदि, दासिमबो बिजेपि सरकारा ST बिलखौ पारलियामोन्टआव सोदांनो हायाखै आरो हादोरसायाव दिन्दां खालामनानै दोनदों, बिथांआ बुंबावोदि, थांनाय 2014 माइथायनि लख सभा बिसायखथिनि सांग्रांथि मेलआव हादोरनि गाहाय मंत्री नारेन्ड्र मोडी बिथांआ गोहोआव फैनाय लोगो लोगो हादोरसानि मोन 6 हारिसाफोरनो 6 दान्नि गेजेरावनो ST बिमुंनि गनायथिखौ होगोन होन्ना बुंदोंमोन, नाथाय बिथांआ जेबो खामानिखौ मावफुङाखै। 4 खावसे बोसोर थांनायनि उनाव जेब्ला गोदान लख सभा बिसायखथि सौफोयो अब्लासो पारलियामेन्टनि जथुमायाव थिसनदों, जों बिलखौ जानुवारि दाननि 31 अक्टनि सिगां सोदांनो थाखाय दाबि खालामो, ST बिमुंखौ लानानै जों आरो सहायनो हाला, जुदि बे खामानिखौ मावफुङाब्ला फैगौ लख सभानि बिसायखथिआव बिजेपि दोलोनि बेरेखा धर्ना होगोन होन्ना बिथांमोनहा सरकारखौ हुमखि

सन्मलननि गाहाय बोसोनगिरि दुर्लभ चामुवा बिथांआ बुङोदि, कछ-राजबंसिफोरनो ST बिमुंनि गनायथि होनो थाखाय बेयो गिबि राजखान्थि गेलेनाय नङा। 1996 माइथायनि IK Gujral सरकारनि खुंथायाव थानाय समाव कछ-राजबंसि हारिनि सुबुंफोरखौ ST होन्नानै फोसावदोंमोन आरो दाफुंजानाय खमिटिआबो हेफाजाब होदोंमोन, नाथाय माबोरैबा उनाव बुरखांफिन्नाय जायाखैमोन। 2002 माइथायाव अटुल बिहारि भाजपेयी खुंथायाव थानाय समाव गासै 142 हारिसाफोरनो ST बिमुंनि गनायथि होदोंमोन नाथाय आसामनि मोन 6 हारिसाफोरा थालांदोंमोन, आरो बेबादिनो दानि बिजेपि सरकारा बेबादिनो खालामनो नागिरदों होन्ना बिथांआ बुङो।

फारसेथिं सन्मिलनि आफादआ CCTOA नि गाहाय आदित्य’ काक्लारि बिथांखौ मोन 6 हारिनि ST बिमुं होनायनि फारसे जेबो बुंनो मोना होन्नानै हुमखि होदों।

Related Stories

No stories found.
logo
Sentinal Assam
bodo.sentinelassam.com