बीपीएफ दोलोनि 4थि थाम बोसोरारि जथुमाया सोलिफुगासिनो दं

बीपीएफ दोलोनि 4थि थाम बोसोरारि जथुमाया सोलिफुगासिनो दं

क’कराझार,फेब्रुवारि 9: क’कराझार जिल्लानि सिङाव थानाय बड’फा नोगोर आव बड’लेन्ड पिपल्स फ्रन्ट राजखान्थि दोलोनि 4थि थाम बोसोरारि जथुमाया सुक्रबारनिफ्राय सोलिफुगासिनो दं। बेजों लोगोसेयैनो बीपीएफ दोलोनि दालाइ आफादफोर जेरै आयजो आफाद, लाइमोन आफाद, माइनरिटि चेल, बड’लेन्ड फरायसा आफादफोरनि जथुमायाबो खेबसेयैनो सोलिफुगासिनो दं।

मिरु मावफुं आफाद आरो आलासि एबा डिलिगेटनि जथुमाया बेलासेनि 5 रिंगानिफ्राय जागायदोंमोन। बीटीसीनि सिङाव थानाय गुबुन गुबुन जिल्लाफोरनि आऱो बीटीसीनि बाहेरायाव थानाय बीपीएफ दोलोनि हेफाजाब होगिरि बिथांमोनहा गासै 10 रोजासो सुबुंफोरनि नुजाथिनायखौ नुनो मोन्नाय जादोंमोन। जथुमानि हाबाफारि बादियै बीपीएफ दोलोनि आफादगिरि आरो बीटीसी खुंथायनि गाहाय हाग्रामा महिलारि बिथांआ फुंनि 8:30 रिंगायाव बीपीएफ दोलोनि फिरफिलाखौ बिरहोयो। बेनि उनाव आयजो आफाद, माउनरिटि चेल, लाइमोन आपाद आरो बिएसइउ फरायसा आफादफोरनि जथुमाखौ सुक्रबारखालि फारि फारि खुंफुंलाङो। हादोरसा दावबायारि (Tourism) बिफान्नि मंत्री आरो WPT&CB नि बिबानगिरि चन्डन ब्रम्ह, जाय बिथांआनो बीपीएफ दोलोनि लाङाइ आफादगिरि बिथांआ दिनै बड’लेन्ड मुंख्लंफोरनो बिबार बावजेनो।

बीपीएफ दोलोनि बुंथिगिर आरो राज्य’ सभानि एमपि बिस्वजित दैमारि बिथांआ सानसुनि 12 रिंगासोआव आलासिफोरनि जथुमाखौ बेखेवनानै होयो।

खौरां मोन्नाय बादिब्ला दिनै (सनिबार) बे जथुमायाव बीपीएफ दोलोनि गोजाम आफादखौ सिफाइनानै गोदान आफाद दाफुंगोन होन्ना मिथिनो मोन्नाय जायो।

मखनो गोनांदि, बीपीएफ दोलोआ बड’लेन्ड हालाव थांनाय 2005 माइथायाव गिबि बिसायखथि खुंफुंजेन्नायनिफ्रायनो गोहोआव थानानै खुंबोगासिनो दं आरो बीपीएफ दोलोखौ दाफुंजेन्नायनिफ्रायनो हाग्रामा महिलारि बिथांआ दोलोखौ दैदेनबोगासिनो दं। आथिखालाव बीपीएफ राजखान्थि दोलोआ बड’लेन्ड हालामनि मोनसे गोहोगोरा राजखान्थि हान्जा जानानै दं, जाय दोलोआ आसाम हादोरसानि खुंथायाव थानाय बिजेपि दोलोजों गोरोबथायाव दं। थांनाय 15 बोसोर सिगांबो कंग्रेस खुंथायाव थानाय समाव टरुन गगय बिथांजोबो गोरोबथायाव थाबोदोंमोन।

सान्नैसो सिगां बीपीएप दोलोनि आफादगिरि आरो बीटीसी खुंथायनि गाहाय हाग्रामा महिलारि बिथांआ बुंदोंमोनदि, फैगौ लख सभा बिसायखथिआव क’कराझार बियाबनि मासिखौ आवग्रिनानै लागोन आरो बेनिनो गुबै बेरेखा हान्जा हिसाबै मिरु बर’ फरायसा आदजों गेलेगोन होन्ना बुंदोंमोन। बिथांनि थाखाय थाखानाय क’कराझार बियाबनि एमपि हिरा सारनिया बिथांआ बीपीएफ दोलोनि थाखाय जेबो नङा होन्नानै बुंदोंमोन। फारसेथिं मंगलदै बियाबखौ बिजेपि एबा एजिपि राजखान्थि दोलोनो हगारनानै होगोन होन्ना बुङो।

Related Stories

No stories found.
logo
Sentinal Assam
bodo.sentinelassam.com