गुवाहाटी, मार्च 13: फैगौ 17थि लख सभा बिसायखथिआव असम गन परिसद (एजिपि), भारतीय जनता पार्टी (बिजेपि) आरो बड’लेन्ड हालामनि बीटीसी खुंथायाव थानाय बड’लेन्ड पिपल्स फ्रन्ट (बिपिएफ) राजखान्थि दोलोआ खौसेयै गोरोबथा जानानै बाहागो लागोन।
एजिपि दोलोनि साथाम दैदेनगिरिफोर फारियै अटुल बरा, केसब महन्ट आरो फानिभुसान चैदरि बिथांमोनहा दिस्पुर आव थानाय जनता भबन आव स्पेसियेल जथुमा खुंफुंगोन आरो राज्य सभा मासिनि सोमोन्दै सावरायज्लायगोन।
खौरां मोन्नाय बादिब्ला फैगौ 15 मार्च 2019 अक्ट’आव लख सभा बियाबनि मासिखौ लानानै सावरायनो थाखाय गुबुन मोनसे स्पेसियेल जथुमा खुंफुंगोन।
खौरांआव फोरमायहरनाय बादिब्ला एजिपि दोलोआ गासै मोन 3 बियाबफोराव बिजाथि थिसनगोन, बिजेपि दोलोआ मोन 10 बियाबफोराव बिजाथि थिसनगोन आरो बिपिएफ दोलोआ मोन 1 बियाबआव बिजाथि थिसनगोन। गोरोबथा दोलोफोरा आसाम हादोरसानि मोन 14 बियाबफोरनि गेजेराव गासै मोन 12 बियाबफोरखौ लानो थांखि लादों।
एजिपि, बिजेपि आरो बिपिएफ दोलोजों गोरोबथा जानायनि थांखिखौ एजिपि दोलोआ थांनाय मंगलबारनि मोनाबिलिआव हरखाबै सानो। एजिपि दोलोनि गोबां दैदेनगिरिफोरा सानदोंदि, एजिपि दोलोखौ गोजांवना थानायनिफ्राय रैखाथि होनो बिजेपि दोलोजों गोरोबथा जानाया गोनां। फारसेथिं गाहाय थाखोआव एजिपि दोलोखौ हेफाजाब होग्रा सोद्रोमाफोरा सानदोंदि, ओनसोलनि एजिपि दोलोआ आखाय दैखांबाय।
एजिपि दोलोनो मोनथाम बियाबफोर फारियै-कलियाबर, बरपेटा आरो धुबुरि बियाबफोरखौ हगारनानै होनाय जादोंमोन, नाथाय बिथांमोनहा गुवाहाटी नंआब्ला मंगलदै बियाबखौ लानो लुबैदों नङाब्ला फैगौ जुन दान आव खुंफुंजानो गोनां राज्य सभानि मासिफोरखौ लुबैदों।
मंगलबारखालि गुवाहाटी नोगोरमानि साखाथिआव थानाय रेडिसन ब्लु हटेल आव एजिपि आरो बिजेपि दोलोनि गेजेराव जथुमा खुंफुंदोंमोन आरो बे जथुमायाव बिजेपि दोलोनि सा-सान्जा ओनसोलनि नेशनेल सेक्रेटारि राम माधब बिथांआबो नुजाथिदोंमोन।
एजिपि दोलोआ कलियाबर बियाबआव मनि माधब महन्त बिथांखौ थिसनगोन आरो बरपेटा बियाबआव भुपेन राय एबा कुमार दिपक बिथांखौ थिसनगोन। फारसेथिं धुबुरि बियाबआव एजपि दोलोआ बिजाथि थसन्नो गोसो गैया, बिथांमोनहा गुवाहाटी नङाब्ला मंगलदै बियाबआव बिजाथि थिसन्नो गोसो। बेनि थाखाय फैगौ सप्तायाव बिजाथिखौ फोसावगोन होन्ना मिथिनो मोन्नाय जायो।
फारसेथिं एजिपि दोलोनि आसाम हादोरसानि साथाम मंत्राफोरा गाव गावसोरनि मावख’आव खामानि मावनो ओंखारलांफिनो, बिथांमोनहा थांनाय दान मोन्नैसो सिगां जेंना गोनां नोगोरारि (सोदांनाय) बिल 2016 खौ हेंथा खालामनानै मावख’निफ्राय आखाय दैखांदोंमोन।
मखनो गोनांदि, हादोरसायाव एजिपि राजखान्थि दोलोआ हारसिङै बिसायखथिआव बाहागो लानो थाखाय गोहो गैया। जुदि बिथांमोनहा मोनसेबो मासिआव देरहासारनो हायाब्ला एजिपि दोलोआ हादोरसानि राजखान्थि फोथारनिफ्राय गोमोरलांगोन। बेनिखायनो बिथांमोनहा फिन खेबसे सानफिन्नो गोनां जादों।
बिजेपि दोलोनि सा-सान्जा ओनसोलनि नेशनेल सेक्रेटारि राम माधब बिथांआ जथुमानि उनाव बुंदोंदि, “सावरायनायनि गेजेरजों बिजेपि आरो एजिपि दोलोआ आसाम हादोरसानि फैगौ लख सभा बिसायखथिआव जयै मावफुंलांनो आरो कंग्रेज दोलोखौ फेजेन्नो थांखि लाबाय”। बे बाथ्राखौ गुवाहाटी नोगोरमायाव बिजेपि दोलोनि दैदेनगिरि हिमान्ट बिस्व सर्मा, एजिपि दोलोनि अटुल बरा आरो केसब महन्ट बिथांमोनि सिगांआव फोरमायथियो। बिपिएफ दोलोआ थामथि गोलो गोरोबथा दोलोआव थागोन।
