आसाम सोरखारा फैगो 2021 माइथायनिफ्राय सानै गथ' गोनां खान्थि आजावगोन

आसामनि गिबि मन्थ्रि सर्बानन्द सन'वालनि दैदेननाय भारतीय जनता पार्ति (बि जे पि) सोरखारा दासिमाव सोलायथाइ लाबोबाय गुबुन मोनसे आयदायाव। 2021 माइथायनि 1 जानुवारिनि उनाव जाय साख्रि बिजाथिनि सानैनि बारा गथ' थानाय (More Than Two Children) फोरनि थाखाय आर'ज गाबहरनायाव हेंथा नुजाथिगोन।

मख'जाथावदि समबाराव बे गोनांथार थिरांथाखौ मन्थ्रि केबिनेद जथुमाव आथावनायनि गुदियावनो फारि फारियै बांलांबाय थानाय सुबुं अन्जिमा दबथायनाय। गिबि मन्थ्रि सर्बानन्द सन'वालनि मावख'वारि फुंखानिफ्राय फोरमाय जानाय खौरांनि बादिब्ला फैगो 2021नि 1 जानुवारी निफ्राय सोरखारि खोन्दोनि उदां मासि (Vacant Post) फोराव सानैनि बारा गथ' गोनां बिजाथिखौ आर'ज गाबनायाव आजावना लाखाया।

आरोबाव लोगोसे थागिबि हा गैजायै नोगोरारिफोर (Indigenous Landless People) खौ थाम बिधा हा आरो खावसे बिधा हा न' लुफुंनाय (Half Bigha for Construction of House) नि थाखाय दान होनाय थिरांथाखौ आजावो। हानि मुलाम्फायारिया गावनि गोसो बादियै 15 बोसोर सुफुंङालासे फानहरनो हानाय नङा। 2017 माइथायावबो हादोरसा सोरखारा सुबुं अन्जिमा पलिसि द्राफ खालामदोंमोन जेराव 2011 नि सुबुं सानखो (Census) आव 31,169,272 सा अन्जिमा, सोमोनांथावै 10 बोसोरनि बिथायाव सामलायनाय सेन्सासआव 16.93 जौखोन्दो सुबुं बांलांदों।

मख'जाथावदि आसामनि देहा सावस्रि बिफाननि मन्थ्रि ड° हिमन्त बिश्व शर्मा बिथाङा आगोलावनो राज्योनि एम एल ए (Legislator) फोरखौ न'खरनि अन्जिमा दबथायनायाव खामानि मावलांनो हांख्राइदोंमोन। लोगोसे बे आयदाखौ मिरु सोरखारजों सावराय गोन होन्ना फोरमाय हरोमोन। नैबे आयदाया हरखाबै आजावजानाय थिरांथा नंलिया मानोना 2017 नि सेपतेम्बरआव "Population and Women Empowerment Policy of Assam" जथुमाव बयबो सुबुं अन्जिमा बांलांनायखौ खमायलांनाय एबा दबथायनायनि सायाव गोनांथि होदोंमोन। बावैसो सिगां जनसंध्या समाधान फाउनडेसन बिबानगिरि असविनि उपाध्याय नि दैदेननायाव बि जे पि नि दैदेनगिरि भि के सिं, सन्जिब बालयान, महेश शर्मा मोना हान्जा सुरनाय हाबाफारियाव बाहागो लानानै बि जे पि सोरखारा हालोदखौ गोथौयै बुजिनानै आयेनसालियाव सुबुं अन्जिमा दबथायनायनि थाखाय आइन नांगौ ना नाङा होन्ना बिबुंथि लाखिदोंमोन।

थांनाय जुलाइ दानाव राज्य सभानि बि जे पि नि सांसद राकेश सिनहा बिथाङा संसदनि प्राइभेट बिल नि जोहै सानै नि बारा गथ' थानाय सुबुं थान्दै (Public Representative) नि रांखान्थियारि मुलामफा दान्नाय आरो राज्योआरि रानदिंनाय बिथांखि (Public Distribution System) नि मुलामफा खौ बन्द खालामनो बिबुंथि लाखिदोंमोन।

आरोबाव हादोरनि गाहाइ मन्थ्रि नरेन्द्र मडि बिथाङा बुङो दि फारि फारियै सुबुं बांलांनाया गमामायैनो मोनसे जिंगासिनांगौ आयदा। जों गथ'फोरखौ न्याय होनायनि थांखियै सुबुं सांग्रांथि आरो सावराय लायनाय गोनांथि खोथा गारांसेयै सुबुं अन्जिमा बेरफ्रुनायनि सायाव गोथौयै बिबुंथि लाखियो।

Also Read: आयेननि बायजो खैला खनिफोरखौ नायदिंनो गोजौ बिजिर सालिया डिसपुरसिम खावलायदों

Also Watch: Team ‘Ratnakar’ Celebrates its First Successful Week at Nakshatra Cinema Hall in Lakhimpur