गुवाहाटीखौ गोगो आबहावानि थांखिजों गिबि मन्थ्रि सर्बानन्द सन'वाला मोब्लिबारि बास बेखेवबाय

Guwahati : आसाम हादोरसाखौ गंसे गुबुंले बारहावा उदां (Pollution Free), उदखारि उदां आरो दांङाबाजि रैखाथि होनायनि मोन्थोर जों खुंथाइ गोहोआव जिरायनाय भारतीय जनता पार्ति सुंद'यै बि जे पि सोरखारा मैया मोब्लिबारि गोहोजों सोलिनाय बास गारि बेखेवना होयो। समबार खालि गिबि मन्थ्रि सर्बानन्द सन'वाल बिथांआ गुवाहाटी नोगोरमानि खानापारानि आसाम खुंथायारि फरायसालि लांगोनानि जथुमनायाव आसाम ट्रेन्सपर्ट कर्परेसन लिमिटेड (Assam Transport Corporation Limited) नि सिङाव गं 15 इलेक्ट्रिक बास फिरफिला बिरहोनानै बेखेवना होयो।

मख'जाथावदि गोख्रों बिरोंदामिननि मोब्लिबारि गोहोनि गेजेरजों बानायनाय FAME 1 महरनि बास आरो गिबि गिबियै गुवाहाटी नोगोरमानि पानबजारनिफ्राय कामाख्या मन्दिरसिम सोलिनो गोनां मोब्लिबारि बास मावथांखिया पाइलट प्रजेक्ट नि सिङाव लानाय जादों।

मोब्लिबारि बास बेखेवनाय हाबाफारियाव बाहागो लानानै गिबि मन्थ्रि सर्बानन्द सन'वाल बिथांआ बुंथियो दि हादोरनि गाहाइ मन्थ्रि नरेन्द्र मडिनि गोख्रों दैदेननाय सोरखारनि खुंथाइ समाव आसाम गोगो आबहावा गायसंलांनो हादों। बिथांनि नारा नाथा नाजानायाव हादोरा गोगो आरो गोजोन थासारि सोमजिनायाव थोजासे बिहोमा जगायदों।

हादोरनि दाब दाब जायगायाव पाइलट प्रजेक्ट नि खामानिया जाफुंसार महर मोननायनि थाखाय दिनै आसाम हादोरसायावबो बे मावथांखिया आगान सुरलांजेननो हादों। फारि फारियै हादोरसानि गुबुन गुबुन खना खनलायाव मोब्लिबारि बास सिबिथाय राहा गोसार जानाय जागोन होन्ना मिथिहोयो।

हादोरसा सोरखारा सा-सानजा भारतनि दरखं मोखां महरै मिथिनाय गुवाहाटी नोगोरमानि मानसावगारिखौ गुरस्लायनो खामानि मावलांगासिनो दं नाथाय हादोरसानि सिङाव थानाय गासैबो थाखोनि राज्यो-राजाया बे थांखिखौ गोसो गोर्बोजों आजावना लाखानांगोन आरो मान होनानै सिगां फार्से दावगालांनांगोन। अब्लासो सुबुं अनसाइ मावथांखिफोरा जाफुंसार जानायाव खाबु मोनो होन्नानै बुंबावो। आसाम हादोरसाखौ गंसे गोगो आबहावा महरै गायसननाय सिमांनि बेयो आगानसे सिगांलांदों, बेनि उनाव आरोबाव इयुनाव गोबां मावनो गोनां खामानि दंखायो होन्ना इलेक्ट्रिक बास बेखेवनाय हाबाफारियाव नुजाथिनानै बिबुंथि लाखियो गिबि मन्थ्रि सर्बानन्द सन'वाल बिथांआ।

बे हाबाफारियावनो आसाम सोरखारनि दारिमिन आरो हान्था मेला बिफाननि मन्थ्रि चन्द्र महन पाटवारि बिथांआ बुंथियो दि हादोरसा राज्यो-राजा बयनिबो नाजानायाव आसाम हादोरसाखौ गंसे गोगो आबहावा आरो साखोन सिखोन महरै गायसननायाव जर'खा बिफाव लानांगोन । गं 15 मोब्लिबारि बास सिबिथाय राहा गोसार होनाया जौगानायनि आगान से खाम्फा गायसनलांदों। हादोरनि गाहाइ मन्थ्रि नरेन्द्र मडि नि गोख्रों दैदेननाय सोरखारनि FAME मावबिथांखि जोहै थांनाय बोसोराव आसाम हादोरसाया गं 15 मोब्लिबारि बास सिबिथाय राहा आवग्रिनायनि बेलायाव गं बा हादोरसानि मादाव सेथि मासि दखल खालामनो हादोंमोन होन्ना खौरां बिजोंजों फोरमाय जादों।

Also Read :मानसिनि मैदेरनि गेजेराव जेंनाखौ लाना उपरखुथि गोजौ फराइसालिआव सांग्रांथि फोसावदों

Also Watch: Midday meal workers stage protest in Lakhimpur