आसाम हादोरसायाव साइबार क्राइम नि जाथाया गिख्रंथाव महरनि लामायाव

GUWAHATI : आसाम हादोरसायाव गाज्रि एबा अगेन खान्थियै बाहायनायनि बेलायाव सेथि मासि आवग्रिदों। बेनि रोखा बिदिन्थि महरै दं साइबार क्राइम। बे जाथाया हादोरसायाव गोबां खहा खालामदों। मख'जाथावदि नेसनेल क्राइम रेकर्ड बिउर' (NCRB) दा बावैसो सिगां 2017 माइथायनि अगेन खामानि मावनाय खारिथि एबा क्राइम डाटा उदां खालामना होयो। सोमोनांथावै साइबार क्राइम हार मोनफ्रोमबो से लाख सुबुं अन्जिमा (One Lakh Population) मादाव जाफ्लेदों। बे अगेन खामानि एबा साइबार क्राइम दिन्थिनाय बादिब्ला 2017 माइथायाव आसाम हादोरसायाव मोन 1,120 अगेन जाथाइ सोमजिदों, जेराव दुलाराय भारतनि हार 3.4 नि रुजुनायाव आसामावनो 1.7 अगेन जाथाय सोमजिनानै फारिलाइनि नैथि मासि आवग्रिनो हादों, थामथियाव कर्नाटक हादोरसायाव जायगा दखल खालामदों।

मख'जाथावदि थांनाय 2016 माइथायनिफ्रायनो आसामाव गिख्रंथाव महर लादों साइबार क्राइम एबा अगेन खामानिनि हार जाथाया। रायखांनो गोनां दि आसाम हादोरसायाव मोन 696 जाथाया साइबार क्राइमजों लोब्बा गोनां सुबुंनि जोहै सोमजिदों। दुलाराय हादोरनि रुजुनायाव 2016 माइथायाव आसाम हादोरसाया स्निथि मासि (Seventh Rank) आवग्रिनो हादोंमोन।

2018 माइथायाव नेसनेल क्राइम रेकर्ड बिउर' (National Crime Records Bureau ) नि फोसावजानाय खारिथि नि बेलायाव आसाम हादोरसानि क्राइम इनभेष्टिगेसन डिपार्टमेन्ट नि सुलुंनिफ्राइ मोनथिनो हानाय खौरांनि बादिब्ला जोबोद दुखु नांथाव। क्राइम इनभेष्टिगेसन डिपार्टमेन्ट (Criminal Investigation Department) बिफाना मोनथिनाय खौरांनि बादिब्ला 2018 माइथायाव मोन 1517 अगेन खामानिनि जाथाय केस एबा अ'जद थिसन जादों। थिग बिदिनो 2019 माइथायावबो गिलु बालु महर लादों। सोलिफु बोसोरनि गेजेराव मोन 1,106 अगेन खामानि जाथाय गिबि द' दानाव केस एबा अ'जद थिसननायनि खौरांआ क्राइम इनभेष्टिगेसन डिपार्टमेन्ट (Criminal Investigation Department) बिफाना सोरांआव फैयो।

रायखांनो गोनां दि बै अगेन खामानियाव लोब्बा गोनां सुबुंनि गिबि नोजोर थांखिया रांख' आरो गुबुन गुबुन रांङारि फसंथान। क्राइम इनभेष्टिगेसन डिपार्टमेन्ट (Criminal Investigation Department) बिफाननि फुंखानि बादिब्ला आसामाव जोबोद गोख्रों गिथावना महर लानाय साइबार क्राइम हान्जानि सुबुंफोरजों बाहिरा हादोर, जायगानि सुबुंफोरजों खाथि सोमोन्दो दंखायो। बैसोरजों लोगो नांजाबना बे अगेन खामानि मावनाया सामलाय थायो। मख'जाथावदि बिसोरो जोबोद बिरोंदामिनारि रौंगोसा सुबुंफोरा अगेन खामानि मावलांबाय थादों। पुलिस बिफानाबो बेफोर बादि अगेन खामानि मावग्रा सुबुंफोरखौ खाजानायाव आरो मावनायाव दबथायनो हायाखै।

थांनाय बावैसो सिगां हादोर फालांगियारि राजथावनि महरै मिथिनाय नोगोरमा मुम्बाइआव पुलिस रैखाथि हान्जानि जेयाव खाजानाय सानै टुर्कि नोगोरारिया गुवाहाटीनि गुबुन गुबुन जायगाफोराव ए टि एम हेंकि खालामनाय जाथायनि दायाव सिग्रोमनायाव गिलु बालु सिमान होयो। नायबिजिरसंनाय पुलिसनि सुलुंङाव फोरमाय जानाय सुलुंनि बादिब्ला अगेन खामानियाव लोब्बा गोनां सुबुं मोना गुवाहाटी नोगोरमानि गुबुन गुबुन जायगायाव फसंनाय ए टि एम मेसिनाव क्लनिंनि जोहै रां सोबख'दोंमोन।

Also Read : मिडडे मिल संग्रा आरो खामानि मावग्राफोरा सोरखरनि सायाव हेंथायै सोमावसारदों

Also Watch: Watch | Orang Raas Mohotsav Preparation