गुवाहाटी,मार्च 18: सा-सान्जा ओनसोलनि आरो आसाम हादोरसायाव गोदानै दाफुंजानाय राजखान्थि हान्जा, नेशनेल पिपल्स पार्टी (NPP) आ फैगौ लख सभा बिसायखथि आव हादोरसानि मोन 14 लख सभा बियाफोराव बिजाथि फसंगोन होन्ना रबिबाराव फोरमायनानै होयो।
आसाम हादोरसा NPP नि राजखान्थि दोलोनि गाहाय लिंथुमगिरि कमला राजकनवार बिथांआ खौरांगिरिफोरनि सिगांआव बुङोदि, बिथांमोनहा आसाम हादोरसानि थागिबि सुबुंफोरनि मोन्थायखौ रैखाथि होनो बिसायखथिआव बाहागो लागोन। “नोगोरारि सोदांनाय बिल 2016 नि हेंथायै जों बिसायखथिआव बाहागो लागोन, मानोना बेयो आसमिया माहारिनि बेरेखा बिल” जुदि जोंनि मिरु दैदेनगिरिफोरा मोन 14 मासिफोराव बिजाथि फसंनो नागिरनायखौ गनाया अब्ला जों आसाम हादोरसायाव मोन 7 एबा मोन 8 बियाबफोराव बिजाथि फसंगोन” होन्ना बिथां राजकनवारआ बुङो।
राजकनवार बिथांआ असम गन परिसद (AGP) राजखान्थि दोलोखौ गोख्रों रावजों सोंखारियो, आरो बुङोदि, “एजिपि राजखान्थि दोलोआ सुबुंफोरनि सानथोव एबा Sentiment खौ लानानै राजखान्थि गेलेदों, एजिपि दोलोआ नोगोरारि सोदांनाय बिल 2016 खौ हेफाजाब खालामनानै बिजेपि दोलोजों गोरोबथा जाबाय, दा बिथांमोनहा खुंथायाव थानाय सरकारजों गोरोबथा जादों, बिथांमोनहा थारैनो गोहो लुबैसुला, बिथांमोनहा थगायसुला”।
बिथांआ बुंबावोदि, NPP राजखान्थि दोलोआ ओनसोलनि गोख्रों राजखान्थि हान्जा दानो लुबैदों, मानोना AGP दोलोआ ओनसोलनि सुबुंफोरनि हासथायनायखौ सुफुंनो हायाखै। मेघालया हादोरसानि गिबि मंत्री कनराद संगमा बिथांआ दिब्रुगड़ जिल्लायाव गोख्रों सांग्रांथिआरि जथुमा खुंफुंगोन। बिथांआ CAB खौ जेरैखि जाया हेंखा खालामनो थांखि लादों” होन्ना बिथांआ फोरमायबावो।
बावैसो समनि गेजेरावनो बिथांमोनहा लख सभा बिसायखथिनि बिजाथिखौ फोसावगोन। NPP राजखान्थि दोलोआ ओनसोलनि जायखिजाया दोलो एबा हान्जाजोंनो गोरोबथा जागोन। “जोंनि गुबै थांखिआनो जाबाय, सा-सान्जा ओनसोलनि थागिबि सुबुंफोरनि मोन्थायखौ रैखाथि होनाय, मानोना गोदान दिल्लीआव थानाय सरकारा सा-सान्जा ओनसोलनि सुबुंफोरनि मोन्थायखौ जेब्लायबो फोजोबस्रांनो नाजायो, जों जोंनि सुबुंफोरनि जौगालु हाबा मावनो लुबैयो” होन्ना बिथांआ बुंबावो।
