क’कराझार,मार्च 5: थांनाय रबिबारनि मोनाब्लिआव क’कराझारनि सुबुंथिनि थान्दै बिनेस्वर ब्रम्हनि गोथैसालिआव दिन्थिफुंनाय लोर्गि थियाटार हान्जानि रायखस मुंनि सुंद’ थुनफाउथायआ राज्यो राजानि अनसायनाय मोनदों।
खौरां मोन्नाय बादिब्ला बे थुनफाउथायनि गेजेरजों लोर्गि थियाटारनि हान्जाया रायखस मुंनि सुंद’ थुनफाउथायनि गेजेरजों हा, हारिमु, सिनायथि आरो आसारखान्थिफोरखौ लानानै गोग्लैसोनानै थानांय थागिबि सुबुं माहारिनि सायाव ओनसोलखौ गुबुन गोजौ थाखोनि खुंथायाव थानायनि समाजनि नंगुबै जाथायखौ दिन्थिफुंनो नाजादोंमोन होन्ना मिथिनो मोन्नाय जायो।
रायखस मुंनि सुंद’ थुनफाउथायखौ नेशनेल स्कुल ऑफ द्रामानि आर्टिस केसब मुछाहारी बिथांआ लिरनानै बोसोन होदों, जाय बिथांआ बिसमुरि गामिनि गथ’सा न’ एबा “Children Factory” खौ नायबोगासिनो दं। रायकस मुंनि सुंद थानफाउथायनि थाखाय फाउगिरि एबा आर्टीसफोरखौ क’कराझार, सिरां आरो बाक्सा जिल्लाफोरनिफ्राय बुथुमनाय जादों नाथाय गुबैयै “Children Factory” नि बाहागो लादों होन्ना मिथिनो मोन्नाय जायो।
सुंद’ फाउथाय दिन्थिफुंनायनि गुबै थांखिनायो जाबाय, क’कराझार जिल्लानि चान्दमारि आव थानाय लोर्गि टियाटार हान्जानि मावख’नि थाखाय गामियारि सुबुंफोरखौ फाउथाय दिन्थिनाय फार्से गोसो बोनानै आथिखालनि थासारिनि सायाव गियान सोलोंनो होनाय।
थुनफाउथायनि गेजेरजों रायखसनि आखुथाय लानाय सुबुंआ गासै ओनसोलखौनो दबथायनानै दोन्नानै गावनि हारि, हारिमु, सिनायथि, मोन्थायफोरखौ लाहोनानै गादबनानै दोन्नाय। रायखसनि थांखिआनो जाबाय गोरिब थाखोनि सुबुंफोरनि हा-हु फोरखौ आवग्रिनानै लानानै खनि मुवाफोरखौ फोजोबस्रांनो खारखाना आरो बायदि फसंनाय।
फारसेथिं हाका मुरा, मुंनि लखेलनि सुबुंफोरनि हान्जाया गावनि ओनसोलनि मोन्थाय, हा-हुनि मोन्थायफोरखौ होबथानानै दोन्नो थाखाय गांवनि ओनसोलफोराव गोबां सोमावसारनानै जांख्रिखांनाय लाबोयो, नाथाय रायखसजों जेन्नो गोनां जायो। बिथांनि गोबां सोमावसारगिरि सोद्रोमाफोरखौ खायो आरो जोबथेसालिआव सोनानै दोनो। गामियारि गोरिब थाखोनि सुबुंफोरा रायकसनि गाग्लोबनाय, हा-हु सेखनानै लाजानाय बेफोर बिथिंआव रावबो सुबुंनि हेफाजाब गोयै जायो, जाहोनाव गासै माहारिनिनो हारिमु, सिनायथि, मोन्थायफोरा गोमालांजोबनो हमो।
गोसोआव राफोद लानानै गावनि हारिमुखौ होबथानो नाजानाय हाका मुरा बिथांमोनहा रायकसनि आखायनिफ्राय होबथानानै दोन्नो जेबो राहा गोयै जायो आरो दुखु मोनो, रायखसजों नांनो थाखाय बिथांमोनहा एसेबांमानि गियानबो गोया, जोबथि समाव बिथांआ गावनि सान्नाय बादियै गावनि रोंगौथिजों रायकसजों नांनो थांकि लायो, हाका मुरा बिथांआ गोजौ फरायसालिआव फरायफुनायखौ नागारनानै दावहानि थाखाय राहा नागिरनाय आरो सोलोंनायाव मुखुब जानो गोनां जायो।
गिबि दिन्थिफुंनायाव लोर्गि थियाटार हान्जानि आफादगिरि सोमदोन ब्रम्ह बिथांआ राज्यो राजानि हेफाजाब नागिरनानै बिथांआ जाखांफुनाय लाइमोन फाउगिरि बिथांमोनखौ थुलुंगाखांनाय लाबोनो खावलायो।
