सामागुरि,डिसेम्बर 4: गेजेर आसामाव थानाय नगांव जिल्लानि रंगाघर साह बागानाव थांनाय नै दान सिगांनिफ्रायनो आयथिंआव जखम जानानै गोग्लैनानै थानाय हाग्रानि मैदेरा मंगलबाराव जोबथा हां बोबाय।
थांनाय 6 अक्टबरनिफ्रायनो गोग्लैनानै थानाय मैदेरा गुबुन मैदेर फालोनि मैदेरजों गेग्रें-गुंग्रुं जानानै गावजों गाव सौलाय लायनानै जखम जानानै हाग्रा खाथिनि बेबाजिया गामिआव गोग्लैनानै थालांदों होन्ना सनदेह’ खालामदों। हाग्रा बिफान्नि सोद्रोमाफोरा जाथाय थिलिआव थाब नुजाहैयैआव ओनसोलनि सुबुंफोरानो मैदेरनो बायदि मुवानि जाग्रा बेसाद गथायदोंमोन होन्ना मिथिनो मोन्नाय जायो।
हाग्रा ओनसोलनि गोबां सुबुंफोरा जखम जानाय मैदेरखौ जोथोन लादोंमोनब्लाबो दिनै फुंआव बांद्राय सानाय आरो लैरबां जालांनायनि जाहोनाव जोबथा हां बोबाय होन्ना मिथिनो मोन्नाय जायो।
गामिनि आरो गामि खाथिनि सुबुंफोराबो मैदेर थैनायनि खौरांखौ मोन्नानै जोबोद दुखुमोन्नाय फोरमायो आरो मैदेरनि खाथिआव धुना सावनानै होयो।
फारसेथिं आसामनि गुबुन गुबुन जिल्लाफोराव मैदेर आरो मानसिनि दावहाया दासिमबो जोबनानै थाङाखौ। गासै बे बोसोराव मैदेर आरो मानसिनि दावहायाव सा 64 सुबुं आरो मा 53 मैदेरफोरा जिउ खोमानांबाय होन्ना मिथिनो मोनबावनाय जायो।
मोखां बिजाबनिफ्राय मिथिनो मोन्नाय बादिब्ला दिनैबो (मंगलबार) उदालगुरि जिल्लानि सिङाव थानाय 2 नं बरांगाजुलिआव सासे आडिवासि सुबुंखौ हाग्रानि मैदेर फालोआ जिउ खहा खालांदों होन्ना मिथिनो मोन्नाय जायो। बिथांआ न’ फारसे फैगासिनो दंमोन आरो बे समावनो हरखाब मोगा मोगिआव जाथाया सोमजिदों होन्ना मिथिनो मोनबावनाय जायो।
