गोदान दिल्ली,मार्च 21: गोदान रिपोर्ट एबा रादाबनि बादिब्ला भारतनि 1 बिलियन सुबुंफोरा दै गोयै ओनसोलफोराव राज्यो जाबोनांगासिनो दं, बेनिनो 600 मिलियन सुबुंफोरा बांद्राय दै गोयै जायगायाव थानांगासिनो दं।
WaterAid मुलाम्फा गोयै आफादआ फोरमायनाय बादिब्ला बुहुमनांङैनो गासै 4 बिलिय सुबुंफोरा दै गोयै ओनसोलफोराव थानांगासिनो दं, जेराव बोसोरनि मोनसे समाव दैनि गोनांथिआ दै जगायनायनिख्रुयबो बारा (Demand exceeds supply)
फैगौ 2050 माइथायाव दै गोयै ओनसोलफोराव राज्यो जानांनाय सुबुं अनजिमानि जौखोन्दोआ 5 बिलियन आव बांलांगोन होन्ना WaterAid आफादआ फोरमायो। 22 मार्च आव “बुहुमनां दै सान” एबा “World Water Day” फालिनायखौ नोजोर होनानै “Beneath the Surface: The State of the World’s Water 2019″ खौ बुहुमनांङैनो फोसावनानै होयो।
बोथोर सोलायनाय (Climate Change) आरो सुबुं अनजिमा (Population Change) बांलांनायनि जाहोनाव दैनि गोनांथि जानाय आरो दै गोयैनि जेंना एबा Physical water scarcity नि जेंनाया बांलांगासिनो दं।
2040 माइथायनि गेजेराव मुलुगनि गासै मोन 33 हादोरफोराव बांद्राय दै गोयैनि जेंनायाव फुगिनो नांगोन होन्ना नायबिजिरगिरिफोरा मोनदांदों। बेनि मोन 15 गेजेर सान्जा हादोर, सा-आफ्रिका, पाकिस्तान, टुर्कि, आपगानिस्तान आरो स्पेन। भारत, सिन, खोला आफ्रिका, आमेरिका आरो ऑस्ट्रलिया हादोरफोराबो बांद्राय दै गोयै जेंनाजों मोगा मोगि जानांगोन।
हादोरनाङैनो हा सिंनि दै खहा खालामनाय- हा सिंनिफ्राय दै खहा खालामनाय (Global groundwater depletion) एबा दै बोखांनानै बाहायनाया हारसिङैनो हा सिङाव दै जमा (Naturally Stored) जानायनिफ्राय बांसिन। खौरांआव फोरमायनाय बादिब्ला 2000 माइथायनिफ्राय 2010 माइथायनि गेजेराव हा सिंनिफ्राय दै बोखांनानै बाहायनाया 22 जौखोन्दो बारायदों। बे मोनसे समावनो भारत हादोरावबो हा सिंनिफ्राय दै बोखांनानै बाहायनाया 23 जोखोन्दो बांलांदों।
रिपोर्टनि गेजेरजों बोखौबो फोरमायोदि, भारत हादोरानो बयनिख्रुयबो बांसिन हा सिंनि दैखौ बाहायो- बुहुमनाङैनो रुजुनानै नायोब्ला भारत हादोरा गासै 22 जौखोन्दो हा सिंनि दैफोरखौ गुबुन हादोराव दैथायहरो। जाय जौखोन्दोआ बुहुमनि मादाव थामथि जायगायाव दं। नाथाय मुलुग आव गासै 12 जौखोन्दोल’।
WaterAid आफादआ बेखौबो फोरमायदोंदि, गुबुन हादोरनिफ्राय लाबोनाय आदार (Food) आरो गान्नाय जोमनायनि जाहोनाव गरिब आरो गाहाय थोखोनि सुबुंफोरखौ जिउ खुंनायाव जेंना खोख्लैदों। बिथांमोनहा सानफ्रोबो गोगो दैनि आंखालजों फुगिनांनानै दं। रा-रुफा गोनां हादोरफोरा “water footprints” नायनानै मुवा बेसादफोरखौ बायो, जाय मुवाखौ दै गोयै हादोरनिफ्राय बेसेबां गोगो दै बाहायनानै बानायनाय जायो। (IANS)