Guwahati: जुदि हादोरनि गाहाइ मन्थ्रि नरेन्द्र मडि आरो मिरु न'खर बिफाननि मन्थ्रि अमित चाह बिथांमोनहा गोहो साहस दंबोला 1951 निफ्राय 1971 सिम आयेन बेरेखायै हाबसनफैग्रा बजाय (Burden) गुबुन गुबुन राज्योफोरावबो सोफादेरदो होन्ना हुमखि होयो। खालि आसाम प्रदेशाल' मानो बे गिलिर बजाखौ सैनांगोन होन्ना दुलाराय आसाम फरायसा आफाद नि गाहाइ नेहाथारि लुरिन ज्योति गगै बिथाङा बुंथियो। जों माब्लाबाबो नोगोरारि सोदांनाय बिल नि थांखिखौ मानिनानै लानो हाया होन्ना गुवाहाटी नोगोरमानि स्वहीद नियासनिफ्राय राज भबनसिम ओंखारनाय गोबां दोलो आफादनि सुबुं हान्जा सुरनाय हाबाफारियाव जांख्रिखांनायजों हुमखि होयो।
लोगोसे गगै बिथाङा दाजाबदेरनानै बुंबावो दि केब बिलखौ दासिमाव लाबोखाबायनो आरो बेखौ संसदाव पास खालामनो नाजागोन। जिहेथु संसदाव सोरखार एबा भारतीय जनता पार्ति सुंद'यै बि जे पि नि ल'क सभायाव सांसद नि अन्जिमाया गोबां, बे सोलोखौ बाहायनानै केब बिलखौ गोहो बोलोजों सा-सानजा हालामाव जाबसिन्नो नागिरगोन। बेनि गेजेरजों बे हादोरसाफोराव बिसोरो अदेबानि बि जे पि आ मोनसे भ'ट बेंक प'लिटिकस गायसंलांगोन। बे बिलखौ संसदनि दरबाराव पास जायोब्ला दिभाइद एण्ड रुल राजखान्थि गेलेनानै दोहोरोमारि गुबुंले राजखान्थि गेलेनायजों मानसिनि गोसोखौ सुग्लायहोनो नाजागोन।
भारतीय जनता पार्ति सुंद'यै बि जे पि नि दैदेननाय मिरु सोरखारा नोगोरारि सोदांनाय बिल (Citizenship Amendment Bill) लाबोनायनि हेंथायै दुलाराय आसाम फरायसा आफाद (All Assam Students Union) आरो सा-सानजा फरायसा गौथुम (North East Students Organisation) नि गोबां फरायसा मावथि , मददगिरि मोना समबाराव गुवाहाटी नोगोरमानि स्वहीद नियासनिफ्राय राज भबनसिम ओंखारनाय गोबां दोलो आफादनि सुबुं हान्जा सुरनाय हाबाफारियाव जांख्रिखांनायजों आबहावाखौ बायदि स्ल'गानजों अख्रां गोमखांहोयो।
सोमावसारारि मोननै फरायसा आफादनि दैदेनगिरि मावथिमोनखौ राज भबन सोहैनाय सिगांनो पुलिस रैखाथि हान्जाया होबथा होनायाव बिसोरनि दाबि दावा मख'नाय गोसोखांलाइ नोगोरमानि जथाइ पुलिस कमिसोनार डि उपाध्याय नि जोहै गाहाइ मन्थ्रि, न'खर बिफाननि मन्थ्रि आरो हादोरसा बेंगिरिनिसिम गथायनाय जायो।
रायखांनो गोनां दि चलो तो राज भबन हाबाफारिया समबाराव आसामनि अनगायै गुबुन गुबुन हादोरसाफोरावबो दिन्थिनाय जादों होन्ना सा-सानजा फरायसा गौथुम नि दैदेनगिरि मोना मिथिहोयो। बे हाबाफारियावनो खौरांगिरिजों जानाय मुगा मुगि बुब्लियाव दुलाराय आसाम फरायसा आफाद नि गाहाइ बोसोनगिरि (Chief Adviser, AASU) समुज्जल भट्टाचार्य बिथांआ बुङो दि दानि आसाम गिबि मन्थ्रि सर्बानन्द सन'वाल बिथांआ गुबुन गुबुन सा-सानजा हादोरसानि गिबि मन्थ्रि मोननिफ्राय सोलोंना लानो लानांगौ होन्ना बुंथियो। जेरैबादि बिसोरो गावनि राव , हारिमु , दोहोरोम समाजखान्थिनि रैखाथि थामोन्थाखौ नोजोर नानै आइनखौ बेरेखा खालामनो हायो अब्ला जोंनि आसामनि गिबि मन्थ्रि सर्बानन्द सन'वाल बिथांआ मानो साहसखौ आजावनो हाया होन्ना सुबुं जांख्रिखांनायजों सोंखारियो। बे हाबाफारियाव दुलाराय आसाम फरायसा आफादनि आफादगिरि दिपांक कुमार नाथ, गाहाइ नेहाथारि लुरिन ज्योति गगै आरो सा-सानजा फरायसा आफादनि दैदेनगिरि मोना बाहागो लाफैयो।
Also Watch: Govt all set to push for the contentious Citizenship Bill in the winter session of Parliament