Guwahati : बि जे पि दैदेननाय मिरु सोरखारा नोगोरारि सोदांनाय आइन (Citizenship Amendment Act) नि हेंथायै राव दोहोरोम सायख'वालासे गासैबो थाखोनि राज्यो-राजाया राजा लामायाव बेले बेजे गोनां बिलखौ हेंथा खालामनानै जोबथायाव पुलिस रैखाथि हान्जानि गोथां गुलि (Bullet) याव गावथार जानो जाबाय। दासिम हालागै गुवाहाटी देहा फाहामसालिमा (Gauhati Medical College & Hospital) याव गासै साब्रै सुबुंआ मुंख्लं जालांबाय।
मख'जाथावदि नोगोरारि सोदांनाय आइन (CAA) खौ बेरेखा खालामनानै गुबुन गुबुन सोमावसारगिरि (Protesters) फोरजों गुवाहाटीनि डाउन टाउनाव जानाय खुद्रिसारनायाव बाहागो लाफैनाय उदालगुरि जिलानि थागिरि 25 बोसोर बैसोनि इश्वर नायक मुंनि सासे लाइमोन सेंग्राया शनिबार खालि जि एम सि इद्साव जोबथा हां गारबाय। थिग बिदिनो गुवाहाटी लालुंगावनि 23 बोसोर बैसोनि सेंग्रा आबदुल हालिमआबो जिउ गोमालाङो। बेनि सिगाङावबो सानै लाइमोन सेंग्राया मुंख्लं जालांदों। बिसोर सानैनि सासेया खोला कामरुप जिलानि सयगावनि सेंग्रा 21 बोसोर बैसोनि दिपान्जल दास आरो गुबुन सासेया 17 बोसोर बैसोनि सेय्म ष्टेफर्ड होन्ना सिनायथिनाय जादों।
बेराफारसे थिं जाय गुवाहाटी देहा फाहामसालि (GMCH) मायाव सा 27 सुबुं (Person) फोरखौ गोब्राब जोखोम जानाय हालोदाव थिसन्नाय जादों। बेनिनो माखासे खमसिनै जोखोम जानांनाय सुबुंफोरखौ उदां खालामनाय जाबाय आरो दासिमावबो गोब्राब जोखोम जानानै थानांनाय सुबुंफोरखौ देहा फाहामनाय सोलिगासिनो (Undergoing Treatment) दं होन्ना मोनथिनो मोननाय जादों।
दासिमनि गुलुं गुजुं थासारिखौ नोजोर लाखिनानै राज्योनि माखासे जायगाफोराव कार्फिउ जाबसिन्नायखौ माखासे धन्टानि थाखाय सानाव रिलेक्स खालामनाय जादों आरो मोनानि समाव आरोबाव फिन जाबसिन्नाय जायो। आसामनि राजथावनि नोगोरमा गुवाहाटीजों लोगोसे राज्योनि गुबुन गुबुन जायगाफोराव मैया अदेबानि रबिबार खालि फुंनि 9 रिंगानिफ्राय मोनाबिलिनि 6 रिंगा समखिनियाव रिलेक्स खालामनाय जायो। मख'जाथावदि गोजौ थाखोनि आइ पि एस अफिसार आसामनि गोदानै गाहाइ पुलिस सामलायगिरि (Director General Of Police) महरै थिसन मोन्नाय भास्कर ज्योति महन्त बिथांआ बुंथिदों दि गुवाहाटी नोगोरमायाव समबार खालि फुंनि 6 रिंगानिफ्राय मोनानि 9 रिंगासिम कार्फिउ जाबसिन्नायखौ राज्यो-राजानि गाहाम सान्नानै बोखारनाय (Relax) जादों होनना मिथिनो मोननाय जादों।
सा-सानजा रेलवे सिमना (North Frontier Railway) नि सुबुं फोनांजाब बिबान गोरा (Public of Relation Officer) नृपेन भट्टाचार्य बिथांआ दि सेन्टिनेल खौरांलाइजों जानाय मुगा मुगि बुब्लियाव बुङो दि माखासे ष्टेसनाव थाब थानानै थानांनाय गोलाव रावना जानांनाय रेल गारिफोरखौ हान्थियारि राज्यो-राजानि गाहाम सान्नानै सोलिदों। नाथाय माखासे लकेल ट्रेनफोरखौ दासिम हालागै खुलिनाय जायाखै होन्ना मिथिनो मोननाय जादों।