Guwahati : नोगोरारि सोदांनाय आइनखौ लानानै राज्योनि सोरबिथिं दुंहाव थासारि सोमजिदों। सुबुंदारारि खान्थिजों नोगोरारि सोदांनाय बिलनि हेंथायै राजा लामायाव ओंखारफैनाय रोजा रोजा राज्यो-राजाया (Huge Public) बेले बेजे गोनां केबनि बेरेखायै गोख्रों सोमावसारनाय हाबाफारि (Agitation) दिन्थिफुंदों। बै समावनो गोजोन हास्थायग्रा राज्यो-राजाया रैखाथि हान्जानि गोथां गुलि गावथार जानानै साथाम सुबुंआ जिउ गोमालांनो गोनां जादोंमोन। दानिया बै दुखु गोनां जाथायाव मुंख्लं जालांनाय सुबुंफोरखौ थि रोखोमनि सुफुंथाइ राहा (Compensation) आरो गोजौ थाखोनि संबिजिरनो (High Level Inquiry) आर'ज गाबहरदों नाग'रिक समाज मुंनि आफादा।
मख'जाथावदि शनिबार खालि गुवाहाटी प्रेस क्लाबाव खुफुं जानाय मोनसे खौरां मेलनि गेजेरजों नाग'रिक समाजनि बिबान गिरि हरेकृष्ण डेका बिथाङा बुङो दि मिरु सोरखारा गोहो बोलो नारसिन्नानै असमिया समाजखौ फोजोबस्रांनाय बिलखौ आजावनानै लानो हाया। सानफ्रोमबोनि नांगौथार मुवा बेसादखौ लांलाय लाबोनाय राहायावबो अल'खद एबा जेंना नुजाथिदों।
डिसेम्बरनि 11 खालार खालि मिरु दैदेननाय बि जे पि नि सोरखारा (BJP Government) गोसोम सान महरै गायसनबाय। आसाम आरो हादोरनि गुबुन गुबुन जायगाफोराव थानांनाय असमिया राज्यो-राजाखौ बै सानखौ गोसोम सान (Black Day) महरै फालिनो थाखाय हांख्रायहरदों। लोगोसे डेका बिथां दाजाबदेरनानै बुंथियो दि नोगोरारि सोदांनाय आइन (Citizenship Amendment Law) नि असिला लानानै माखासे दुथां आखल आखुनि सुबुंआ दुंहाव एबा सोरखारि दोहोन सम्फथिफोराव गुलुं गुजुं थासारि सोमजिहोनाय सुबुंफोरखौ खुंथाइ गोहोआ नांगौ रोखोमनि साजा होनायाव फेलें जादों।
बिसोरो (रैखाथि गोहो) साथाम सोमावसारगिरि सुबुं (Protester) खौ खास्रि बिस्रियै गुलि गावथार जानानै मुंख्लं जालांनो गोनां जादोंमोन। ओंखायनो जोंनि आफादनिफ्राय थाबैनो आयेनारि लामाजों थैलांनाय साथाम सुबुं आरो बिसोरनि नख'राव नांगौ रोखोमनि सुफुंथाइ राहा होहरलांनो दाबि दैखांदों।
बेरा फारसेथिं जाय नाग'रिक समाजनि गुबुन सासे बिबान गिरि आरो राफोद खौरांगिरि (Noted Journalist) अजित कुमार भुञा बिथाङा बुंबावो दि सोरखारा नोगोरारि सोदांनाय आइन (Citizenship Amendment Act) खौ माबा थांखिनानै थोंजोङैनो आसामाव जाबसिन्ना होदों। बिसोरो "का" नि हेंथायै मोनबो रोखोमनि सोमावसारनाय सोमजियाखै। गेसाव राजखान्थिनि आस्रय लानानै फाव फान्दायनायाव लोब्बा नांजादों। बिसोरो सोमावसारारि राज्यो-राजाखौ गाज्रि खामानियाव नांथाबनो गोसो दुंहोदों होन्ना राफोद खौरांगिरि (Noted Journalist) भुञा बिथाङा मिथिहोबावो।