गुवाहाटी,जानुवारि 01: थांनाय 30 जुलाइ 2018 आव फोसावनाय जोबथा नेसनेल रेजिस्तार अव सितिजेनसिवनि (NRC) आबुं फोरिलाइआव माकासे गोरोन्थि नपजादोंमोन, बेफोर गोरोन्थि जालांनाय आरो नंगुबै नोगोरारिफोरनि मुं थालांनायफोरखौ नोजोर होनानै जौसिन बिजिरसालिआ मुं थिसनफिन्नो आरो गोरोन्थिआवनो फारिलाइआव नुजानाय सुबुंनि बेरेखायै अजद होफिन्नो खाबु होदोंमोन आरो बे हाबाफारिखौ NRC नि बिबानगिरिफोरा होखानाय समबादियै मावफुंबोदोंमोन।
खौरां मोन्नाय बादिब्ला मुं थिसनफिन्नाय आरो अजद होफिन्नायनि होखानाय समआ थांनाय समबार आव जोबनानै थांबाय। फारसेथिं NRC आव ओंखारनाय गोबां सुबुंफोरनि मुंफोरा गोरोन्थि जाबोदोंमोन आरो बेफोरखौ गोरोन्थि गोयै खालामफिन्नो थाखाय मोनफ्रोमबो NRC मिरुफोराव अफलाइननि गेजेरजों खाबु होबोगासिनो दं, नाथाय गोजोन्थाव खौरांदि, बेफोर खामानिखौ मावफुंनो थाखाय अनलाइन (Online) नि गेजेरजों गाव गावनि मुंफोरखौ फोसाबनानै लाफिन्नो थाखाय फैगौ 2 जानुवारि 2019 (बुधबार) अक्टनिफ्राय खाबु होगोन होन्ना खौरां मोनबावनाय जायो।
अनलाइननि गेजेरखौ गाव गावनि मुंफोरखौ फोसाबनानै लाफिन्नो थाखाय थांनाय डिसेम्बर दान्निफ्रायनो खाबु होगोन होन्ना फोसावदोंमोन, नाथाय माकासे टेकनिकॉल जाहोन्नि थाखाय डिसेम्बर दान्निफ्राय बे खाबुखौ होनो हायाखैमोन बेनिखायनो NRC नि बिबानगिरिफोरा फैगौ बुधबार एबा गाबोन्निफ्राय बे खाबुखौ होनो साखाफारा।
खौरां मोन्नाय बादिब्ला Offline आरो Online मोन्नैबो खामानिआ फैगौ 31 जानुवारि 2019 अक्टसिम सोलिबाय थागोन। NRC नि बिबानगिरिफोरा बे खामानिखौ जाफुंसार खालामनो थाखाय गोख्रोङै नाजागासिनो दं, Online नि गेजेरजों गाव गावनि मुंखौ फोसाबनानै लाफिन्नो थाखाय NRC नि ऑफिसियेल फेज nrcassam.nic.in आव हाबनानै ‘ONLINE NRC DRAFT CORRECTION PORTAL’ आव थुनानै होखानाय बिथोनफोरबादि गाव गावनि मुंफोरखौ गोरोन्थि गोयै खालामनानै लानै हागोन।
बे समाव गासैबो मुंथिसनफिन्नाय आरो अजद होफिन्नायनि नंगुबै जौखोन्दोखौ बुंनो हानाया गोब्राब। सान्नैसो सिगां गासै 30 लाखसो सुबुंफोरा मुं थिसनफिन्नो थाखाय आरज बिलाइ गाथायफिनदोंमोन आरो सा 600 सो सुबुंफोरनि बेरेखायै अजद होनायखौ नुनो मोन्नाय जादोंमोन। गासैबो मुं थिसनफिन्नाय आरो अजद होफिन्नायनि फिथायखौ फैगौ फेब्रुवारि दान्नि 15 अक्टनिफ्राय मिथिहोनाय जागोन।