थाम बोसोराव बेदखलनि आवथानिफ्राय मोनथामल' सत्र उदां खालामनायनि खौरांआ सोरांङाव फैदों

Guwahati : राज्योनि सोरबिथिं नोगोरारि सोदांफिन्नाय आइन (Citizenship Amendment Act 2019 ) नि हेंथायै नागारनाय गैयि जासे सोमावसारनाय हाबाफारिया सोलिगासिनो दं। बै समावनो मोनसे सोमोनांथाव खौरांआ सोरांङाव फैनाय जाथाया बयखौबो सोमोनांहोदों। मोनथाम बोसोराव गासै मोनथाम ल' सत्रफोरखौ गुबुनारिनि आखायाव थानाय हा खोन्दोखौ उदां खालामनाय जादों। मख'जाथावदि थांनाय 2016 माइथायाव जालांनाय आसाम बिधान सभा बियाबनि बिसायख'थियाव (Assam Legislative Assembly Poll) आयेन बेरेखायै हाबसनफैग्रा गुबुनारिनि आवथानिफ्राय मन्दिर , सत्रफोरखौ उदां खालामनाया गुबुन मोनसे राजखान्थियारि गाहाइ स्ल'गान (Poll Planks) महरै आवरायदोंमोन। आसामनि गिबि मन्थ्रि (Assam Chief Minister) सर्बानन्द सन'वाल दैदेननाय हादोरसा सोरखारा माथो मोनथामल' सत्रफोरखौ बोखारहरनो हानाय जाथाया थारैनो दुखुनांथाव होन्ना दासान्दि राज्यो-राजानि गेजेराव गुवारै सावराय जादों। दासिम हालागै राज्योनि दाब दाब जायगायाव थानाय मठ मन्दिर, सत्रफोरनि हा खोन्दोआ आयेन बेरेखायै सन्देह'गोनां सुबुंनि आवथायाव दं।

रायखांनो गोनां दि असम सत्र महासभानि गाहाइ नेहाथारि (Axom Xatra Mahaxabha General Secretary) कुसुम कुमार महन्त बिथाङा दि सेन्टिनेल खौरांलाइजों जानाय मुगा मुगि बुब्लियाव बुङो दि राज्योआव थानाय सत्रफोराव हा आवथेनाय आयदाया मोनसे गोब्राब जेंना। गोलाव बोसोरनिफ्राय गोबां जेंना जेंगोनायाव भुगिनानै थानाय हा खोन्दोखौ गोरा आखायजों थाबैनो उदां खालामनो थाखाय गोनांथार आयेनारि राहा लानो खावलायदों गिबि मन्थ्रि सर्बानन्द सन'वालखौ। लोगोसे महन्त बिथाङा आसाम सोरखारनि हा खाजोना बिफान (Revenue Department) नि मावख'गोराफोरखौबो गोनांथार आगान लानो खावलायदों।

बेरा फारसेथिं जाय आसामनि बैश्नबि सत्र आफादगिरिया बुङो दि दासान्दि नगाव जिलानि बरदवा थान , मरिगाव जिलानि सिङाव थानाय पाटकिबारि सत्र आरो कामरुप मेट्रपलिटान जिलानि दक्षिनपाट सत्रनि हा खोन्दोखौ उदां खालामनाय जादों होन्ना फोरमायो। बियो दाजाबदेरनानै बुंबावो दि दासिमावबो गोबां सत्रफोरा बेदखलनि आवथायाव दं आरो हा खाजोना बिफानखौ उदां खालामनायनि थाखाय मोनबो साखा-फारा जानायखौ नुनो मोननाय जायाखैसै होन्ना दुखु फोरमायो। ओंखायनो आं गिबि मन्थ्रि सर्बानन्द सन'वाल बिथांखौ राज्यो-राजानि गाहाम सान्नानै थाबैनो बेदखलनि आवथानिफ्राय उदां खालामनो थाखाय खाथिनिफ्राय नोजोर होनो गुरैयै खावलायनाय होन्ना बुंथियो।

सत्रनि हा खोन्दोयाव सन्देह'गोनां नोगोरारि आरो माखासे जायगायारि सुबुंआबो आयेन बेरेखायै दखल खालामनायखौ अ'जद दैखाङो। ओंखायनो जों मोनसे एसेस खालामनानै सोर सन्देह'गोनां नोगोरारि आरो सोर जायगानि नोगोरारि , बेखौ सिनायनायनि थाखाय आगान लानांगौ। जुदि जायगानि थागिबि नोगोरारिफोरा हा दखल खालामदों अब्ला सोरखारि सायाव पाट्टा होनानै जिउ खांनायनि राहा लानांगौ होन्ना बुंथियो।

Also Read : नोगोरारि‌ सोदांनाय आइननि हेंथायै बक’ , सयगावआव कंग्रेस दोलोनि गोलाव हान्जा सुरनाय हाबाफारि

Also Watch: Minister Himanta Biswa Sarma addresses media ahead BJP Booth Committee President’s Conference