गुवाहाटी,मार्च 09: मुंख्लं मनेस्वर बसुमथारि बिथांनि बिसि सुनमती लोगोसे फिसाजो दिदोमस्रि बसुमथारि आरो नखरनि गुबुन गुबुन सोद्रोमाफोरा 8 मार्च अक्ट’आव गुवाहाटी नोगोरमानि पल्टन बाजार आव थानाय Assam Tourism Development Corporation Ltd मावखनि मिरुआव फैनानै Assistant Tourism Information Officer साख्निरिनि बिबानखौ रुजुनबाय।
“आफानि हादोरनि थाखाय जिउ बावलांनाया ओरैनो थाङा” होन्ना मुंख्लं मनेस्वर बसुमथारि बिथांनि फिसाजो दिदोमस्रि बसुमथारिआ बुङो।
“आंनि फिसाजोआ गावनि गोदान जिउखौ जुरिनो थांगासिनो दं, आं बिथांखौ गावनि जिउनि मोनफ्रोमबो आगानआवनो गावनि बिफानि बोसोनखौ मानिलांनो खावलायदों, आंनि फिसाजोनो खामानि मावलांनो खाबु होनायनि थाखाय आसाम सरकारखौ साबायकर होयो” होन्ना मुंख्लं मनेस्वर बसुमथारि बिथांनि बिसि सुनमती बसुमथारिआ बुङो।
मखनो गोनांदि, थांनाय 14 फेब्रुवारि 2019 अक्ट’खालि जम्मु आरो काश्मीर हादोरसानि पुलवामा जिल्लायाव पाकिस्तान हादोराव जोनोम मोन्नाय जाइस-इ-महामद उदखारि हान्जानि सोद्रोमाया गंसे महिन्ड्र स्करपिय’ गारिआव गासै 350 किल ग्राम लेरथायनि सुइसायद बमा लानानै सीआरपीएफ रौनिया हान्जानि गं 78 गारिफोरजों गासै सा 2,547 रैनिया हान्जाफोरा जम्मुनिफ्राय स्रिनगर थांबाय थानाय समाव लामायाव सोवग्रावहोनानै गोहोगोरा बमाखौ बेरफ्रुहोयो आरो सा 40 निबो बांसिन रैनिया हान्जानि सोद्रोमाफोरा जायगायावनो मुंख्लं जायो। बेनिनो गेजेराव आसाम हादोरसानि सिङाव थानाय बाक्सा जिल्लानि मनेस्वर बसुमथारि बिथांआबो गावनि बेसेन गोसा जिउखौ हादोरनि थाखाय बावनो गोनां जादोंमोन।
थांनाय 3 मार्च 2019 अक्ट’आव जेब्ला मुंख्लं बसुमथारि बिथांखौ स्राधा होनानै जोबथा बिदाय होदोंमोन अब्ला बेनिनो नेरसोन बादियै आसाम हादोरसानि गिबि मत्री सर्बानन्द सनवाल बिथांआ बाक्सा जिल्लानि सिङाव थानाय कलबारि गामिआव थांनानै मुंख्लं बसुमथारि बिथांनि फिसाजो दिदोमस्रि बसुमथारिनो Assistant Tourism Information Officer साख्रिनि लाइजामखौ गथायनानै होदोंमोन।
साख्रिनि लाइजाम आव लिरनाय बादियै मुंख्लं बसुमथारि बिथांनि फिसाजो दिदोमस्रि बसुमथारि बिथांआ बिबानखौ रुजुन्नो थाखाय गावनि मावख’आव आगान होबाय।