आसाम बिधान सभाया डिजिटेलनि लामाजों थांगासिनो दं

गुवाहाटी,डिसेम्बर 18: नेशनेल “ई-भिदान एप्लिकेसन”खौ फोसावनायजों लोगोसे आसाम बिधान सभानि हाउसआव लेखा बिलाइ गोयै (Paperless) नि लामाजों थांगासिनो दं। हादोरसा बिधान सभानि बुंथिगिरि (Speaker) हितेन्ड्र नात गौस्वामि बिथांआ मिजिंथिदोंदि “ई-भिदान” नि मावफारिया लानाय हादोरसायाव फैगौ 2021 माइथायनि जथुमायाव आंबुं महर मोनगोन।

“ई-भिदान”नि मावफारिया लानाया मोनसे मिरु सरकार एबा मिनिसट्री अव पारलियामेन्टारि एफायर (Ministry of Parliamentary Affairs) नि मोनसे मिसन मद प्रजेक (Mission Mode Project), जाय प्रजेकनि गेजेरजों हादोरनि सिङाव थानाय मोनफ्रोमबो हादोरसाफोरनि बिधान सभाफोरखौ लेखा बिलाइनि हेफाजाब गैला लासे (Paperless) खुंफुंनो थाखाय लानाय मावफारिया। बेयो नारेन्ड्र मोडी दैदेन्नाय नेसनेस डेमक्रेटिक एलाइन्स (NDA) सरकारनि डिजिटेल भारत (Digital India)नि मोनसे नाजानाय।

बुंथिगिरि गौस्वामि बिथांआ समबारखालि खौरांगिरिफोरनि सिगांआव बुङोदि “मिनिसट्री अव पारलियामेन्टारि एफायर (MPA)नि बे मावफारिया लानाया मोनफ्रोमबो बिधान सभानि टर्क-बिटर्क जानाय, सोंनाय आरो फिन्नाय, बिल, आयेन आरो गुबुन गुबुन फोरखौ खनसे खमपिउटारनि माउसजों क्लिक खालामब्लानो गोजानाव थानाय सुबुंफोराबो नुनो मोनगोन। मानोना साफ्रोमबो सुबुंफोरा बिधान सभानि सिङाव जिरायनो हानाया गोब्राब, बेनिखायनो बे मावफारिया लानाया सुबुंफोरनि थाखाय गोदान आयेन थिसन्नायफोरनि खौरांफोरखौ गोरलैयैनो मिथिनो मोनगोन आरो डेमक्रेटिक हादोरनि गुनखौ बांहोन” होन्ना बिथांआ बुंबावो।

गौस्वामि बिथांआ बुंबावोदि “ई-भिदान”खौ माखासे हादोरसाफोर फारियै- पान्जाब, हिमाछल प्रदेस, उट्टार प्रदेस, टामिल नादु, करनातका, मध्या प्रदेस, आरो सिक्किमनि एसेमब्लिफोराव खालामगासिनो दं। हादोरसायाव दासान्दि जों मावनो लानाया 2021 माइथायनि बिभान सभानि जथुमायावसो आबुङै महर मोनगोन” होन्ना बिथांआ बुङो।

गौस्वामि बिथांआ बुंबावोदि “थांनाय समाबाराव माखासे ऑफिसार आरो अफिसियेलफोरनि थाखाय digitization नि मावफारियाखौ आन्जाद नायदोंमोन, बे हाबाफारिआव MPA नि माखेस experts आरो नेशनेल इन्फरमेशन चेन्टारनि माखासे एक्सपार्ट बिथांमोनहा नुजाथिदोंमोन। बिधान सभानि जथुमाखौ डिजिटेलाइस खालामनो थाखाय जोंनो माखासे एक्सपार्टफोरनि हान्जा नांगौ, लख सभा आरो राज्य’ शभानि आनगायैबो हादोरसानि मोन 40 बिधान सभा जथुमानि थाखाय भारत सरकारा गासै 744 कौटी रां दोनखाबाय”।

जेब्ला गौस्वामि बिथांनाव एसेमब्लिनि गोजाम रिकर्डखौ लानानै सोंथि सोङो, अब्ला बिथांआ बुङोदि “मोनफ्रोमबो गोनां लिरबिदांफोरखौ थिनानै दोनगोन”।

गौस्वामि बिथांआ NeVA होन्नाय मोनसे मबाईल App नि सोमोन्दै मिथिहोयो, NeVA App आ मोनसे Website नङै एप्लिकेशन जायनि गेजेरजों Website नि दाटाफोरा बोहैलांबाय थागोन, बेखौ बाहायनो थाखाय जोबोद गोरलै आरो रोंगौथि गोयै सुबुंआबो बुजिनो हागोन होन्ना बिथांआ मिथिहोयो।

Workshop एबा गियान बुथुमनाय हाबाफारिखौ बेखेवनानै बिथांआ बुङोदि बिधान सभाखौ डिजिटेलाइस खालामोब्ला साफ्रोमबो सुबुंफोरनि थाखाय मिथिनो मोन्नाय जागोन, जाय खामानिआ खुंथायखौ मोजाङै खुंफुंनायाव बिहोमा होगोन आरो बे समावनो आयेन दागिरिफोरनि थाखाय मोजां जागोन होन्ना बिथांआ बुङो।

बिथांआ आसाम बिधान सभानि साफ्रोमबो ऑफिसार आरो मावथि सोद्रोमाफोरखौबो “ई-भिदान” खौ सोलोंनानै लानो थाखाय खावलायो।

मिनिसट्री अव पारलियामेन्टारि एफाय़रनि अरपिटा ट्यागि बिथांआ प्रेजेन्टेसननि गेजेरजों बुङोदि “हादोरनि मोन्नै हाउसजों लोगोसे मोन 36 एसेमब्लिफोराव बोसोरफ्रोमबो गासै 2 लाख सोंथि सोंनाय जायो आरो गासै 2000 कमिटि रिपर्ट आरो 1 लाखसो फेपारफोर थायो। जुदि आंबुङै NeVA App आ सोलिगोन अब्ला बियो मोनसे गियाननि फुंखा जागोन, जायखौ हाउसनि मेम्बारफोरनि अनगायैबो रिसार्ज स्कलार, सोलोंथाय फसंथान, मेडिया आरो सुबुंफोराबो गोरलैयैनो मोन्नो हागोन"।