एन.आर.चीखौ लानानै दिस्पुर लास्ट गेटआव धर्ना

गुवाहाटी,सेप्तेम्बर 25: समबाराव आसाम बिधान सभानि जथुमाया जागायनाय लोगो लोगो गोबां सुबुं हान्जाफोरनि दैदेनगिरि आरो सोद्रोमाफोरनि थैआ गोदौखांदों। बेबादिनो हादोरसानि एन.आर.ची सोदांनाय खामानिखौ नोजोर होनानै दिस्पुरनि लास्ट गेटआव धर्ना।

मोन 14 गुबुन गुबुन बेंगलि आफादफोरनि हेफाजाब होनायाव Bengali Joint Coordination Committee आ समबाराव धर्ना होनानै बुङोदि, “एन.आर.चीनि मुं सोदांनाय खामानिफोराव 1971 माइथायनि 25 मार्च दाननि सिगां दिहुन जानाय जायखिजाया फोरमान बिलाइखौनो एन.आर.चीनि खामानिआव गनायनानै लानांगौ”।

बिथांमोनहा दाबि होबावोदि, ‘सनदेह गोनां एबा ‘D’ Voter फोर जायफोरा नांगौबादि फोरमान बिलाइ होनो हायो बिथांमोनखौ एन.आर.चीनि फारिलाइआव दैखांनांगौ’ लोगोसे खमिटीआ बुंबावोदि, जायफोरनि मुंखौ बिजिरसालिआ नोगोरारि एबा भारतारि होन्ना फोसावदों बिथांमोनखौ जेरैखि जाया एन.आर.चीनि फारिलाइआव दैखांनांगौ होन्ना दाबि होबावो।

बिथांमोनहा एन.आर.चीनि मुङाव बेंगलि हारिनि सायाव नारसिन्नायखौ बन्द खालामनांगौ होन्ना होस्रिखावना स्लगान होबावदों। लोगोसे बिथांमोनहा दानि एन.आर.चीखौ दैदेन्नय प्रटिक हाजेला बिथांखौ मासिनिफ्राय बोख्लायनांगौ होन्ना दाबि होबावदों।