एनआरचीआव मुं थिसनफिन्नाय आरो अजद होनायफोरखौ से थाखोनि ऑफिसारफोराल’ नासबिजिरगोन

गुवाहाटी,नवेम्बर 30: हादोरसा नेशनेल रेजिस्टार अव चिटिजेनशिव (NRC) नि गोनां हाबाफारि बादियै मुं थिसनफिन्नाय आरो अजद होनायफोरखौ नायसंफिन्नाय खामानिआ थाथनानै दं। बे हाबाफारखौ फैगौ बोसोरनि 1 फेब्रुवारिनिफ्राय मावफुंगोन होन्ना मिथिनो मोन्नाय जायो। बेफोर खामानिखौ गोरोन्थि गोयै खालामनो थाखाय स्टेनदार्ड ऑफारेशन प्रचिदियुर (SOP) नि सुफुं बिलाइ गथायनाय जादोंमोन जाय बिलाइखौ जौसिन बिजिरसालिआ गनायथि होदोंमोन।

SOP खौ मिरु सरकारनि नखर बिफान आरो आसाम सरकारजों लोगो नांनानै NRC कर्डिन्टर बिथांजों लोगोसे बानायनाय जादोंमोन। SOP नि बादिब्ला NRC आव मुं थादेरनाय आरो बोखारनायफोरखौ गोरोन्थि गोयै खालामनो थाखाय मुं थिसनफिन्नाय आरो अजद होनायफोरखौ थाखो 1 (Class-1) ऑफिसार फोराल’ नायनो हागोन।

थाखो-1 नि ऑफिसारफोरानो मोनफ्रोमबो जिल्ला मेजिस्ट्रेड (DCs) नि नायगिरि ऑफिसारनि गनायथिखौ मोनगोन। जिल्ला आरो साब-डिभिसनफोरनि ऑफिसारफोरा जाबाय- आसाम चिभिल चार्विसनि ऑफिसार, जाय बिथांआ एक्झुकेटिव मेजिसट्रेडनि खामानि मावगासिनो दं, हाग्रा बिफान्नि थाखो-1 ऑफिसार, ब्लक जौगाखां ऑफिसार (BDO) आरो पन्चायत बिफान्नि थाखो-1 नि ऑफिसार, लोगोसे गुबुन गुबुन बिफान्नि थाखो-1नि ऑफिसारफोरा NRC नि SOP बिलाइआव मुं थिसनफिन्नाय आरो अजद होनायफोरखौ सोंनाय फिन्नाय लागोन।

आसाम सरकारा थाखो-1 नि ऑपिसारफोरखौ हादोरसायाव गासै 1,500 निफ्राय 2,500 सिम खालामगोन होन्ना मिथिनो मोन्नाय जायो।

हादोरसा NRC बिबानगिरिआ मुं थिसनफिन्नाय आरो अजद होनायफोरखौ मावफुंनो थाखाय सम आरो जायगाफोरखौ फोसाव बिलाइनि गेजेरजों फोसावगोन।

मखनो गोनांदि, SOP नि सुफुं बिलाइफोरखौ सुफुंनानै जमा होनाय आरो अजद होनायफोरा थांनाय 25 सेप्तेम्बर दाननिफ्राय सोलिबोगासिनो दं आरो 15 डिसेम्बरसिम सोलिबाय थागोन होन्ना मिथिनो मोन्नाय जायो।

एनआरचीनि आबुं फारिलाइखौ थांनाय 30 जुलाइ 2018 आव फोसावदोंमोन। गासै 3,29,91,384 सुबुंफोरनि गसर थिसन्नायनि मादाव 2,89,83,677 सुबुंफोरनि मुंफोरा नुजादोंमोन। बुंनो थाङोब्ला गासै 40.07 लाक सुबुंफोरनि मुंफोरा आबुं फारिलाइआव नुजायाखै।