क’कराझार,मार्च 09: आसाम हादोरसानि गुबुन गुबुन जायगाफोराव हादोरनांआरि आयजो सान फालिनायजों लोगोसे बड’लेन्ड हालामनि क’कराझार जिल्लानि सिङाव थानाय गुबुन गुबुन जायगाफोरावबो गुबुन गुबुन हाबाफारि लानानै हादोरनांआरि आयजो सान फालिदों।
क’कराझार ओनसोलनि “नेरसोन” मुंनि बे-सरकारि (NGO) आफादआ क’कराझारनि गोजोन देरा नेरसोन मिरुआव हादोरनांआरि आयजो सान फालिनानै क’कराझार आरो गसाइगांव ओनसोलफोरनि मुवा बेसाद फानग्रा आयजोफोरनि गेजेराव सायखनानै 8थि “आयजो फालांगि बान्था 2019” एबा Woman Entrepreneur Award 2019 बान्थाखौ गसाइगांव ओनसोलावनि सिलगागुरि निलाझरा गामिनि थागिरि रिना बसुमथारि बिथांनो गथायो।
8थि “आयजो फालांगि बान्था 2019”नि गेजेरजों मान बावनानै गासै 10,000 रां गथायो।
“नेरसोन” बे-सरकारि आफादनि बोसोनगिरि राजु नार्जारि बिथांआ बुङोदि, 8थि “आयजो फालांगि बान्था 2019” खौ रिना बसुमथारिनो होनाय जाबाय। बिथांआ गावनि जिउआव फैनाय दावराव दावसि, हारिनि जेंना, नखरनि जेंनाफोरनि जाहोनाव गावनि फिसायजों नखरनिफ्राय होखार हरजादोंब्लाबो बिथांआ बेफोर जेंनाखौ सौसिनानै गावनि राफोद गोसोखौ लानानै गावनि जिउखौ दैदेनलांनो थाखाय मैगं-थायगंनि फालांगि खालानानै गसंथानो हादों। बिथांनि साफ्रोमबो गथ’फोरा रोंगौथि गोनां आरो खामानिफोराव नांथाबनानै दं”।
“बिथांआ गोथौ गामिसिङाव थानाय रोंगौथि गोयै आयजोब्लाबो गावनि गोहोखौ समाजआव दिन्थिफुंबाय। गावनि बेफोरबादि मावनायनि गेजेरजों ‘गोसो जायोब्ला आयजोफोरा मावनो हायै जेबो खामानि गैया’ बाथ्रानि बिदिन्थिखौ दिन्थिफुंबाय” होन्ना बिथां नार्जारिआ बुंबावो।
थांनाय 8 बोसोर सिगांनिफ्रायनो “नेरसोन” बे-सरकारि आफादआ आयजो फालांगिरिफोरनि गेजेराव थुलुंगाखांनाय लाबोनो थाखाय आयजो फालांगि बान्थाखौ होबोगासिनो दं।
हादोरनांआरि आयजो सान फालिनाय समाव साहित्य एकाडेमि बान्था मोनगिरि जयस्रि बर’ आरो फोरोंगिरि बिनापानि ब्रम्ह, बुंथिगिरि ड: सुजाता भाड्रा, ड: प्रबिर ब्रम्ह आरो गुबुन गुबुन बिथांमोनहाबो नुजाथिदोंमोन।
फारसेथिं क’कराझार जिल्ला महिला समिटि, लाइमोन आफाद, फरासा आफाद आरो सांग्रांथि गोनां सुबुंफोराबो हादोरनांआरि आयजो सानखौ बायदि बायदि हाबाफारि लानानै फालिदोंमोन। बिथांमोहा क’कराझार सरकारि फरायसालिमानिफ्राय गोदान फ्लाइअभारसिम अनलाइननि गेजेरजों आयजोफोरखौ जेंनायाव खोख्लैनायनि हेंथायै हान्जा सुरदोंमोन होन्ना मिथिनो मोनबावनाय जायो।