गुवाहाटी मुलुग सोलोंसालिनि थाग्रा खुलि सिङाव सासे हिन्जावसाया जिउ फोजोबना लानो नाजादों

गुवाहाटी,सेप्तेम्बर 18: सा-सान्जा ओनसोलफोराव जिउ फोजोबना लानायनि हारआ थांनाय माखासे बोसोरफोरनिफ्राय बांलांबाय थानायखौ नुनो मोनदों। मंगलबाराव गुवाहाटी मुलुग सोलोंसालिनि RCC 7 हिन्जावसाफोरनि थाग्रा खुलिनि मासटार दिग्रि फरायगासिनो थानाय सासे हिन्जावसाया जिउ फोजोबना लानो नाजानायखौ सोलोंसालिनि फरायसाफोरा रैखा खालामनो हायो।

खौरां मोन्नाय बादिब्ला, सासे समान थाखोआवनो फरायग्रा हिन्जावसाया फोरमायोदि, जिउ फोजोबना लानो नाजानाय हिन्जावसाया फुंनिफ्रायनो गावनि थाग्रा खथाखौ बन्द’ खालामनानै सिरियै थादोंमोन अब्ला माखासे हिन्जावसाफोरा मिथिनानै सांग्रां जायो आरो हिन्जावसाफोरा बन्द’ खालामनानै थानाय हिन्जावसानि दर्जाखौ सिफायनानै सिङाव हाबलाङो।

हिन्जावसाया जिउ दंबावोमोनब्लाबो जोबोर गाज्रि जेबो थाल गोयै जाबायमोन, लोगो लोगोनो हिन्जावसाखौ फाहामथाय होनो थाखाय GMCH दोहा फाहामसालिआव लानानै थाङो।

माखासे थाग्रा खुलिनिनो हिन्जावसाफोरा फोरमायनाय बादिब्ला हिन्जावसाया 3थि सेमिस्ताराव फरायफुबाय थानाय लांखानि होन्ना मिथिनो मोनदों।

सेंन्टिनेलनि खौरांगिरिनि सिगाङाव बुङोदि, गुवाहाटी मुलुग सोलोंसालिनि फरायसुलिफोरा हिन्जावसानि मुं मखनायखौ लुबैआखै आरो दासान्दि गिनांगौनि बाथ्रा गैला।