गुवाहाटी,नवेम्बर 19: आसाम हादोरसानि सिङाव थानाय ट्रायबेल बेल्ट आरो ब्लकखौ गोदानै आयेन सोदांनानै गोख्रोङै होबथानो थाखाय आसाम सरकारा मावफारिया लागासिनो दं। जेरै आयेन बेरेखा हा दखल खालामनाय, हा फान्नाय आरो मुं दानस्लायनाय फोरखौ गोख्रोङै होवथानो मावफारिया लागासिनो दं।
बैफोर आयेनखौ गोदानै सोदांनो थाखाय हादोरसानि गिबि मनट्री सर्बानन्द सनवाल बिथांआ मोनफ्रोमबो रिभेनिउ बिफानफोराव (Revenue Department) बिथोन हरखाबाय। जेब्ला सनवाल बिथांआ गोदान हानि पलिचि (New Land Policy) सोदांनाय खामानिफोरा बेसेबां आवगायखो बेनि फारसे नायसंनायाव नुनो मोनोदि ट्रायबेल बेल्ट आरो ब्लकफोराव गोबां नोगोरारि नङै सनदेह’ गोनां सुबुंफोरा आयेन बेरेखायै आरो समाज बेरेखा हा दखल खालामनानै थागासिनो दं, बैफोर सुबुंफोरखौ गोदान हा आयेननि हेफाजाबजों बोखारनो लुबैयो।
गिबि मनट्रीआ मोनफ्रोमबो ट्रायबेल बेल्ट आरो ब्लकनि सिङाव थानाय रिभेनिउ बिफानफोराव बिथोन हरनाय बादियै ट्रायबेल बेल्ट आरो ब्लक ओनसोलफोराव साट्रा हा एबा Xatra Land फोरखौबो लोगोआव होबथानानै दोन्नो खावलायहरदों आरो बेबादियैनो गोदान हानि आयेन सोदांनाय खामानिआ सोलिगासिनो दं होन्ना खौरां मोनबावनाय जायो।
आसाम हादोरसायाव थानाय मोन 17 ट्रायबेल बेल्ट आरो मोन 30 ट्रायबेल ब्लकफोराव गासै 85,80,842 बिघा दं। बेफोर फैलाव गुवार हाफोरखौ भारत उदांस्रि जानाय लोगो लोगोनो ट्रायबेल सुबुंफरनि मुंआव नामजारि खालामनानै दोन्नाय जादोंमोन। बेनिनो गिबिसिन हिसाबै भारत सरकारा 1947 माइथायनि 5 डिसेम्बर दानाव दानि सिदली ओनसोलखौ फोसावनानै होदोंमोन अब्ला बै समाव सिदली ओनसोला गवालपारा जिल्लानि सिङाव दंमोन। बेबादिनो फारि फारियै भारत सरकारा ट्रायबेल सुबुंफोरखौ रैखाथि होनो थाखाय माखासे ट्रायबेल सुबुंफोर आवग्रिनानै लानाय जायगाफोरखौ ट्रायबेल बेल्ट आरो ब्लक ओनसोल हिसाबै फोसावलाङो। जेरै- 1948 माइथायनि 28 एप्रिल दानाव दानि लक्किमपुर जिल्लाखौबो नैथि खेबनि थाखाय ट्रायबेल बेल्ट आरो ब्लक ओनसोल हिसाबै फोसावो। 1948 माइथायनि 12 जुलाइ दानाव दानि दरं जिल्लाखौबो ट्रायबेल सुबुंफोरनि रिजार्व हा एबा ट्रायबेल बेल्ट आरो ब्लक ओनसोल हिसाबै भारत सरकारा फोसावदोंमोन।
सनदेह’ गोनां गुबुनारि बांग्लादेसि आरो ट्रायबेल नङै सुबुंफोरखौ ट्रायबेल सुबुंफोरनि मुंआव थिखानानै दोन्नाय ट्रायबेल बेल्ट आरो ब्लकफोरनिफ्राय बोखारनो थाखाय गुबुन गुबुन हारि माहारि आरो आफादफोरा समजों लोगोसे धर्ना होबोगासिनो दं। ट्रायबेल बेल्ट आरो ब्लक सिङाव आयेन बेरेखायै थाफैनाय, हा फान्नाय आरो मुं दानस्लायनायफोरखौ जों गोबां नुनो मोनो। बेफोर जाहोननि थाखायनो गोबां गुबुन गुबुन ट्रायबेल हारिनि सुबुंफोरा आसाम हादोरसाव 100 बोसोर राज्यो जाबोदोंब्लाबो दासिमबो हानि फोरमान बिलाइ एबा हानि पाट्टाफोरखौ मोन्नो हायाखै आरो सरकारि जौगाखां खाबुफोरखौ लानो हायाखौ। जायनि जाहोनाव हानि फिसाफोरा हा गैया लासे राज्यो जाबोनो गोनां जादों।
हानि गोदान आयेन एबा पलिचीआ थियारि जाखाबाय, नाथाय हादोरसायाव थानाय थागिबि सुबुंफोरनि हानि रैखाथि होनो थाखाय रिभेनिउ बिफाना गिबि मनट्रीनि बिथोन बादियै मावफारिया लागासिनो दं। रिभेनिउ बिफानाबो गोदान हानि आयेनखौ हादोरसायाव सोदांनो थियारि जाखाबाय नाथाय गिबि मनट्रीनि जोबथा गनायथि आरो आयेन Seal Approval खालामनायखौ नेथनानै दं होन्ना खौरां मोन्नाय जायो।