क’कराझार,फेब्रुवारि 1: थांनाय 2008 माइथायनि 30 अक्टबरखालि आसामाव लारियै बमा बेरहोनानै सा 88 सुबुंफोरनि जिउ फोजोबनायजों लोगोसे सा 540 निबो बांसिन सुबुंफोरखौ जखम खालामनायाव लोब्बा थानायनि दाय होनानै NDFB नि गायसंगिरि आरो आफादगिरि रन्जन दैमारिजों लोगोसे सा 14 दैदेनगिरिफोरखै आसामनि CBI नि कोर्ड अव स्पेसियेल जार्जआ 28 जानुवारिखालि खाफिन्नायखौ गोबां बर’ दैदेनगिरिफोरा खुंद्रिखांदों आरो मिरु सरकारजों गोजोन सावरायनाया सोलिफुबाय थानाय समावनो बेबादि खानाया मा जाहैनो हागौ बेखौ सानदांनाय फोरमायदों।
दाय जाबसिनजानाय NDFB दैदेनगिरिफोरनि गेजेराव दं- रन्जन दैमारि एबा डि आर नाब्ला, जर्ज बर’ एबा बि जोंखां, अजय बसुमथारि एबा बि अगय, राहुल ब्रम्ह एबा खर्गेशर ब्रम्ह, राजेन गयारि एबा जि रिफिखां, मथुराम ब्रम्ह, राजु सरकार, प्रबाद बर’ एबा थाफा, अनसाय बर’ एबा अजिद बड’, निलिम दैमारि, इंन्ड्र ब्रम्ह, लख्रा बसुमथारि, जयन्ति ब्रम्ह एबा जुगामि, आरो बि थराय एबा बैसागी। बिसोरखौ आनल’फुल ओकटिभिटिस प्रिभेन्सन एक्टनि सेक्सन 120 (बि) 302, 324, 326, 435, 436 आइ पि सी, 10/13/16/20 नम्बर आरो 3/4 एक्सप्लसिव साबस्तेन्स एक्टनि दायाव खाफिन्नाय जादों। फारसेथिं नांगैबादि फोरमान मोनैनि म्रिदुल गयारिनो बिजिरसालिआ ‘बेनेपिट अव दावत’ जों सख’नाय जायो।
रायखांनो गोनांदि 2008 माइथायनि 30 अक्टबरखालि गुवाहाटी नोगोरमानि गनेशगुरि, पानबाजार, आरो चि जे एम कोर्ड, बरपेटा, बंगाइगांव, आरो क’कराझार आव गोबां बमा बेरहोनाय दायखौ सं दान्नानै CBI आ NDFB नि रन्जन दैमारिखौ लाफानानै गासै सा 22 सुबुंफोरनि हेंथायै 2009, 2010 आरो 2011 माइथायाव चार्ज सीट होदोंमोन। बिसोरनि गेजेराव सा 7 सोद्रोमाफोरा दासिमबो खारखोमानानै दं आरो सा 7 नि गेजेराव सासे एबा सानैखौ थैबाय होन्नानै सान्नानै लानाय जादों। चार्ज सिटआव सा 650 नुगिरिफोर आरो मोन 687 मोरमानलाइ आरो खाजानायफोरनि सिमान जानाय बिलाइफोरखौ होनाय जादों।
थांनाय 2010 माइथायनि मे दानाव दैमारिखौ खानाय जादोंमोन। अदेबानि 2013 माइथायाव मिरु सरकारजों गोजोन सावरायनायाव बाहागो लानायाव CBI आ हेंथा गैया होन्नायनि उनाव दैमारिखै जामिनआव हगारफिन्नाय जादोंमोन नाथाय 28 जानुवारि 2019 खालि बिथांखौ फिन खाफिन्नानै गुवाहाटीनि मिरु जोबथेसालिआव लांफिन्नाय जाबाय।
फारसेथिं, ससियेल पाब्लिक प्रसेकिउटर टि डि गैस्वामिआ बुङोदि, राज्योआ दायनिगिरिनि जिउ फोजोबनायखौ लुबैदों।
बर’ उइमेन जाशतिस परामनि आफादगिरि आरो दैमारिनि बिनानाव अन्जालि दैमारिआ बुंदोंदि, NDFB आ भारत सरकारजों जेंना सुस्रांनो गोजोन सावरायनायाव बाहागो लागासिनो दं। फारसेथिं गोजोन सावरायनाय आरो फारसेथिं दाय जाबसिन्नानै खानाय बेबादि मोन्नै रोखोमनि बिजिरनाया मोनसे समावनो स्रेङै थांनो हाया। बिथांआ बुंबावोदि, सरकारनि बेबादि खामानिजों जेंना सुस्रांनाया जाथाव नाङा।
NDFB नि गाहाय नेहाथारि बि अन्जालुआ गांसे रादाब बिबुंसाराव बुंदोंदि, केस नं 59 (के), 2011 खौ लानानै 28 जानुवारिखालि CBI आ NDFB नि आफादगिरि रन्जन दैमारिखौ गोजोन सावरायनाया सोलिफुबाय थानाय समाव खाफिन्नाया जोबोद खाफाल हावरियानि बाथ्रा। दैमारिजों लोगोसे खाजानाय सा 14 सोद्रोमाफोरा गोजोन हासथायसुला बर’ सुबुं आरो आफादआ मिरु सरकार आरो आसाम सरकारजों थांनाय 2013 माइथायनिफ्रायनो गोजोन सावरायनायाव बाहागो लाबोगासिनो दं। आफादआ 2013 माइथायनि 29 नभेम्बरनिफ्राय दावहा दोनथ’नाय रादाय खालामखांनाय उनाव ए बि माटुरनि गेजेरनि रायस’गिरि जानायाव गोजोन सावरायनायाव बाहागो लागासिनो दं होन्नानै बिथांआ बुङो।
बि अन्जालुआ बुंदोंदि, CBI नि बे खाफिन्नाया गोजोन सावरायनायनि इउनखौ मोखां खालामनाय नङा। बिथांआ बुङो गोजोन सावरायनाय समावबो बेनि आफादगिरिआ जोबथेसालिआव थांनांनाय जायोब्ला मिरु सरकारनि जेंना सुस्रांनायाव गोसो थानायखौ फिन नायफोरनो आरो गोजोन सावरायनायनि थांखियै सान्नानै नायफिन्नो गोनां जागोन।
फारसेथिं BTC नि गाहाय खुंगिरिआ खौरांगिरिफोरनि सिगांआव बुङोदि, गोजोन सावरायनायखौ नायनानै आरो सुबुंथिनि खाथिराव गाव राज्यो राजाफोर दाबि दैखांलानाय बादि फासि होनायखौ लुबैया। राज्यो सभानि बार्ग MP उरखाव गोरा ब्रम्हआ बुङोदि, गाव बिजिरसालिनि बिजिरनाय खान्थिआव हाबसन्नानै बुंनो सानाखै नाथाय NDFB नि आफादगिरि रन्जन दैमारिखौ फासि होनाय एबा जिउ फोजोबजासे साजा होनायखौ माब्लाबाबो लुबैया।
गुबुन फारसेथिं एबसुनि आफादगिरि प्रम्द बर’ बिथांआ बुङोदि, रोर्टआ NDFB नि आफादगिरि रन्जन दैमारिखौ गोजोन सावरायनायाव बाहागो लानाय समाव हरखाब दाय फोनांनानै खाफिन्नायखौ फरायसा आफादआ सोमखिखांनाय आरो गोमोनाय मोनदों। गोजोन सावरायनाया सोलिबाय थानाय आरो बिथांनि दाय नागिरबाय थानाय खेबसेयैनो समान समान थांनो हाया होन्नानै बिथांआ बुङोदि, गोजोन सावरायनाया सोलिफुबाय थानाय समाव हादतआव जाफेरै जाथायखौ फार्सेल’ नोजोर लानायनै सरकारा गोदान बिदिन्थि लाबोनो नाजानायखौ गारनांगौ।
बिथांआ बुंबावोदि, हादतआव बबेबा मोनसे बिग्रायारि हान्जानि दैदेनगिरिखौ जिउ फोजोबनाय साजा होनायनि बिदिन्थि गैया। बिथांआ भारत सरकारखौ बे बिथिंखौ नोजोर होनानै दैमारिनि साजाखौ फुरैनानै बर’फोरनि गोलाव समनि जेंनाखौ थाबैनो सुस्रांनो आरो बड’लेन्ड हालामाव अरायथा गोजोन गायसंनो खावलायो।