बाथौ धोरोमआ गुबुन धोरोमफोरनिफ्राय गोजामसिन धोरोम: बिस्वजित दैमारि

गरेस्वर,फेब्रुवारि 5: बाथौ धोरोमआनो गुबुन धोरोमफोरनिफ्राय बयनिख्रुयबो गोजामसिन धोरोम। बाथौ धोरोमनि जोनोमखौ बिजिरगिरि आरो सानथौगिरि बिथांमोनहाबो दिनैसिम नायबिजिरनानै दिहुननो हायाखै, गोजौ सोलोंथाय लानानैब्लाबो जों बुहुमनि गोबां बाथ्राफोरखौ मिथिजोबनो हाया। रोजा रोजा बोसोर सिगांनिफ्रायनो बाथौ धोरोमआ बुहुमनि सोरजिथाय, जिउ आरो समाज दानायाव सोलोंथाय होबोगासिनो दं” होन्ना राज्य’ सभानि MP बिस्वाजित दैमारि बिथांआ बुङो।

खौरां मोन्नाय बादिब्ला बिथांआ बाक्सा जिल्लानि सिङाव थानाय गरेस्वर ओनसोलनि माइनाव फोथारआव गरेस्वर आन्चलिक बाथौ महा सभायाव सान्जा बाक्सा जिल्लाजों खुंफुंजानाय सनाथि माइथाय फोर्बोनि गेवलां जथुमाखौ रबिबाराव बेखेवनानै बे बाथ्राखौ बुङो।

गेवलां जथुमाखौ सान्जा बाक्सा जिल्ला बाथौ महा सभानि आफादगिरि कबिन्ड्र बर’ बिथांआ सामलायदोंमोन। बिस्वजित दैमारि बिथांआ गेवलां जथुमायाव बुङोदि, भारत हादोरआव गासै 40 लाख बाथौ धोरोम सिबियारिफोर दंङोब्लाबो भारत सरकारनि गनायथि मोनाखै। दुलायार बाथौ महा सभानि आफादगिरि मन्तु मुछाहारि बिथांआ गाहाय आलासि महरै बाहागो लानानै बिथांआ बुङोदि, बाथौ धोरोमनि गेजेराव माखासे सोलायनाय लाबोनांसिगौ। दुलाराय बाथौ महा सभानि गाहाय नेहाथारि सतिस चन्ड्र रामसियारि बिथांआ थांखिजानाय बुंथिगिरि हिसाबै बाहागो लानानै बुङोदि, बोथौ धोरमनि गुबै सान्थौआनो जाबाय- हा, दै, बार, अर आरो अखोरां। बेसोर मोनबा गोहोआ गैयाब्लानो बुहुमाव जेबो गोया आरो जिब जुनारफोरा थांनानै थानो हाया। बाथौ धोरोमनि सानथौआ मोनसे बिगियान होन्ना बिथांआ बुंलाङो।

सोनाब बेंगल बाथौ धोरमनि सुबुं फोनांजाब नेहाथारि सुरेस इसअवारि, हादोरनि बार्ग सोलोंथाय बिफान्नि मंत्री तानेस्वर बर’, बाथौ धोरोमनि लिंथुमगिरि दिला सिभ बिथांमोनहाबो बाथौ धोरोमनि सोमोन्दै मेहेरगोनांङै बुंथियो।

सावराय जथुमायाव भुटान हादोरनिफ्राय फैनाय बिथांमोनहा भुटानिस मोसानाय, केराय मोसानाय आरो बागुरुम्बा मोसानायफोरखौ दिन्थिफुंनाय जादों होन्ना खौरां मोनबावनाय जायो।