बावलांजानो हमनाय बर’फोरजों बाहायजाग्रा माखासे आग्जुफोर

थांनाय बिसान्निफ्राय

गुवाहाटी,डिसेम्बर 31: बावलांजानो हमनाय बर’फोरजों बाहायजाग्रा माखासे आग्जुफोरखौ फोसावनानै होनाय जाबाय।

सान्दांगा: सान्दांगायाबो औवानि फिसा फिसा जिरनाय खाथिजों बानायजानाय सान्द्रिनि महरसे नाथाय बेयो सान्द्रिनि गोबां गेदेरसिन आरो बेनि गब्लंफोरा गुवार गुवारसिन। मारा होखांनाय माइ, सबाय, सिबिंफोरनि थालांनाय जिगाब बायफ्लेनाय एबा नाङै गुन्द्राफोरखौ सान्दांगाजों सालिख’नाय जायो।

फार्ला-अन्थाय: गावनि मावनाय जायखिजाया आबाद जेरै- माइ, फाथो, बेसर सिबिं, आलु, हायजें, हाल्दै आरो जायखिजाया गिलिर बेसादफोरखौ जखा खालामनो थाखाय सुनाय खामानिआव बाहायनाय जायो। फार्लाखौ रायदों बिफांजों हेबनानै दग्रग्र कालामनाय जायो। दंपांनि दान्दा गज’नि गेजेर आरो समान बाहागोआव फाथोजों बानायनाय मोनसे हमग्रा आखाय थायो आरो बे आखायाव हमनानै फारनै बाहागोनि गुबुन फारसेथिं अन्थाय आरो गुबुन फारसेथिं मुवा बेसादफोरखौ दोन्नानै सुनाय जायो।

द’न: फार्ला अन्थाय सुग्रा ओंखारनायनि सिगांआव बर’फोरा माइ एबा गुबुन गुबुन मुवा बेसादफोरखौ जखा खालामनानै द’नजोंसो सुनानै रान्नाय जायोमोन एबा सोलाय सोल’ खालामनाय जायोमोन। बेखौ औवानि फिसा फिसा खाथिजों हेबनानै थग्रं खालामो आरो गोबोरखि गोथांजों लिरनानै गोरान खालामनाय जायोमोन। बेयो खुरै महरनि आरो थालायाव दोरोदनो हायैनि बेंखन महरनि फजग्रा खामि खाथाबनाय जायो।

जेखाय: फिसा फिसा दै एबा दुब्लिफोराव आथिंजों जुग्रुबनानै ना हमनो थाखाय बाहायनाय आगजुखौनो जेखाय होन्नानै बुङो। बेखौ औवानि थेवोलजों हेबनानै बानायनाय जायो। बेनि मोखांआ आखान्थिथाम महरनि फिसा फिसा ना, नाथुर गलांनो हायैबादि बेखौ रोजायै हेबनाय जायो। मोखांनि आखान्थिथामजों खामि खानानै गोजौथिं आखाय बानायनाय जायो आरो फारनै गाहायाव दुरुं खानानै बोखांनो हाथाव खालामो।

क’बाय: दैमा, दैसा, हाखर गाथोन, बिलो गरखाय, दुब्लि जेरावखि जाया ना सारनानै, गुरनानै बोन्नानै, सानानै, गोग्रोमनानै एबा हमनानै मोन्नाय नाखौ लाग्रा आगजुखौनो क’बाय बुङो। बेखौ औवाजों हेबनाय जायो आरो हेवनो थाखाय औवाखौ गिबिआवनो फिसा फिसा खाथि जिरग्रोनानै लानाय जायो। बेयो थाला फार्से जेजुलि बासा बादि गुवार आरो गोदोनायाव एसे जोरदों खालामनानै मोखांखौ एसे गुवार खालामफिन्नाय जायो। बेखौ औवानि खाथिजों गोबों हेबानायनि थाखाय दैआल’ गलांनो हायो नाथाय फिसा फिसौ नाफोरा गलांनो हाया। बर’फोरा बायदि रोखोमनि क’बाय हेबनाय जायो। दै गेदेराव ना गेदेर गेदेर हनो खबाय बानायो आरो सरासनस्रायै खबायखौ फिसा फिसा हेबनाय जायो।

दामग्रा आगजु

सेरजा: बर’फोरनि मोन 5 गाहाय गाहाय आगजुफोरनि गेजेराव सेरजा मुंनि दामग्रा आगजुआ गोनांथार दामग्रा आगजु। बेयो बर’फोरनि मेथायफोरखौ गोरोबफ्लेनाय आरो मखजाथावसिन आगजु। बेखौ सिथ’ना बिफां एबा गुबुन रायदोब दंफांजों दान्नाय जायो। बेखौ गाहायाव दन्द्रा गोनां खालामनानै गोजौथिं सेरजा हुग्रा फेंनो फिसा खर’ थायो आरो दोंब्रै दुरुंखौ गाहायनि खिख्लांनिफ्राय खर’नि खिला मोनब्रैआव बोखथोंनाय जायो। बे मोनब्रै दुरुंआव हुनो सेरजा आखाय थायो। सेरजा आखायनि दुरुंखौ आगुआव अदाल बिगुरजों बानायनाय जायो।

सेरजानि गाहायनि दन्दरखौ मोफौ बिगुरजों थुमनाय जायो आरो मोनब्रै मोनबा गुदुं फिसा फिसा आसिजों सौनाय जाया मानोना सौवोब्ला बर’ मेथायनि देंखोजों गोरोबजोबा।

सिफुं: सिफुंआबो मोनबा गोजाम दामग्रा आगजुफोरनि गेजेराव जोबोरैनो एंगारहायै आरो गोरोबफ्लेनाय मोनसे रोखोमनि दामग्रा आगजु। बेखौ फिसा औवा फर’खौ फारसेथिं गान्थि मोनसे लाफानानै गुबुन फारसेकौ लांदां खालामनानै दान्नाय जायो। अदेबानि बर’फोरनाव मोन्नै रोखोमनि सिफुं दं। बेनि मोनसेआ सरासनस्रा सिफुं एबा सिफुं फिसा आरो गुबुन मोनसेआ खेराय सिफुं।

सरासनस्रा सिफुंहा खर’ एबा गान्थि खाथिआव सुग्रा गुदुं दोंसे आरो गेजेरनिफ्राय फारसेथिं मोन 6 गुदुं थायो। बबेखानि खेराय सिफुंहा मोन 5 ल’ गुदुं थायो। खेराय सिफुंहा सरासनस्रा सिफुंनिफ्राय गोलावसिन जायो।

खाम: बर’फोरनि मोन 5 गुदि दामग्रा आगजुफोरनि गेजेराव बेयो गोमखांहोग्रा मोनसे आगजु। बियो बयनिबो बिखा बिख्लो मावग्लुहोनायजों लोगोसे बयखोबो सिरि मोनखांहोनो हाग्रा आगजु। बेखौ गुबैयै अदाल बिफांखौ 3-4 फुट गोलाव हास’नानै बेखौ खुरखनानै दान्नाय जायो। गुवार दुन्द्रा थानाय फारनै मोखांखौ मैसो बिगुरजों खोवनानै फारनैबो मोखांनि रुगुंखौ बे बिगुरनि दुरुंजोंनो थों थों बोखथोंनाय जायो आरो बुग्रा फारनैखौबो खामनि खिजों बेंखन महरै लिरनाय जायो।

थर’खा: गारां गोरोबहोनायाव बेखौ साबसिनै खाब जाहोलांनो खावनै आखाय गोनां औवानि दामग्रा आगजुखौनो थर’खा होन्ना बुंनाय जायो। बेखौ 4-5 फुट एबा बेनि बांसिन गोलाव औवा फर’खौ ससे गोलाव हाखावनानै बानायनाय जायो। हाखावनाय समाव फारनै आखायाव हमनो थाखाय औवा मोदोमखौ खावस्लिं दानस्लिंनानै लानाय जायो आरो उनाव गेजेरजों समानै हाखावनानै खावनै बानायनाय जायो। बेखौ गाहायाव मोनसे गान्थिसिल’ हाखावनाय जायो। मेथाय रोजाबनाय आरो मोसानायाव आखाय मोन्नैखौ फुवार फुवार दामनाय जायो।