बिजेपि दोलोआ प्रटिक हाजेलानि बेरेखा बिबुंथि होदों

गुवाहाटी,सेप्तेम्बर 11: बावैसो फोसावजानाय एन.आर.चीनि जोबथा द्राप आबुं फारिलाइआव लाख लाख नोगोरारि सुबुंनि मुंफोरा नुजायैलाय खुंथायाव थानाय सरकार बिजेपि आसाम प्रदेस हान्जानि दैदेनगिरिफोरनि थैआ दुंब्रुद गोदोवगासिनो दं। एन.आर.ची कर्दिनेटर प्रटिक हाजेलानि खामानि मावनायजों गोजोन्नाय मोनाखै आरो हान्जाया बिथांनि बेरेखा बिबुंथि होबाय।

हाजेला बिथांआ गोजौ बिजिरसालिनि बिथोन बादियै हादोरसायाव एन.आर.ची सोदांनाय खामानिखौ मावगासिनो दंमोन। थांनाय हियारिंआव बिथांआ 40.7 लाख जोबथा फारिलाइआव नुजायै सुबुंफोरनि मुंखौ नायबिजिरफिन्नो थाखाय मोन 10 फोरमान (Documents) बिलाइनि फारिलायखौ गनायथाव होन्नानै फोसावदोंमोन आरो मोनफ्रोमबो बिबान गोनां दोलो एबा आफादफोरखौ मोन 10 फोरमान बिलाइ फोसावनायफोरखौ लानानै गाव गावनि बिबुंथि आरो मोनदांथिखौ सेप्तेम्बर दाननि 19 अक्तनि सिगां बिजिरसालिआव जमा होनो खावलायदोंमोन। बेबादि समावनो बिजेपि हान्जानि दैदेनगिरिफोरा जौसिन बिजिरसालाव गसर थिसन्नायनि अनगायै हाजेला बिथांनि बेरेखा मेडियाफोरनि सिगांआव फोसावगासिनो दं।

गुवाहाटीआव थानाय अट्ल बिहारी भबनाव हादोरसा बिजेपि दोलोनि आफादगिरि रन्जित कुमार दास बिथांआ समबाराव खौरांगिरिफोरनि सिगांआव बुङोदि, “गोबां नोगोरारि थागिरिफोर फारियै गर्खा, बेंगलि राव रायग्रा, हिन्दी राव रायग्रा आरो गोबां थागिबिफोरनि मुंआ जोबथा एन.आर.चीनि द्राप फारिलाइआव नुजायाखै जाय खामानिआ बिजेपि दोलो आरो गोबां हादोरसायाव थागिरिसुबुंफोरनि बेरेखा, गोबां नायबिजिरनायनि उनाव नुनो मोनबादि एन.आर.चीनि खामानिआ थागिरि सुबुंफोरनि बेरेखासो” होन्ना बिथांआ बुंबावो।