बुहुमनि हादोरफोरा उदखारि हान्जा आरो हेफाजाब होगोरिफोरनि हेंथायै गोख्रों राहा लानांसिगौ: नारेन्ड्र मोडी

गोदान दिल्ली,फेब्रुवारि 19: पुलवामा जिल्लायाव सुईसाइड बमाजों गाग्लोबनायखौ नोजोर होनानै पाकिस्तान हादोरसिम खौरां हरनाय बादियै हादोरनि गाहाय मंत्री नारेन्ड्र मोडी बिथांआ समबार आव बुङोदि, सावरायनायनि समआ जोबलांबाय, बुहुमनि हादोरफोरा खौसे जानांसिगौ आरो उदखारि हान्जानि बेरेखायै गोख्रों राहा लानायजों लोगोसे जाय हादोरा उदखारिफोरखौ हेफाजाब होबोगासिनो दं, बिथांमोनि हेंथायै गोख्रों राहा लानांसिगौ।

बे बाथ्राखौ बिथांआ जेब्ला आर्जेनतीना हादोरनि हादोर खुंगिरि माउरिचीव मेक्रि बिथांआ भारतनि हाइड्रावाद हाउसआव फैदोंमोन अब्ला बिथांजों सावरायखांनानै जम्मु आरो काश्मीर हादोरसानि पुलवामा जिल्लायाव इस्लामिक उदखारि हान्जानि गाग्लोबनाय, जाय गाग्लोबनायाव भारत हादोरनि सा 44 रौनिया हान्जाफोरा केबसेयैनो मुंख्लं जालांदोंमोन, बेखौ नोजोर होनानै हादोरनि गाहाय मंत्री बिथांआ बुङो, लोगोसे आर्जेनतीनानि हादोरगिरि मेक्रि बिथांआबो गोख्रों रावजों सोंखारियो।

“हादोरगिरि मेक्रि आरो आं फोथायोदि, उदखार खालामनाया बुहुमखौ गोजोन लाखिनायाव जोबोद गेदेर जेंना खालामबोगासिनो दं, पुलवामा गोग्लोबनायनिफ्राय मिथिनो मोनोदि, सावरायज्लायनायनि समआ जोब्बाय। बे समाव बुहुमनि हादोरफोरा खौसे जानांसिगौ आरो उदखारि हान्जाफोरजों लोगोसे उदखारिफोरखौ हेफाजाब होग्रा हादोरफोरनि हेंथायै गोख्रों राहा लानांसिगौ” होन्ना नारेन्ड्र मोडि बिथांआ बुङो।

“उदखारि हान्जानि हेंथायै गोख्रों राहा लानो लाजिग्रा हादोर आरो जाय हादोरा उदखारिफोरखौ हेफाजाब होबोदों बिथांमोनहाबो सुबुं माहारिखौ गोजोन लाखिनायनि बेरेखा” होन्नानैबो नारेन्ड्र मोडि बिथांआ बुङो।

बिथांआ बुंबावोदि, G-20 हादोरफोरा हामबुर्ग हादोरनि दैदेनगिरिनि मोन 11 बाथ्राफोरखौ सोदांनांसिगौ। भारत आरो आर्जेनटीनाया बावैसो समनि गेजेरावनो उदखारिफोरनि हेंथायै स्पेसियेल खेंफोरथिखौ फोसावगोन।

हादोरनि गाहाय मंत्री नारेन्ड्र मोडी बिथांआ आर्जेनटीना हादोरखौ इंन्टारनेशनेल सलार एलाइन्स एबा हादोरनांआरि सलार गोरोबथा आव गोदान सोद्रोमा एबा मेम्बार हादोर हिसाबै बरायो।

आर्जेनटीना हादोर खुंगिरि मेक्रि बिथांआबो पुलवामा जाथायखौ गोख्रों रावजों सोंखारिनानै बुङोदि, “जाथायखौ आं गोख्रों रावजों सोंखारियो, उदखार खालामनायनि मोनफ्रोमबो हाबाफोरखौ जों सोंखारियो, बेफोर हाबाफोरा गोरोबज्लायनानै थानायाव जेंना लाबोयो, सुबुं माहारिनि बेरेखा उदखारिफोरनि हेंथा हाबा मावनायाव आं खौसेयै हाबा मावलांफागोन” होन्ना बिथांआ बुंबावो।

हादोरनि गाहाय मंत्री नारेन्ड्र मोडी बिथांनि खावलायहरनायाव आर्जेनटीना हादोरनि हादोर खुंगिरि मेक्रि बिथांआ भारत हादोराव सानथामनि हाबाफारि लानानै फैदोंमोन।

फारसेथिं जम्मु आरो काश्मीरनि पुलवामा जिल्लायाव इस्लामिक उदखारि हान्जानि गाग्लोबनायखौ लन्डन आव गोख्रोङै सोंखारिदों। बिथांमोनहा गोबां जायगाफोराव धर्ना होनाय हाबाफारि लानानै पाकिस्तान मुर्डाबाद होन्ना स्लगान होनायखौ नुनो मोन्नाय जादों। (IANS)