टंला,जानुवारि 02: उदालगुरि टाउननि 24 कि.मिटार साहा थानाय भैरबखुन्डा ओनसोलाव दावबायारिफोरनि गोसोखौ मुजिहोनो थाखाय फैगौ 8 जानुवारि 2019 निफ्राय 5 साननि हाबाफारि लानानै 7थि बोसोरारि फोर्बोखौ खुंफुंनो साखाफारा। मखजाथावदि भैरबखुन्डानि मिथिंगायारि समायना नुथायआ हिमालया हाजोनि आफांआव थानाय आसाम अरुनाछल आरो भुटान हादोर आरो हादोरसानि सिमायाव दं।
भैरबखुन्डा टुरिस जौगाखां मिरुआव भैरबखुन्डा फोर्बोनि थाखाय दाफुंजानाय रायदाव आफादनि आफादगिरि आरो दैदेनगिरि मंत्री रिहन दैमारि बिथांआ समबारखालि प्रेस बिबुंसारनि गेजेरजों ओनसोलाव थानाय साफ्रोमबो सुबुंफोरखौ बाहागो लानो खावलायनायजों लोगोसे ओनसोलाव थानाय गुबुन गुबुन फरायसालि, फरायसालिमाफोरनि फरायसाफोरा ओनसोलनि जेंनाफोरखौ बोस्रांनो थाखाय मोनब्रै आयदानि बिथिंआव सावरायनो गोनां हाबाफारिआव बाहागो लानाय गोनां होन्ना बिथांआ बुङो।
खौरां मोन्नाय बादिब्ला बे फोर्बोनि गेजेरजों गोबां रोखोमनि हारिमायारि दिन्थिफुंनाय, गेलेनाय, लिरनाय बादायज्लायनाय, सोंगाब सोंनाय, सावगारि आखिनाय, आयजोफोरनि खाबादि गेलेनाय बादायज्लायनाय, फेसन दिन्थिनाय बादायज्लायनाय आरो मोदोम फेदेरनाय बादायज्लायनायफोरखौ खुंफुंगोन होन्ना मिथिनो मोन्नाय जायो।
बीटीसी एसेमब्लिनि बुंथिगिरि आरो भैरबखुन्डा फोर्बो खुंफुं आफादनि आफादगिरि ट्रीदीप दैमारि बिथांमोनहा नुजाथिनायजों लोगोसे फोर्बोनि गाहाय खन्भेनर आरो बीटीसी खुंथायनि भैरबखुन्डा बियाबनि MCLA रिपेन दैमारि बिथांआबो प्रेस जथुमायाव बाहागो लादोंमोन। भैरबखुन्डा फोर्बोखौ खुंफुंनो लानाय खमिटिआ बुङोदि, भैरबखुन्डानि फोर्बोआ गोबाव समनिफ्रायनो गुबुन गुबुन हारि आरो राव रायज्लायग्राफोरनि गेजेराव गोरोबज्लायनायनि बिदिन्थि। लोगोसे भुटान आरो अरुनाछल हादोरसाफोरनि सुफुंफोरजों गोरोबज्लायखौबो दिन्थिफुंगोन होन्ना फोरमायो, बिथांमोनहा फोरमायनानै होबावोदि, भैरबखुन्डा फोर्बो फालिनायनि गुबै थांखिआ टुरिझम बिफानखौ जौगाखांनाय लाबोनाय आरो हादोरसायाव साख्रि गोयै लाइमोन, जाय लाइमोनफोरा गोजौ सोलोंथाय गोनां बिथांमोनि थांनानै थानायाव बिहोमा होनाय।
फारसेथिं बड’लेन्ड हालामनि सिरां जिल्लायाव थानाय आइ दैमानि रुगुंआवबो 3थि दैजिं फोर्बोआ सोलिफुगासिनो दं, जाय फोर्बोआ 27 डिसेम्बर 2019 निफ्राय जागायदोंमोन आरो 7 डिसेम्बर 2019 सिम सोलिफुबाय थागोन।
8 जानुवारि दान्निफ्राय खुंफुंजानो लागा भैरबखुन्डानि फोर्बोआव सुबुंफोरनि गोसोखौ रंजाखांनाय लाबोनो थाखाय हेलिखप्तार बिरनाय, पाराग्लिदिं गाखोनाय, जिभ साफारि, मैदेर साफारि, दैमा दावबायनाय, सुटीं आरो बायदि रोखोमनि जानाय लोंनायफोरखौ दाजाबदेरगोन होन्ना मिथिनो मोन्नाय जायो।