गुवाहाटी,मार्च 18: बड’लेन्ड पिपल्स प्रन्ट राजखान्थि दोलोनि गाहाय हाग्रामा महिलारि बिथांआ थांनाय 17 मार्च 2019 आव भारतीय’ जनता पार्टी राजखान्थि हान्जानि हादोरारि आफादगिरि अमित साहा बिथांनो बीटीसी ओनसोलनि माखासे जेंनाफोरखौ नोजोर होनानै लाइजामनि गेजेरजों फोरमायहरो।
खौरां मोन्नाय बादिब्ला महिलारि बिथांआ लाइजामनि गेजेरजों फोरमायहरदोंदि, आसाम हादोरसायाव थानाय मोन 6 गुबुन गुबुन गोजौ थाखोनि आरो गोबां सुबुं सानखो थानाय हारि माहारिनि गोबाव समनिफ्रायनो दाबि खालामबोनाय सेडियुल ट्रायब एबा ट्रायबेल बिमुंआव थिसननायनि दाबिखौ सुस्रांनानै होनांगौ।
बीपीएफ दोलोनि दैदेनगिरि महिलारि बिथांआ मिथिहोहरबावदोंदि, फैगौ पारलियामेन्टारि बिसायखथि खुंफुंजाखांनायनि उनाव मिरु सरकारआ आसामनि मोन 6 हारिसाफोरनो ट्रायबेल बिमुंनि गनायथि होनो थाखाय Constitution (Scheduled Tribes) Order (Amendment) Bill, 2019 खौ थिसन्नानै होनांगौ।
आसामनि मोन 6 हारिसाफोरा जाबाय फारियै- मरान, मटक, चुटीया, टाय-अहम, कछ-राजबंसि आरो आडिवासि एबा टि-ट्रायब। बिथांमोनहा गोबाव समनिफ्रायनो ट्रायबेल बिमुं मोन्नो थाखाय दाबि खालामबोगासिनो दं।
“आसामनि मोन 6 हारिसाफोरखौ ट्रायबेल बिमुंनि गनायथि होनो थाखाय थांनाय राज्य’ सभानि जथुमायाव मिरु सरकारनि नखर मंत्री राजनात सिंह बिथांआ हाउसनि टेबोल आव गथायदोंमोन, नाथाय राज्य सभानि माखासे सोद्रोमाफोरा हेंथा खालामनायलाय ट्रायबेल बिल 2019 आ आयेन आव थिसनजायाखै, आसाम हादोरसानि सिङाव थाखानाय ट्रायबेल माहारिनि जेबो खङा लाबोआजासे लख सभा बिसायखथि जोबलांनाय लोगो लोगो ट्रायबेल बिल 2019 खौ थिसननांगौ, जाहाथे गोबाव समनिफ्रायनो दाबि खालामबोनाय जेंनाया सुस्रांजायो” होन्ना महिलारि बिथांआ अमित साहा बिथांनो लाइजामनि गेजेरजों रोखा खालामनानै फोरमायहरो।
मखनो गांनदि, थांनाय 9 जानुवारि 2019 अक्ट’खालि राज्य सभानि जथुमायाव ट्रायबेल बिल एबा Constitution (Scheduled Tribe) Order (Amendment) Bill, 2019 खौ थिसनदोंमोन नाथाय जथुमानि हाउसआ गोदान बिलखौ गनायनानै लायाखै।
बिपिएफ दोलोनि गाहाय हाग्रामा महिलारि बिथांआ माखासे गुबुन गुबुन जेंनाफोरखौबो लाइजामनि गेजेरजों फोरमायहरबावो, बेफोरनि माखासेआ जाबाय- माखासे बड’ आरो कार्बि सुबुंफोरखौ सेडियुल ट्रायबनि फारिलाइआव थिसनफानाय। हादोरसानि दै बानानि जेंनाखौ हादोरनि जेंना हिसाबै फोसावनाय (National Problem), इउनाइतेड लिबारेशन फ्रन्ट ऑफ आसाम (ULFA) आरो नेशनेल डेमक्रेटिक फ्रन्ट ऑफ बड’लेन्डनि (NDFB) जेंनाखौ सुस्रांना होनाय, क’कराझार आव हेलिकप्टार बिरखं थिसन्नाय, बेकि आरो पाग्लाडिया दैमायाव दालां लुफुंनाय, जामदुवारनिफ्राय भैरबकुन्डासिम बड’लेन्ड नेशनेल हाइवे एबा बड’लेन्ड राजा लामा लुफुंनाय।