Guwahati : आसामनि बयजोंबो मिथिजानाय मेथाइ रोजाबगिरि (Artists) जुबिन गार्ग बिथाङा बिबुंथि लाखिनायनि सुलाद लानानै फिन्नाय होयो गुबुन सासे फावखुंगुर (Actor) जतिन बरा। नोगोरारि सोदांनाय बिलनि हेंथायै राज्योनि सोरबिथिं अर जोंब्लावदों। फरायसा आफाद, दोलो गौथुम लोगोसे बायदि बिथिंनि सुबुंआ नोगोरारि सोदांनाय बिलखौ बेरेखा खालामदों। नाथाय बे अल'खद समावनो रोजाबगिरि जुबिन गार्ग फावखुंगुर जतिन बराया सिरि थानायखौ दुखुनांथाव होन्ना बुंथियो।
मख'जाथावदि अस'मिया सावथुन मुलुगनि सिगां सारिनि राफोद फावखुंगुर (Assamese Superstar) आरो दानि बि जे पि नि दैदेनगिरि (BJP Leader) जतिन बराया राव हारिमु दोहोरोम समाजखान्थिनि रैखाथि थामोन्थानि फार्से अल'खद खालामनो हाथाव बिलनि सायाव जेबो बिबुंथि (Comments) होयैआ एबा सिरि थानायाव बिथांनि अनसाइ गिरि , गाहाम हास्थायगिरि ( Well Wisher) या दुखु फोरमायदों।
थांनाय रबिबार खालि खरसा आसामनि डिब्रगराव खुंफुंनाय मोनसे खौरांगिरि मेल (Press Meet) नि गेजेरजों जुबिन गार्ग बिथाङा बुङो दि फावखुंगुर जतिन बराया बि जे पि दोलोखौ एंगारना राज्यो-राजानि गेजेराव फैनांगौ। बिथां फावखुंगुरा बि जे पि दोलोआव हाबफैजेन्नानै साख्रिनि मासियाव जिरायफैनानै राज्यो-राजानि हादोरनि खोथाखौ बावगारलांजोब्बाय। बे बिथांनि गावारि थांखि (Personal Decision) , आं बिथांनि सायाव बिबुंथि गाहाम जानाय नङा। आं गुबुननि सिङाव थानाय मावथि नङा, जेब्लाबो राज्यो-राजाजों थाफागोन आरो गाहाम सान्नानै आवगायगोन ।
जुबिन गार्गा बिबुंथिनि उनावनो फावखुंगुर जतिन बराया फिन्नाय होयो। मोनसे खौरां मेलनि गेजेरजों फावखुंगुर जतिन बराया बुङो दि आंखौ फावखुंगुर महरै गसंथेनायाव एबा गायसंलांनायाव राज्यो-राजाया बिहोमा होलांदों। आसामनि राव हारिमु दोहोरोम समाजखान्थिनि बेरेखा नोगोरारि सोदांनाय बिलखौ सुबुंआ हेंथा खालामो अब्ला जतिन बरायाबो हेंथा खालामगोन।
आथिखाल दावगाफु मुगायाव बयनिख्रुइबो थाबथाबैनो गोसारहोनो हानाय समाजारि बिजों फेसबुकनि गेजेरजों गावनि फिनजाथाइ होयो। फेसबुकनि पष्टाव रेबथुमनानै जतिन बराया बुङो दि अस'मिया राव, थुनलाइ, हारिमु , दोहोरोम समाज-खान्थि गोजौआव दं, आंनि थाखाय मासि गेदेर जानो हाया। अस'मिया राज्यो-राजाया रैखाथि आरो थामोन्थानि थाखाय जा थिरांथायाव गाखोगोन बै आं सासे अस'मिया सुबुं महरै मानिनानै लागोन।