गुवाहाटी,जानुवारि 23: नोगोरारि (सोदांनाय) बिल 2016खौ बेऱेखा खालामनानै दुलाराय आसाम फरायसा आफाद (AASU) आरो मोन 30 गुबुन गुबुन हारि माहारिफोरनि समाजआरि आफादफोरनि दैदेन्नायाव गुवाहाटी नोगोरमानि लटासिल फोथाराव दिनै (बुधबार) गेदेरथार सुबुं गौमा खुंफुङो।
बे धर्ना होनाय हाबाफारिआव गुबैयै फरायसा आफाद समाजआरि आफाद आरो गोबां गुबुन गुबुन आफादफोरनि दैदेनगिरि आरो सोद्रोमाफोरा नोगोरारि सोदांनाय बिल 2016 आ 1985 माइथायनि आसाम गोरोबथा एबा आसाम एकर्डखौ सिफायगोन होन्ना बाहागो लानायखौ नुनो मोन्नाय जादों।
सुबुं गौमायाव बाहागो लागिरि बिथांमोनहा “खिलनजियार बाज्रा निनाड” मुं लानानै लटासिन गेलेग्रा फोथारनिफ्राय डिस्पुरनि जनता भबनसिम सुबुं हान्जा सुरो।
लटासिल फोथाराव आसाम हादोरसानि गोबां गुबुन गुबुन जना खनला थानाय जायगाफोरनि सुबुंफोरा नोगोरारि सोदांनाय बिल 2016 खौ बेरेखा खालामनो नुजाथिफैदों आरो गुवार फोथाराव सुबुंनि बाना जानायखौ नुनो मोन्नाय जादों।
मेथाय रोजाबगिरि जुबिन गार्ड बिथांआबो फरायसा आफादजों लोगोसे
मुंदांखा मेथाय रोजाबगिरि जुबिन गार्ड, जाय बिथांआबो नोगोरारि सोदांनाय बिल 2016 नि फार्से दुखुं मोनदों, बिथांआबो गावनि मेथाय मोजां मोनगिरि आरो गावनि लोगो बिथांमोनखौ नोगोरारि (सोदांनाय) बिल 2016 खौ बेरेखा खालामनाय धर्ना होनाय हाबाफारिआव बाहागो लानो खावलायहरो।
मखनो गोनांदि, थांनाय 8 जानुवारिआव बिथांआ गावनि मोखां बिजाबनि गेजेरजों आसामनि गिबि मंत्री सर्बानन्द सनवाल बिथांआ लांदाङै लाइजाम लिरनानै 2016 माइथायाव बिजेपि दोलोनि जानानै मेथाय रोजाबनानै 2 लाख रां लानायखौ गथायफिनगोन होन्ना बुंदोंमोन। बिथांआ नोगोरारि सोदांनाय बिल 2016 खौ बोखांना लाफिन्नो थाखाय मिरु सरकारखौ नारसिन्नो सर्बानन्द सनवाल बिथांखौ खावलायहरो।
फारसेथिं बिथांआ गावनि गोसोजों जेंना गोनां नोगोरारि (सोदांनाय) बिल 2016 खौ बेरेखा खालामानै “पलिटिक्स नखरिबा बन्डु” (राजखान्थि दागेले, लोगोफोर) मुंनि मेथाय सुजुनानै रोजाबगासिनो दं। थांनाय 16 जानुवारि अक्टआवबो आसाम फरायसा आफादनि दैदेनगिरिफोरखौ लोगो हमनानै दिनैनि धर्ना होनाय हाबाफारिखौ दैदेन्नायनि सायाव सावरायदोंमोन।
थैजों लिरबाय “जै आइ असम”
गुवाहाटी नोगोरमानि लटासिल गेलेग्रा फोथार आव नोगोरारि (सोदांनाय) बिल 2016 खौ बेरेखा खालमनानै सुबुं गौमायाव जरहात जिल्लानि थागिरि बिथांआ गावनि थैजों लिरबाय “जै आइ असम” ( जै जाथों बिमा आसाम)।
“जुनाकि जुग” मुंनि खन्थाय मेथायाव लक्सिनात बेजबरुवा बिथां लिरनाय “बाजक दबा बाजक संक’, असम आखौ उन्नती पटत, जै आइ असम बल, खन्थायनि सिरिआ मेनसे धर्ना होनायनि देंखो जालांदों आरो धर्ना होगिरि बिथांमोनहा बेबादिनो स्लगान एबा होस्रिखावनायखौ नुनो मोन्नाय जादों।
धर्ना होनाया सा-सान्जा ओनसोलफोराव रिंखांदों
आसाम हादोरसाजों लोगोसे सा-सान्जा ओनसोलफोराव थानाय गुबुन गुबुन हादोरसाफोरावबो जेंना गोनां नोगोरारि सोदांनाय बिल 2016 खौ बेरेखा खालामनानै धर्ना होनायनि देंखोफोरा ग्रोम ग्रोम रिंखांनायखौ नुनो मोन्नाय जादों। थांनाय बोसोरनिफ्रायनो गोबां फरायसा आफाद आरो गुबुन समाजआरि आफादफोरा जेंना गोनां बिलखौ बेरेखा खालामबोगासिनो दं, नाथाय थांनाय 8 जानुवारिआव जेब्ला लख सभानि जथुमायाव बिलखौ नखर मंत्री राजनात सिंह बिथांआ टेबोल आव गथायो अब्लानिफ्राय धर्ना होनायफोरखौ बांसिनै नुनो मोन्नाय जादों आरो गासै सा-सान्जा ओनसोलफोराव दुंहाव थासारिआ सोमजिबोगासिनो दं।
नोगोरारि बिल 2016 खौ बेरेखा खालामगिरि बिथांमोनहा फोथायोदि सा-सान्जा ओनसोलाव बे बिलआ बांसिनै गोहोम गोग्लैगोन आरो थागिबि सुबुंफोरनि राव, हारिमु, थुंनलाइ आरो हा-हुनि मोन्थायफोरा गोमालांगोन लोगोसे 1985 माइथायनि आसाम गोरोबथाखौ सिफायगोन।