आसाम टुरिझम बिफाना 3थि दैजिं फोरबोखौ फोसावबाय, 27 डिसेम्बरनिफ्राय 7 जानुवारिसिम खुंफुंगोन

आसाम टुरिझम बिफाना 3थि दैजिं फोरबोखौ फोसावबाय, 27 डिसेम्बरनिफ्राय 7 जानुवारिसिम खुंफुंगोन

गुवाहाटी,डिसेम्बर 19: गुवाहाटी नोगोरमानि नवटेलनि न’ब्लांआव जथुमा लानानै हाबाफारि बादियै बड’लैन्ड हालामावनि सिङाव थानाय सिरां जिल्लानि हाग्रामा दालांनि फैलाव गुवार फोथाराव टुरिझम बिफानजों खुंफुंजानो लागा 3थि दैजिं फोरबोखौ फोसावबाय।

प्रेस रिलिसनि गेजेरजों जोंनिसिम फोसावहरनाय बादिब्ला हादोरसा खुंथायनि टुरिझम एबा दावबाय बिफान्नि मनट्री चन्दन ब्रम्ह बिथांआ बे मेलखौ दैदेनदोंमोन आरो आसाम टुरिझम डेब्लभमेन्ट कर्परेशन (ATDC) नि हागाय (Chairman) जयन्त माल्ला बरुवा बिथांआबो बाहागो लादोंमोन। दिनै (बुधबार) फोसावनाय बादिब्ला 3थि दैजिं फोर्बोआ 27 डिसेम्बरनिफ्राय जागायनानै फैगौ बोसोरनि 7 जानुवारिसिम सोलिबाय थागोन।

12 सान फोर्बो फालिनायाव मोनफ्रोमबो हारि माहारिनि सुबुंफोरा बाहागो लागोन आरो हादोरनि गुबुन गुबुन जायगाफोरनि आलासिफोर फैनायजों लोगोसे गुबुन हादोरफोरनिफ्रायबो आलासिफोरा फैगोन।

टुरिझम बिफान्नि मनट्री चन्दन ब्रम्ह बिथांआ मेलनि गेजेरजों बुङोदि, जों 3थि दैजिं फोर्बोखौ फोसावनानै गोजोनग्लायनाय मोनदों, बे फोर्बोखौ थांनाय 2016 माइथायावनो ओनसोलनि दावबायफैनाय आरो बड’लैन्डआव थानाय हारिमुखौ जौगाखां होनायानो बेनि गुबै थाखि, जों जेब्ला 3थि फोर्बोखौ फालिगोन अब्ला मोनसे देरसिन फोर्बो बादि फालिनो नाजादों आरो बोसोरफ्रोमबो फालिनानै हादोर (National) आरो हादोरनांआरि (International) केलेन्डाराव (Calendar) दोन्नो नाजादों।

हादोरसा आरो बीटीसीनि सिङाव थानाय गामिआरि ओनसोलनि दैमा सेराव दावबायनायखौ जौगाहोनो 2016-17 माइथायाव सिरां जिल्लानि ‘आइ’ दैमा सेराव “AIE RIVER WINTER FESTIVAL” नि मुं लानानै खुंफुंदोंमोन, उनाव 2017-18 माइथायाव मुंखौ सोलायनानै दैजिं (DWIJING) एबा दैमानि जिं मुं लानानै खुंफुंदोंमोन, आरो दासान्दि दैमा सेरनि फोर्बो होन्नानै बोसोरफ्रोबो खुंफुंनो आखायाव लादों।

गामियारि दैमा सेराव दावबायनाजों लोगोसे ओनसोलनि माखासे फालांगि आरो बाखोनायजाथाव खामानिफोरखौ रांखान्थिआरि बिथिंआव जौगाखां लाबोनायखौ गुबैयै नोजोर होनाय जादों। दैजिं फोर्बोआव गुबुन गुबुन रोखोमनि हाबा मावनाय, समायना रमायना दिन्थिफुंनाय, हारिमु आरो जानाय लोंनायफोरखौ दिन्थिफुंनायजों लोगोसे गोजौआव बिरनाय, माहारिनि गेलेनाय बादायलायनाय आरो गोबां रोखोमनि हाबाफारि दिन्थिफुंगोन। बेफोरखौ मावफुंनानै हादोरसानि गामियारि ओनसोलाव टुरिझम बिफानखौ जौगाखां लाबोनायानो बेनि मोनसे गुबै थांखि होन्ना बिथांमोनहा मिथिहोयो।

मानगोनां ATDS नि गाहाय(Chairman) जयन्त माला बरुवा बिथांआ बुङोदि, आसाम टुरिझम बिफाना बे फोरबोखौ मोजाङै जाफुंसार जाहोनो फारफ्रोमबो बिथिंआवनो नोजोर होगासिनो दं, बे फोर्बोखौ मोजाङै खुंफुंनानै जों बीटीसीनि बिमुंखौ हादोर आरो हादोरनांआरि जायगाफोराव गुबुन मुङै मिथिसारहोनो नाजादों, जाय फोरबोखौ मावफुंनो थाखाय खुंफुं आफादनि आखायाव फारि फारि हाबाफारिफोरा दं, आरो बे हाबाफारिआव हादोरनि खना खनला थानाय सुबुंफोराबो बाहागो लाफैगोन" होन्ना बिथांआ बुंबावो।

खौरां मोन्नाय बादिब्ला हादोरनि गुबुन गुबुन मुंदांखा मेथाय रोजाबगिरि आरो बलिउदनि फाउखुंगुरफोरजों लोगोसे गुबुन मुंदांखा सुबुंफोराबो बाहागो लाफैगोन। माखासे मुंदाखा सुबुंफोरा जाबाय फारियै-कैलास किर, अमिट ट्रिभेडि, मालाइका आररा कान, हिमेस रेसामिया, निराज स्रिधार,भुमि ट्रिभेडि, स्वेता पन्डित, आरो मुंदांखा WWE गेलेगिरि ग्रेड खालि बिथांमोनहाबो बे फोरबोआव बाहागो लाफैनानै बायदि रोखोम दिन्थिफुंगोन होन्ना मिथिनो मोन्नाय जायो।

बे फोर्बोखौ जाफुंसार खालामनो थाखाय मानगोनां दावबाय बिफान्नि मनट्री चन्डन ब्रम्ह बिथांआ मोनफ्रोमबो हारि माहारिनि सुबुंफोरखौ बाहागो लोनो खावलायो आरो मोनफ्रोमबो खौरां सेबखांगिरि मेडियाफोरखौबो फोसावनो खावलायबावो।

logo
Sentinal Assam
bodo.sentinelassam.com