आसाम सरकारा 1 रांनि माइरंनि स्किमखौ फोसावबाय
गुवाहाटी,फेब्रुवारि 28: हादोरसानि गिबि मंत्री सर्बानन्द सनवाल बिथांआ दिनै (28 फेब्रुवारि) 1 रांनि माइरंनि स्किमखौ गुवाहाटी नोगोरमायाव फोसावनानै होयो। जाय स्किमखौ Affordable Nutrition & Nourishment Assistance (ANNA) योजना होन्नानै बुंनाय जादों।
खौरां मोन्नाय बादिब्ला बे स्किमनि गेजेरजों फैगौ 1 मार्च 2019 अक्टनिफ्राय खाबु मोनगिरि बिथांमोनहा 1 किलग्राम माइरंखौ 1 रांआवनो मोन्नो हागोन।
आसाम सरकारा हादोरसानि आदार एबा जानाय लोंनायाव रैखाथिखौ ANNA स्किमनि गेजेरजों राफोद खालामनो नाजादों, जाय स्किमनि गेजेरजों साहा बागाननि सुबुंफोरनो बेसेन नाङा लासे माइरंखौ होगोन आरो साहा बागान ओनसोलनि नङै सुबुंफोरनो 1 के:जि माइरंआव 1 रां लानाय जागोन आरो बे क्सिमनि गेजेरजों हादोरसानि गासै सा 2,48,89,182 सुबुंफोरखौ फोलोमगोन होन्ना मिथिनो मोनबावनाय जायो।
गिबि मंत्री सर्बानन्द सनवाल बिथांजों लोगोसे हादोरसा रां बिफान्नि मंत्री हिमान्त बिस्व सर्मा बिथांआबो 1 रांनि माइरंनि स्किमखौ फोसावनानै गोजोन्नाय मोनदों होन्ना गावनि टुयेटार एकाउन्टनि गेजेरजों फोरमायो। बिथांआ लिरदोंदि, Along with HCM @sarbanandsonwal happy to launch our flagship program ANNA, as announced in #AssamBudget2019.
खौरांआव फरमायहरनाय बादिब्ला बे स्किमनि गेजेरजों हादोरसानि गासै 53 लाख नखरफोरा खाबु मोन्नो हागोन होन्ना मिथिनो मोनबावनाय जायो।
मखनो गोनांदि, थांनाय 6 फेब्रुवारि 2019 अक्ट’आव जेब्ला हादोरसा रां बिफान्नि मंत्री हिमान्त बिस्व सर्मा बिथांआ 2019-20 माइथायनि थाखाय हादोरसा बाजेतखौ फोसावदोंमोन, अब्ला बिथांमोनहा बाजेतजों लोगोसे फोसावदोंमोनदि, हादोरसानि साहा बागान ओनसोलफोराव थानाय 4 लाख नखरफोरनो बेसेन नाङा लासे माइरंफोरखौ रान्नानै होगोन आरो दान मोनफ्रोमबो 2 के:जि सेनिखौबो बेसेन नाङा लासे रान्नानै होगोन।
